Bapirisiti ne Balevi bakabuya
1 Aba ndibo bapirisiti ne Balevi bakabuya na Zerubhabeli nkololo wa Shealitiyele bana Jeshuwa: Seraya na Jeremiya na Ezera na 2 Amariya na Maluki na Hatushi na 3 Shekaniya na Rehumu na Meremoti na 4 Ido na Ginethoyi na Abija na 5 Mijamini na Maadiya na Biliga na 6 Shemaya na Joyaribu na Jedaya na 7 Salu na Amoku na Hilikiya na Jedaya. Ibaba bakabe bali ibo batungamili be bapirisiti ne zwikamu zwabo mu tjibaka tja Jeshuwa.
8 Balevi ibo bakabe bali bo Jeshuwa na Bhinuyi na Kadimiyele na Sherebiya na Juda na Mataniya iye ne zwikamu zwizwe, bakabe bakalingisana ne njimbo dze mboko. 9 Ngono Bhakubhukiya na Uni ne zwikamu zwabo, bakabe bema kulingisana nabo mu tjibaka tje nshingo.
Bakololo be ntungamili we bapirisiti
10 Jeshuwa wakabe ali tate ba Joyakimu, Joyakimu ali tate ba Eliyashibi, Eliyashibi ili tate ba Joyada, 11 Joyada ali tate ba Jonatani, Jonatani ali tate ba Jaduya.
Batungamili be misha ye bapirisiti
12 Mu tjibaka tja Joyakimu ibaba ndibo bapirisiti bakabe bali batungamili be misha: We nsha wa Seraya ndi Meraya; we Jeremiya ndi Hananiya; 13 we Ezera ndi Meshulamu; we Amariya ndi Jehohanani; 14 we Maluki ndi Jonatani; we Shebaniya ndi Josefa; 15 we Harimu ndi Adina; we Meraoti ndi Helikayi; 16 we Ido ndi Zakhariya; we Ginethoni ndi Meshulamu; 17 we Abija ndi Zikiri; we Miniyamini ndi ; we Moadiya ndi Pilitayi; 18 we Biliga ndi Shamuya; we Shemaya ndi Jehonatani; 19 we Joyaribu ndi Matenayi; we Jedaya ndi Uzi; 20 we Salayi ndi Kalayi; we Amoku ndi Eberi; 21 we Hilikiya ndi Hashabiya; we Jedaya ndi Nethanele.
Mazina e bapirisiti ne Balevi akabe akakwagwa
22 Mu tjibaka tje batungamili be misha ye Balevi bo Eliyashibi na Joyada na Johanani na Jaduwa ne bapirisiti bakabe bekwagwa pasi, kukamisiwa mu tjibaka tje mbuso wa Dariyasi we Npheshiya. 23 Bakololo ba Levi ne batungamili be misha bakabe bakakwagwa mu bhuka ye Zwiyitikalo kuswikilila mu mazhuba a Johanani nkololo wa Eliyashibi.
Mishingo ye bapirisiti ne Balevi
24 Batungamili be Balevi bakabe bali bo Hashabiya na Sherebiya na Jeshuwa nkololo wa Kadimiyele ne makamu abo bakabe bema kulingisana nabo mu tjibaka tje kukudza Ndzimu netje kuboka, gwamu limwe lilabadzana ne limwe sekwa kwakabe kwalebgwa ndi Dafite nlume we Ndzimu. 25 Mataniya na Bhakubhukiya na Obhadiya na Meshulamu na Talimoni na Akubu bakabe bali balingilili be mikoba bakalinda matula. 26 Bose ibaba bakashinga mu tjibaka tja Joyakimu nkololo wa Jeshuwa, Jeshuwa ali nkololo wa Jozadaki ne mu tjibaka tja Nehemiya wakabe ali nlauli na Ezera we mpirisiti kakale ali nkwali.
Kupiwa Ndzimu makuma e Jerusalema
27 Kwakati kupiwa Ndzimu makuma e Jerusalema, Balevi bakashakwa bakatogwa mu magalo abo akathubukana kuti bazhebo kuwozana nzano we kupiwa Ndzimu makuma nge shatho ne kuboka nenge kumba bakabhata belidza zwilidzo zwinodang'wa dzisimbali ne dzikatara ne zwimwe zwilidzo bo zwinodang'wa dzilaya. 28 Bambi bakazhabo kudwa mu magalo akapoteleka Jerusalema, kudwa tjose mu mizi ye bathu bano dang'wa Banetofa, 29 ne kudwa ku Bhetegiligali ne kudwa mu Gebha ne kudwa mu Azimaveti, bakazwibakila mizi kupoteleka Jerusalema. 30 Kwakati Balevi ne bapirisiti basina kuzwitjenapadza bakadwapo betjenepadza bathu ne guma le Nzi nkulu.
