Jesu unolukigwa gwanga
(Mako 14:1-2Luke 22:1-2Johani 11:45-53)1 Jesu kati aleba zwithu zose izwezwi, kadwa badiyiwa babe kati, 2 “Sekwa munoziba kuti Nzano we Kupinda pezhugwi wasaligwa nge mazhuba mabili, ngono Nkololo we Nthu unowolongwa mu maboko a ibabo banowombambula.”
3 Ipapo bapirisiti bakulu ne bakulu be Bajuta bakakubungana mu magalo e Ntungamili we bapirisiti wakabe edang'wa Kaifasi, 4 ngono bakalangana kusunga Jesu nge kwakasumbikala kuti bambulaye. 5 Koga bakati, “Kusi pakati kwe nzano, ngobe kungamuka zhoba pakati kwe bathu.”
Jesu ezhodziwa ku Bhetani
(Mako 14:3-9Johani 12:1-8)6 Jesu kati ali mu Bhetani mu ng'umba ya Simoni wakatongo gwala mapele, 7 mmwe nkadzi kazha kunli ana tjilongo tjakathamiwa nge bgwe linoyi alabhasita tjina mafuta e themba ipezhugwi kaatebulila mu nsholo wa Jesu ali gele pa tafuli eja. 8 Badiyiwa bakati bebona ikoko bakagwadzamoyo, ngono bakabhuzwa beti, “Mafuta anozanisigwani iyawa? 9 Mafuta iyawa abe angatengesiwa nge themba ipezhugwi kwazo, ngono mari kapiwa bashayi.”
10 Jesu kati aziba ikoku, kati ku bali, “Ini mudziyidza nkadzi iwoyu? Washinga tjithu tjakanaka mundili. 11 Bashayi munabo misi yose, koga imi amutowobe nami misi yose. 12 Kudila mafuta iyawa mu mbili wangu, wakushinga kundilulwamisila mbiganyo yangu. 13 Ndolebesa ndoti kumuli, kumwe ne kumwe kunowosumikigwa Ndebo mbuya iyeyi mu shango yose, tjashingwa nge nkadzi iwoyu tjowolebgwabo, kuti libe gumbuludzo nge kukwe.”
Judasi eduma kutengesa Jesu
(Mako 14:10-11Luke 22:3-6)14 Ipapo mmwe we bali gumi lina babili, wakabe edang'wa Judasi Isikariyoti, kayenda ku bapirisiti bakulu ngono 15 kabhuzwa eti, “Mowondipani ha ndingamupa iye?” Ndizo bakanlipa mari e siliva ali makumi matatu. 16 Kudwa ipapo tjose Judasi kashaka tjibaka tjaangabapa Jesu nditjo.
Jesu eja zojiwa zwe Nzano we Kupinda pezhugwi ne badiyiwa babe
(Mako 14:12-21Luke 22:7-13, Luke 21-23Johani 13:21-30)17 Mu zhuba le kutanga le Nzano we Tjiwunga* tjisina mbidzo badiyiwa bakazha kuna Jesu bakambhuzwa beti, “Moshaka kuti timululwamisile ngayi kujila zojiwa zwe Nzano we Kupinda pezhugwi?”
18 Kashandula eti, “Yendani mungine mu nzi nkulu, mowoswika ku mmwe nlume, mumbudze muti, ‘N'diyi bakati, tjibaka tjangu tjasedzela. Ndowojila zojiwa zwe Nzano we Kupinda pezhugwi ne badiyiwa bangu ku ng'umba iyo.’ ”
19 Ndizo badiyiwa bakashinga sekwa balayigwa ndi Jesu, bakalulwamisa zojiwa zwe Kupinda pezhugwi.
20 Kukati madekwana, Jesu kagala pa tafuli eja ana badiyiwa bali gumi lina babili. 21 Bakati beja kati ku bali, “Ndolebesa ndoti, mmwe wenyu unowondiwonga.”
22 Bakazhala buyendasi, ngono mmwe ne mmwe wabo kati kunli, “Apa ndimi kene She?”
23 Jesu kashandula eti, “Iye unoseba nami mu ndilo ndiye unowondiwonga. 24 Nkololo we Nthu unowofa sekwa kwakakwagwa nge kukwe. Koga Yee mme wee! Wapalala iwe nlume unowonga Nkololo we Nthu! Kwabe kuyita ha nlume iwoyo akabe asagala azwagwa.”
25 Ipapo Judasi iye wakan'wonga kati, “N'diyi, apa ndimi kene?”
Jesu kashandula eti, “Waleba.”
