Bamediya banopkhwanya Bhabhiloni
1 Yahwe bakati,
“Bonani, ndowodzonga meya ye nkolomodzi
kubhayana ne Bhabhiloni ne bagali bayo.
2 Ndowotumila bawulusi ku Bhabhiloni
ngono banowowulusa Khaladiya,
banowosiya shango yayo isina tjimwe,
abebhayana nayo kudwa mbizho dzose
mu zhuba le mbatsha.
3 Mposi ngaasipete dati lile,
ngaasime akaambala zwiambalo zwizwe zwe ngwa.
Musibe ne hanya ngekwe bazhuzha babo,
mulobese ngwa yayo tjoselele.
4 Banowokandalala bakafa mu shango ye Bakhaladiya,
bakakubala kwazo mu dzizila dzayo.
5 Ngoti Iziraela ne Juda adzizofupatigwa,
nge Ndzimu wadzo, Yahwe Masimbawose,
koga shango ye Bakhaladiya izhele nlandu,
mbeli kwe Nyengemali we Iziraela.
6 “Tizhani mu Bhabhiloni!
Nthu mmwe ne mmwe ngaatjidze butjilo gugwe!
Musidwe mulobesiwa ngekwe tjibi tjayo.
Tjibaka tje kubgwilizila kwa Yahwe,
banon'lipa nge kwakan'fanila.
7 Bhabhiloni yakabe ili bhepe le golide mu tjiyazha tja Yahwe,
ithama kuti shango yose ilaladze.
Shango yakang'wa nkumbi wayo we zhambi,
ndizo ngwenu batjishangana misholo.
8 Tjinyolotjo Bhabhiloni inowowa ikakolomoka.
Muililileni!
Tolani nyonje muzhodze zogwadza zwayo,
pamwe swiyo ingapola.
9 “Takabe tititolapa Bhabhiloni,
ngono aizolapika.
Muifupatile, ngatiyendeni mmwe ne mmwe ku shango iye,
ngoti sumikiliso yayo yaswika kudzimu,
inoswika ne ku makole dumbu.
10 “Yahwe batigwila,
izhani ngati kulebeni mu Ziyoni,
nshingo wa Yahwe Ndzimu wedu.
11 “Kuswani misebe,
Tolani zwivikisi!
Yahwe badzonga bomambo be Mediya,
ngoti balongolosa kukolomola Bhabhiloni.
Yahwe banowobgwilizila,
bebgwilizila ngekwe Ng'umba yabo.
12 Milidzani tjilakidzo makatjilingisanya ne makuma e Bhabhiloni!
Simisani balingi,
misani zubuyanana balindi,
lulwamisani balalili!
Yahwe banowoshinga ndongoloso yabo,
tjabaleba ngekwe bagali be Bhabhiloni!
13 Imwi munogala hwunde ne vula,
imwi makafuma thundu,
bhelelo lenyu laswika,
tjibaka tjenyu kuti mubulawe.
14 Yahwe Masimbawose bakatuna nge kwabo beti,
‘Nge malebeswa ndowomuzhadza nge bathu banji se phashu,
ngono banowomilidza nsindo we kumukunda.’
15 “Ndibo bakathama shango nge simba labo,
bakagadzika lubumbo nge butjenjedu gwabo,
nenge hwisiso yabo bakatalabudza zhuzhugwi.
16 Abedusa hwi labo vula inodidima ku zhuzhugwi,
banothama kuti makole amilidze kudwa phelelo dze shango.
Banotumila lupenyo ne vula,
bakadusa phepo mu matula abo.
17 “Nthu mmwe ne mmwe tjilengwe aasina luzibo,
nthuli we golide mmwe ne mmwe unobhatisiwa shoni nge midzimu iye yakabezhiwa,
ngoti zwifano zwizwe manyepkhwa,
kakale akuna meya mu zwili.
18 Azwina nshingo, mishingo ye madado,
mu tjibaka tje kulobgwa shamu kwabo zowoloba.
