Jerusalema ino lobgwa
1 Ipapo ahwa Ndzimu udana nge hwi gulu uti, “Sedzelani ngeno imwi batjengeti be nzi, mmwe ne mmwe azhe akabhata thumo lile linobulaya.” 2 Ngono bonani, kukazha balume bali kutathatu bedwa mu lubizho gwe nkoba upezhugwi wakalinga ku bunandzwa, mmwe ne mmwe akabhata thumo linobulaya mu luboko gugwe. Pakati kwabo kwakabe kuna nlume wakaambala zwiambalo zwe jila, akapakatila gobhodo lina zwikwalilo. Bakanginila tje mukati bakama pa tjibeso tjinopisigwa zwibhayilo tje phangula.
3 Ipapo tjedza tje Ndzimu we Iziraela tjakabe tjadwa pezhugwi kwe dzikherubhu kwatjakabe tjabe tjilipo ngono tjabe ku manginilo e ng'umba ye Ndzimu. Yahwe bakadana nlume wakaambala zwiambalo zwe jila wakapakatila gobhodo lina zwikwalilo, 4 bakabe beti kunli, “Yenda mu nzi nkulu wose, upalame Jerusalema ubige lutjwayo mu phazha dzaibabo banohwa zogwadza belila ngekwe zwithu zwinoshimisa zwinothamiwa muuli.” 5 Kuna ibaba bamwe Ndzimu ukati, “Palama nzi nkulu wose shule kukwe mubulaye, musitongo hwilangoni kene kutjidza mmwe. 6 Mubulaye bathuntana ne bazhuzha ne baanadi ne bana ne bakadzi koga musitongo thama tjimwe una lutjwayo. Tangisani mu bugalo gwangu gwakayengemala.” Ndizo bakatangisa ne sholotjena dzakabe dzili mbeli kwe ng'umba. 7 Ipapo ukabe uti ku bali, “Temapadzani ng'umba ye Ndzimu, muzhadze misha nge zwitumbu. Yendani!” Ngono bakatangisa kubulaya bathu mu nzi nkulu. 8 Bakati bebulaya saikoko, imi ndasala ndili ndoga, athigama akotamila pasi alila kwazo ati, “She Yahwe! Apa mowolobesa malimbelimbe wose e Iziraela mu kugwadzila moyo Jerusalema kene?”
9 Ndzimu bakandidabila beti, “Nlandu we bathu be Iziraela ne bathu be Juda nkulu kwazo, shango izhele kutebula malopa, nzi nkulu uzhele kutjebela, ngoti banoleba beti, ‘Yahwe bakafupatila shango, Yahwe abatotibona.’ 10 Ndizo wali andingabahwile ngoni kene kuli kubatjidza, koga ndowothama kuti babuyigwe nge zwe mishingo yabo.”
11 Bonani, ipapo nlume wakaambala zwiambalo zwe jila akapakatila gobhodo lina zwikwalilo kazhisa mbiko eti, “Ndathama sekwa mandidwa.”
© Kalanga Bible © Bible Society of Botswana, 2008, 2018.