Tjilayilo tja She
(Mako 14:22-26Luke 22:14-201 Bakorinta 11:23-25)26 Bakati batjaja, Jesu katola tjiwunga, katjikombolela, katjipemula katjipa badiyiwa babe eti, “Tolani muje, oku mbili wangu.”
27 Katola bhepe le nkumbi we zhambi, ngono kaukombolela kabapa ilo eti, “Ing'wani mulili mose. 28 Oku malopa angu e tjidumano anotebuligwa banji mu kuzwiibhatigwa matjinyo. 29 Ndomubudza nditi, anditowong'wa kakale kwe ntjelo iwoyu we nzhambi kuswikila zhuba landinowoung'wa butshwa namwi mu bushe gwa Tate bangu.”
30 Bakati basinomba lumbo gunokudza Ndzimu, bakabhuda bakayenda ku Dombo le Mitoba.
Jesu unoleba kuzwilandugwa kukwe ndi Pita
(Mako 14:27-31Luke 22:31-34Johani 13:36-38)31 Ipapo Jesu kabadwa kati, “Busiku igogu mowopalala mose nge kwangu, ngobe kwakakwagwa kuyi, ‘Ndowobulaya nlisi, ngono pkhwizi dze danga dzowopalala.’ 32 Koga ha ndamusiwa ndowoyenda mbeli kwenyu ku Galili.”
33 Pita kashandula eti, “Kene bose bepalala nge kwenyu, imi andingamusiye.”
34 Jesu kashandula eti, “Ndolebesa ndoti, mu busiku igo igogu, gukurume lowoti lisathu likalila, unowondizwilandula katatu.”
35 Koga Pita kalebeleka eti, “Imi andingamuzwilandule bukulu ndingafa namwi.”
Ngono bose bamwe badiyiwa bakalebabo sa ikoko.
Jesu etembezela ku Getsemane
(Mako 14:32-42Luke 22:39-46)
36 Ipapo Jesu kayenda ne badiyiwa babe pathu panodang'wa Getsemane, ngono kati ku bali, “Galani ipapa imi nditjayenda apaje kunotembezela.” 37 Wakatola Pita ne bakololo babili ba Zebhedi kayenda nabo, ngono kangina buyendasi ne kudziyidzika kukulu. 38 Ipapo kati ku bali, “Meya yangu izhele buyendasi kukulu kwandingafa. Salani ipapa mulinde nami.”
39 Ngono kapindila mbejana kawila pasi nge buso katembezela eti, “Tate bangu ha kutubuka, bhepe ileli le kudziyidzika ngalindipinde. Nenguba kwakajalo, musiyite kuda kwangu, itani kuda kwenyu.”
40 Ngono kabgwilila ku badiyiwa babe, ngono kawana bakayizela, ndizo kabhuzwa Pita eti, “Apa mabe musingake mukatubula kulinda nami awara ing'ompela kene? 41 Lindani mutembezele, kuti ndizo musingine mu kulikwa. Meya inoda tjose, koga nyama inokong'wa.”
42 Kayenda gwe bubili katembezela eti, “Tate bangu, ha kusingatubuke kuti bhepe ileli lekudziyidzika lindipinde, ndisaling'wa, kuda kwenyu ngakushingikale.” 43 Kati ebuya kakale kabawana bakayizela, ngobe mesho abo akabe elema nge hwope.
44 Ngono kabasiya kayenda kakale kanotembezela gwe butatu eleba matama iwo zwawo. 45 Kudwapo kazha ku badiyiwa babe kati ku bali, “Apa mutjakayizela munyaluluka kene? Lingani, tjibaka tjasedzela, ngono Nkololo we Nthu unowongegwa mu maboko e batjinyi. 46 Milikani, ngatiyendeni, ngobe n'wongi wangu wabe pejo.”
Kusungwa kwa Jesu
(Mako 14:43-50Luke 22:47-53Johani 18:3-12)47 Jesu kati atjalebeleka, Judasi, mmwe we bali gumi lina babili, kaswika. Wakabe ana mbunga nkulu we bathu bakasenga mathumo ne dziswimbo, batumwa nge bapirisiti bakulu ne bakulu be Bajuta. 48 N'wongi wakabe abapa tjilakidzo eti, “Iye wandinowoputa ndiye, mumbhate.”
