1 Ngwa pakati kwe nsha wa Saulo ne nsha wa Dafite yakatola tjibaka tjilefu, ngono Dafite esimila mbeli, simba le nsha wa Saulo likatapudzika.
Bakololo ba Dafite
2 Aba ndibo bakololo ba Dafite baakazwaligwa ku Heburoni: Mbano iye ndi Amunoni mmeyabe bali Ahinoami be Njezerele, 3 we bubili ndi Khileyabu mmeyabe bali Abigaile tjilikadzi ya Nabali we N'karimeli, we butatu ndi Abusalomu nkololo wa Maaka nkololokadzi wa Talimayi mambo we Geshuri, 4 we bunna ndi Adonija mmeyabe bali Hagiti, we bushanu ali Shefatiya iye mmeyabe bali Abitali, 5 we butathatu ndi Itiremu we nkadzi wa Dafite Egila. Ibaba ndibo bakazwaligwa Dafite mu Heburoni.
Abineri unozwibhatshanya na Dafite
6 Ngwa yakati yakalobana pakati kwe nsha wa Saulo ne wa Dafite, Abineri wakabe esimisa mamo awe mu nsha wa Saulo. 7 Ipapo Saulo wakabe ana mmwe nkadzi ntukunu zina lile liyi Rizipa nkololokadzi wa Aiya. Ngono Ishibosheti kati kuna Abineri, “Ini wawalilana ne nkadzi wa tate bangu kene?” 8 Abineri kazhala bushongola ngekwe matama a Ishibosheti ngono kabe eti, “Apa ndi nsholo we mbgwa ye Juda kene? Nasi ndothamila lubu be nsha wa tate babo Saulo ne hama dzidze ne bazwalani babe, kakale nawe andizokulonga mu maboko a Dafite, ngono unonditilika nlandu ngekwe nkadzi iwoyu. 9 Atshene Ndzimu ungathamila Abineri saikoko ne kupinda ha ndisingake athamila Dafite tjaakagadziwabgwe ndi Yahwe ngotuna, 10 kufulusa bushe kudwa mu nsha wa Saulo, nekubiga tjigalo tje bushe tja Dafite mu Iziraela ne mu Juda, kudwa mu Dani kunoti ku Bheerisheba.” 11 Ngono Ishibosheti kasidabile Abineri nge limwe dama, ngobe wakabe entja.
12 Ndizo Abineri katuma batumwa kuna Dafite kuti banombhuzwa bati, “Shango ngeyaani kene? Thama tjidumano tjitjo nami, ngono ndowokubhatsha kushandulila Iziraela yose ku kuli.” 13 Dafite kabe eti, “Kwakalulwama, ndowothama tjidumano nawe, koga ndokumbila tjithu tjing'ompela mukuli, aungabone buso gwangu kuzhe kwe ungati ha uzha kuwondibona ukazha na Mikhali nkololokadzi wa Saulo.” 14 Ipapo Dafite katuma batumwa kuna Ishibosheti nkololo wa Saulo kunon'dwa beti, “Undipe nkadzi wangu Mikhali wandakazwibigilidzila nge zwikanda zwa mbeli zwe Bafilisitiya zwili zana (100).” 15 Ndizo Ishibosheti kadusa ndaulo kuti atogwe mu nlume uwe Palitiele nkololo wa Laishi. 16 Ipapo nlume uwe kayenda naye, kantobela elila zila yose kunoti ku Bhahurimu. Ipapo Abineri kandwa kati, “Bgwilila kanyi!” Kabe ebgwilila.
17 Abineri kalebeleka ne batungamili be Iziraela kati, “Kwetjinga kwamakashaka Dafite kuti abe mambo wenyu, 18 ngono ngwenu mukushingikadze, ngobe Yahwe bakagadzabgwe Dafite beti, ‘Ndowoshingisa nlanda wangu Dafite kuangula bathu bangu Baiziraela mu luboko gwe Bafilisitiya ne mu zwita zwabo zose.’ ” 19 Abineri kalebeleka ne Babhenjamini njiso dzakalingisana, kabuya kayenda ku Heburoni kanobudza Dafite zose zwakabe Iziraela ne nsha wose wa Bhenjamini beshaka kuzwithama.
