Ndzimu unolaula zwimbeli
1 Hwililani woku imwi be ng'umba ya Jakubo,
imwi munodang'wa nge zina la Iziraela,
imwi munodwa mu lutshinga gwa Juda,
imwi munotuna nge zina la Yahwe,
mudana Ndzimu we Iziraela
koga musingaudane nge malebeswa nenge ndulamo.
2 Imwi munozwidana be nzi nkulu wakayengemala,
mubiga mu Ndzimu we Iziraela,
zina lawo ndi Yahwe Masimbawose.
3 “Zwithu zwe kutanga ndakazwileba ntolo,
ndakazwileba nge nlomo wangu athama kuti zwizibgwe,
ngono atjimbidza ndazwithama kuti zwishingikale.
4 Ngoti ndakaziba kuti amutohwa,
muna mitshibha yakawomelela se butale,
phazha dzenyu dzakawoma se phangula.
5 Ndakamubudza zwithu izwezwi ntolo,
zwakati zwisathu zwikashingikala azwileba ku muli,
ndizo wali makabe musingake mukati,
‘Ndzimu wedu we ifano wakazwithama,
ndzimu wedu wakabezhiwa
ne ndzimu wedu wakabumbiwa wakathama kuti zwibepo.’
6 “Makahwa ngekwe zwithu izwezwi,
ngwenu bonani zose izwezwi, amungazwidume kene?
Kudwa ngwenu kuyenda mbeli ndowomubudza zwithu zwitshwa,
zwithu zwakasumbikala zwamusingazibe.
7 Zwabumbiwa sangwenu, azwizobumbiwa ntolo,
amuzotongohwa nge kwazo tjimwe tjibaka kuzhe kwa nasi.
Ndizo amungati,
‘Ndabe ndizwiziba kale.’
8 Amuzotongohwa kene mukaziba,
kudwa ntolo zebe dzenyu dzakabe dzisakazhuka.
Ngoti ndoziba kuti una bupitipiti,
kudwa mu kuzwagwa kuko wakadang'wa mpanduki.
9 Ngekwe zina langu ndononoka kukugwadzila moyo,
ndagudziba bushongola gwangu kuti ndikudziwe,
ndagudziba kuti ndisitongo kulobesa.
10 Bona kuti ndakakubuyapidza,
koga kusi nge zila inobuyapidziwa siliva ndiyo,
ndakakulika nge moto we kudziila.
11 Ikoku ndokuthama ndikuzwithamila,
ndokuzwithamila,
ndingaletjedzelani zina langu lilengudziwa kene?
Gudzo langu andingalipe mmwe.
Iziraela inosunungugwa
12 “Iwe Jakubo, undihwilile,
iwe Iziraela wandakadana,
Imi ndiiye,
ndimi we kutanga ne we bupelo.
13 Gwangu luboko ndigo gwakateya thiwa dze shango,
luboko gwangu gwe luji ndigo gwakatambunudza kudzimu,
ha ndidana zokubungana.
14 “Kubunganani mose muteedze.
Ndiupi we midzimu yakabezhiwa wakalebela mbeli zwithu izwezwi?
Nshalugwa wa Yahwe unowothama mazwimisilo abo,
unowobhayana ne Bhabhiloni,
unowogwisana ne Bakhaladiya.
15 Imi, ndimi ndakuleba,
ee ndakandana.
Ndowonzhisa,
ngono unowobhudilila kose kwaanoyenda.
16 Sedzelani pejo nami muhwilile woku.
Kudwa mu kutangisa andizotongoleba zwikowa,
kudwa mu tjibaka tjakwakabe po ndakabe ndilipo.”
Ngono ngwenu She Yahwe bandituma nge meya yabo.
17 Yahwe, ndzutunuli wenyu, ibo Wakayengemala we Iziraela bakati,
“Ndimi Yahwe Ndzimu wenyu,
iwo unomudiya tjakamululwamila,
iwo unomutungamilila mu zila yamakafanila yenda.
18 Ha mungabe makahwilila milayo,
kunyalala kwenyu kobe kwakanga gwizi,
kubhudilila kwenyu kobe kwakanga mapundu e vula ye gungwa.
19 Bana benyu banobe belizana ne nsetje,
ludzi gwenyu gobe gunga mabgwana e nsetje,
zina labo labe lisingake likapela
kene kutshumugwa mbeli kwangu.”
20 Bhudani mu Bhabhiloni,
tizhani mudwe mu Bakhaladiya.
Ikoku mukuzibise nge mpululu we kushatha,
mukuzibise ku midzibo ye shango, muti,
“Yahwe badzutunula nlanda wabo Jakubo.”
21 Abazotongobhakhwa nge nyota pabakabatungamila mu tjilambanyika,
bakathama kuti vula iwunge idwa mu shongwe,
bakaphatula shongwe
ngono vula ikapiphika idwa mu shongwe.
22 “Akuna kunyalala mu babi.” Koleba Yahwe.
© Kalanga Bible © Bible Society of Botswana, 2008, 2018.