49 Judasi kayenda pana Jesu tjinyolotjo kati kunli, “Dumilani N'diyi!” Ngono kamputa.
50 Jesu kati kunli, “Nzwalani, ini uli ipapa?”
Ipapo balume bakasedzela bakabhata Jesu, bakansunga. 51 Mmwe we bakabe bana Jesu kashomola bukanu gugwe nge luboko, katema nlanda we mpirisiti nkulu kanthubula zebe. 52 Jesu kati kunli, “Bgwiliza bukanu gugo mu magalo ago, ngobe bose banoshingisa bukanu banowofa nge bukanu. 53 Autokumbula kuti ndingakumbila kuna tate bangu, tjinyolotjo bakandipa miphatho ye ngwa dze batumwa be kudzimu inopinda gumi lina mibili kene? 54 Matama e hwalo dze Ndzimu angakowoshingikala tjini kene anoti, kwakafanila shingikala ndi iyeyo zila.”
55 Ipapo Jesu kati ku mbunga iwoyu we bathu, “Apa mabhuda se munoyenda ku tjigebeng'a kene, makasenga makanu ne swimbo kuwonditola? Misi yose ndakagala mu Ng'umba ye Ndzimu ndidiya, koga mukasindisunge. 56 Koga kose ikoku koshingikala kuti ndizo matama akakwagwa nge balebesambeli asiwile pasi.”
Ipapo badiyiwa bose bakanfupatila bakatizha.
Jesu ali mbeli kwe makulukota
(Mako 14:53-65Luke 22:54-55, Luke 63-71Johani 18:13-14, Johani 19-24)57 Ibabo bakabe basunga Jesu bakansa kuna Kaifasi Ntungamili we bapirisiti kwakabe kwakakubunganila badiyi be nlayo ne bakulu be Bajuta. 58 Ngono Pita kantobela ali thambgwana kunoti mu nsha we Ntungamili we bapirisiti. Kangina kagala pasi ne balindi kubona tjinowoshingikala ku bupelo. 59 Bapirisiti banolaula ne makulukota wose e Bajuta bakabe beshaka butendeki gwe manyepkhwa gungasungisa Jesu kuti abulawe, 60 koga bakasiguwane, nenguba batendeki be manyepkhwa banjinji bakazha. Gwe bupelo kukazha balume babili, 61 ngono bakati, “Nlume iwoyu wakati, ‘Ndingakolomola Ng'umba ye Ndzimu abuya agubaka kakale mu mazhuba matatu.’ ”
62 Ipapo Ntungamili we bapirisiti kamilika kati kuna Jesu, “Apa auna dabilo kene? Batendeki ibaba bakatini nge kuko?” 63 Koga Jesu kanyalala. Ntungamili we bapirisiti kati kunli, “Ndokutunisa nge Ndzimu unotjila nditi, Utibudze kene uli iye Mesiya, iye Nkololo we Ndzimu.”
64 Jesu kati, “Waleba. Koga ndomubudza nditi, kudwapo mowobona Nkololo we Nthu ali gele ku luboko gwe luji gwe Masimba, ezha mu shango ali mu makole e kudzimu.”
65 Ipapo Ntungamili we bapirisiti kapalula hazu iye eti, “Watuka Ndzimu! Titjashakilani batendeki bamwe kakale? Bonani, ngwenu mazwihwigwa kutuka Ndzimu kukwe. 66 Moipedza tjini?”
Bakashandula beti, “Wakafanila kufa.”
67 Ipapo bakanthwila mate mu buso, bakanloba. Bamwe bakampkhwaula 68 beti, “Utibudze iwe Mesiya. Ndiani wakuloba?”
Pita unozwilandula Jesu
(Mako 14:66-72Luke 22:56-62Johani 18:15-18, Johani 25-27)69 Pita wakabe ali gele mu nsha, ngono kukazha nlandakadzi kati kunli, “Nawebo wabe una Jesu we Galili.”
70 Koga kalandula mbeli kwabo eti, “Anditoziba tjaunoleba nge kwatjo.” 71 Kati ebhudila kuzhe ku nkoba kabong'wa nge mmwe nlandakadzi, kakale kadwa bathu ba ipapo kati, “Nlume iwoyu wabe ana Jesu we Nazareta.”
72 Kalandula kakale etuna eti, “Anditoziba nlume iwoyu!”
73 Shule kwe tjibaka tjifupi, bakabe bali mile ipapo bakayenda kuna Pita ngono bakati kunli, “Malebeswa tjose u mmwe wabo, ngobe lebeleka kuko kolakidza kujalo!”
74 Ipapo katangisa kuzwilonga bhiso kakale etukana nabo eti, “Anditoziba nlume iwoyu!”
Tjinyolotjo gukurume likalila. 75 Ipapo Pita kakumbula dama lakabe lalebgwa ndi Jesu eti, “Gukurume lowoti lisathu likalila unowobe wandizwilandula katatu.” Ndizo kabhudila kuzhe kalila kwazo.
© Kalanga Bible © Bible Society of Botswana, 2008, 2018.