Lufu gwa Mushe
1 Ngono Mushe kayenda kudwa mu mabala e Moabu etathila ku Dombo le Nebo pezhugwi zhugwi kwe Pisiga pakalingisana ne Jerikho. Ngono Yahwe bakanlakidza shango yose kudwa pa Giliyadi kukweba bukule kunoti Dani, 2 Nafutali yose, shango ya Ifureimi na Manase, shango yose ye Juda bukule kunoti ku gungwa, 3 kulonga Negebu ne lubala gunolonga nkuku we Jerikho nzi nkulu we milala bukule kunoti ku Zowa. 4 Ipapo Yahwe bakabe beti kunli, “Iyeyi ndiyo shango yandakatuna kuna Abhurahama ne kuna Isaki ne kuna Jakubo nditi, ‘Ndowoyipa bana babo.’ Ndakuletja kuti uyibone nge mesho awo, koga awutowoyenda ikweno.” 5 Ndizo Mushe nlanda wa Yahwe kafa ikoko mu shango ye Moabu kuyendidzana ne dama la Yahwe. 6 Ngono Yahwe bakambiganya mu nkuku mu shango ye Moabu kulingisana ne Bhethipeori, koga akuna nthu unoziba paakatshigwa kuswikila mu zhuba lino. 7 Mushe wakabe ana makole ali zana lina makumi mabili (120) paakafa, mesho awe akabe asakatundubala ne matatabuko e mbili uwe akabe asatapudzika. 8 Ngono bathu be Iziraela bakalilila Mushe mazhuba ali makumi matatu (30) mu mabala e Moabu, ndizo mazhuba ekulilila Mushe kapela.
9 Ngono Joshuwa nkololo wa Nuni wakabe ali zhele meya ye butjenjedu ngoti Mushe wakabe abiga zwiazha zwizwe pezhugwi kukwe, ndizo bathu be Iziraela bakanhwa ngono bakathama sekwa kadwiwa Mushe ndi Yahwe. 10 Ngono akuzotongobe ne nlebesambeli mu Iziraela wakanga Mushe wakabe Yahwe benziba bakalingisana mesho, 11 akuna wakanga iye nge zwilakidzo zose nenge makaabadzo Yahwe abakantuma kuashinga ku shango Egipiti kuna Faro neku balanda babe bose neku shango iye yose, 12 nenge kwe simba lose lakasima nenge mishingo yose mikulu yakabangalala iyo Mushe yaakashinga mu mesho e Baiziraela bose.
© Kalanga Bible © Bible Society of Botswana, 2008, 2018.