20 Kwakati Abineri eswika ne balume bali makumi mabili kuna Dafite ku Heburoni, Dafite kathamila Abineri ne balume baakabe anabo nzano. 21 Abineri kadwa Dafite kati, “Imani ndimilike ndinokubunganyila tetshi wangu Mambo Iziraela yose, kuti bathame tjidumano namwi, kuti ndizo mubuse kose kunowobe kuyemugwa nge moyo wenyu.” Ndizo Dafite kasunungula Abineri, ngono kayenda nge mbakiso.
Abineri unobulawa
22 Tjinyolotjo kukaswika babhayani ba Dafite bana Joabu bedwa kutapa, bezha ne thundu njinji. Koga Abineri wakabe asitjina Dafite mu Heburoni, ngobe Dafite wakabe ansunungula ayenda nge mbakiso. 23 Kwakati Joabu ne babhayani bose baakabe anabo beswika, Joabu kabudziwa kuti Abineri nkololo wa Neri wabe azha kuna mambo, ngono mambo bansunungula wayenda nge mbakiso. 24 Ipapo Joabu kayenda kuna mambo kabadwa kati, “Apa mathamani kene? Abineri wazha kumuli, hwutini mansunungula, titjowombona ngayi? 25 Moziba kuti Abineri nkololo wa Neri wabe azha kuwomutjengela, nekuti azibe njendo dzenyu abuye azibe zose zwamunoshinga.”
26 Kwakati Joabu edwa pana Dafite, katuma batumwa kulonda Abineri, ngono bakanshandusa pa tshima le Sira, koga Dafite kabe asinga zibe nge kwako. 27 Kwakati Abineri ashandusigwa ku Heburoni, Joabu kantolela ntome mukati kwe nkoba se unonolebeleka naye mu ikohwa, ikoko kambhaya mu ntumbu kafa, efila kutebula malopa a Asahele, nnung'una uwe. 28 Kwati shule ha Dafite ehwa nge kwako, kabe eti, “Imi ne mbuso wangu atina nlandu nge kusingapele mbeli kwa Yahwe, ngekwe malopa a Abineri nkololo wa Neri. 29 Nlandu ngauwile mu nsholo wa Joabu ne mu nsha wa tate babe wose, kakale mu nsha wa Joabu kusitongo shayika una mapele , kene una bugwele gwe ganda kene tjilema tjinodozola, kene unobulawa nge thumo, kene unosheta zojiwa!” 30 Ndizo Joabu ne nnung'una uwe Abishayi bakabulaya Abineri, ngobe akabulaya nnung'una wabo Asahele mu ngwa ku Gibiyoni.
Mbiganyo ya Abineri
31 Ipapo Dafite kadwa Joabu ne bathu bose baakabe anabo kati, “Palulani zwiambalo zwenyu, muambale jila le saka mulilile Abineri.” Mambo Dafite kasala shule kwe itumbu. 32 Bakabiganya Abineri ku Heburoni. Mambo bakamilidza hwi labo bakalila ku ikumbu tja Abineri, ne bathu bose bakalila. 33 Mambo bakashoba lumbo gwe tjililo tja Abineri beti,
“Apa Abineri ungafa se tjilengwe kene?
34 Maboko awo akabe asakasungwa
makumbo awo akabe asimu dziketani,
wakafa se nthu wabulawa nge zwigebenga!”
Ngono bathu bose bakanlilila kakale.
35 Ndizo kukazha bathu bose kukumbila Dafite kuti aje zojiwa kutji masikati, ngono Dafite katuna kati, “Ndzimu undilobe upaphulula andingaja zojiwa kene tjimwe koga zhuba lisathu likangina!” 36 Kukati bathu bose basinoziba ngekwako, kukabashathisa, se zwithu zose mambo zwabakathama zwishathisa bathu bose. 37 Ipapo bathu bose ne Iziraela yose bakaziba zhuba ilelo kuti mambo bakabe basina gobe mu lufu gwa Abineri nkololo wa Neri. 38 Ndizo mambo bakadwa balanda babo bakati, “Apa amutoziba kuti nkololo we bushe kakale ili nthu nkulukulu wafa nasi mu Iziraela? 39 Nasi andina simba, nakuto ndili mambo wakazhodziwa, balume ibaba, bakololo ba Zeruya, banondikulila. Yahwe ngababgwilizile nshingi we mbipo kuyendidzana nge mbipo iye.”
© Kalanga Bible © Bible Society of Botswana, 2008, 2018.