31 Ndakathama kuti batungamili be Juda batathe pezhugwi kwe guma, apa makupo mabili e bambi kuti batibokele. Mmwe wakabe akafanila kuti ayendile mbeli ali mu luji ali pezhugwi kwe guma kuyendila ku nkoba unodang'wa Nkoba we Malala.
32 Hoshaya ne gwamu le batungamili be Juda bakabasala shule, 33 mu bali kwakabe kuna Azariya na Ezera na Meshulamu 34 na Juda na Bhenjamini na Shemaya na Jeremiya 35 ne bamwe bapirisiti bakabe belidza manyanga, Zakhariya nkololo wa Jonatani, Jonatani ali nkololo wa Shemaya, Shemaya ali nkololo wa Mataniya, Mataniya iye ali nkololo wa Mika, Mika ali nkololo wa Zakhuri, Zakhuri ali nkololo wa Asafa 36 ana makamu awe bo Shemaya na Azarele na Milalayi na Gilalayi na Maayi na Nethanele na Juda na Hanani belidza zwilidzo zwakabe zwalebgwa ndi Dafite nlume we Ndzimu. Bakabe bakatungamigwa ndi Ezera we nkwalili, 37 bakatathuka ku nkoba undang'wa we Nsenya, bakatambunuka bakanopinda pa matathilo e nzi wa Dafite bakasuphisa ng'umba ya Dafite bakanowila ku nkoba we Vula uku bhezhuba.
38 Gupo le bubili le bambi lakayendila kulingisana ne le kutanga lili kuli meshwe, imi ne limwe gwamu le bathu tikabasala shule tili pezhugwi kwe Thungamakole enodang'wa ye zwibeso zwe bhuba le moto kunoti ku Guma Bhabi, 39 ne pezhugwi kwe Nkoba wa Ifureimi nenge Nkoba we Jeshana, nenge Nkoba we Hwobe ne ku Thungamakole ya Hananeli ne ku Thungamakole ye bali zana kuyenda tjose ku Nkoba we Pkhwizi ngono bakaswika bema pa Nkoba we balindi. 40 Makupo iyawa mabili e bambi akabe eboka mu Ng'umba ye Ndzimu abe ndinabo ne gwamu le balauli, 41 gupo langu lakabe lina bapirisiti bo Eliyakimu na Maseya na Miniyamini na Mikaya na Eliyonayi na Zakhariya na Hananiya belidza manyanga abo. 42 Kakale lakabe lina Maseya na Shemaya na Eleazari na Uzi na Jehohanani na Malikija na Elamu na Ezeri. Bambi bakabe be mba bali pasi kwa Izirahiya. 43 Ngono mu zhuba ilelo bakadusa zwibhayilo zwikulu, bakashatha ngobe Ndzimu wakabe wapa shatho hwulu kwazo. Bana ne bakadzi bakabe bakashathabo. Ngono zhoba ye shatho ikahwika kule kule.
Kudusila Ng'umba ye Ndzimu
44 Mu zhuba ilelo kwakashalugwa balume banowotjengeta matula e zwipo ne e mitjelo ye kutanga ne e zwebugumi. Mu minda dzakapoteleka nzi bakabe bakafanila kuzhisa ku matula mitezho ku bapirisiti ne Balevi sekwa zwakabe zwishakiwa nge Nlayo ngoti Bajuta bakabe beshathisiwa ngekushinga kwe Balevi ne bapirisiti. 45 Bakathama nshingo we kutembezela Ndzimu ne we ku zwitjenapadza ngono bambi ne balingilili be mikoba naibo bakathamabo sekwa kwakalebgwa ndi Dafite ne nkololo uwe Solomoni. 46 Mu mazhuba a Dafite na Asafa kwakabe kuna batungamili be bambi kakale kuna njimbo dzakabe dziboka ne dzakabe dzikudza Ndzimu. 47 Ndizo mu mazhuba a Zerubhabeli na Nehemiya Baiziraela bose bakadusa mitezho ye mazhuba wose e bambi ne balingilili be mikoba. Bakabigilantome kwakabe kuli kwe Balevi, Balevi ibo bakabigilantome yakabe ili ye bakololo ba Aroni.
© Kalanga Bible © Bible Society of Botswana, 2008, 2018.