19 Iye waali gobe la Jakubo aazojalo,
ngoti ndiye wakabumba zwithu zose,
Iziraela ludzi gwe thaka iye,
Yahwe Masimbawose ndilo zina labo.
20 “U hamuli yangu ne tjibhayano tjangu tje ngwa,
ndoshingisa iwe kupkhwanya zwitjaba kube zwitibhutibhu,
ndoshingisa iwe kokolomola mibuso,
21 ndoshingisa iwe kupkhwanya koloyi dze ngwa ne batathi badzo kube zwitibhutibhu,
22 ndoshingisa iwe kupkhwanya bakadzi ne balume,
ndoshingisa iwe kupkhwanya bathuntana ne batjetjana,
ndoshingisa iwe kupkhwanya bazhuzha ne baanadi,
23 ndoshingisa iwe kupkhwanya balisi ne ngubi dzabo,
ndoshingisa iwe kupkhwanya balauli ne balauli be babhayani.
24 “Mbeli kuko, ndowobgwilizila Bhabhiloni ne bagali bose be Khaladiya bubi gose gwabathamila Ziyoni,” kojalo Yahwe.
25 “Bona ndobhayana nawe, iwe dombo le nkolomodzi,
iwe unokolomola shango yose,
kojalo Yahwe.Ndowotambunudza luboko gwangu kubhayana nawe,
akukunguludzila pasi kudwa kuthweswi,
akuthama dombo lakatshwa.
26 Akuna bgwe linowotogwa mukuli kube bgwe linotambunudza,
kene bgwe le nteyo,
ngoti unowobe wathukudzigwa tjatjose,
koleba Yahwe.27 Milidzani tjilakidzo mu shango!
Lidzani lunyanga pakati kwe zwitjaba!
Lulwamisani zwitjaba kubhayana nayo,
danani mibuso iyeyi kubhayana nayo,
Ararati ne Minni ne Ashikenazi.
Bigani balauli be ngwa kubhayana nayo,
lulwamisani mbizi njinji se phashu.
28 Lulwamisani zwitjaba kugwa nayo,
bomambo be Mediya,
ne balauli babo ne makulukota abo wose,
ne shango dzose dzabanobusa.
29 Shango inotetema ili mu zogwadza,
ngoti ndongoloso ya Yahwe kubhayana ne Bhabhiloni imile yakajalo,
kuthama kuti shango ye Bhabhiloni ithukudzike ibe isina bagali.
30 Babhayani be Bhabhiloni bamisa kugwa,
bagele mu matizhilo abo,
simba labo lapela,
botjinga bakadzi,
magalo ayo apisiwa nge moto,
matendele e butale avung'wa.
31 Nlabuki mmwe unolabuka kunoshangamidza mmwe,
ne ntumwa mmwe unonoshangamidza mmwe,
kunobudza mambo we Bhabhiloni,
kuti nzi nkulu watogwa mbizho dzose,
32 ne panotjulukwa gwizi kwazhaligwa,
ne mashanga e madziba apisiwa,
ne babhayani bapaluka moyo.
33 Ngoti Yahwe Masimbawose Ndzimu we Iziraela bakati,
Nkololokadzi we Bhabhiloni unonga lutombo,
nge tjibaka tjainokanyangiwa,
koga nge tjibaka tjifutshwanana,
tjibaka tje kuvuna kukwe tjowon'swikila.
34 “Nebukadineza mambo we Bhabhiloni watija
watizwiyilidza,
watithama tikabe jegwa lisina tjimwe.
Se bhophona watimidza,
wazhadza ntumbu uwe naswi,
katidusa mu bugalo gwedu gwakanaka
ngono katitata.
35 Atshene mbatsha dzatakathamigwa dziwile Bhabhiloni,”
kojalo bagali be Ziyoni.
“Atshene lopa ledu litebukile ibabo bagali be Khaladiya,”
kojalo Jerusalema.
36 Ndizo Yahwe bakati,
“Bonani, ndowoteedza ndebo yenyu ha bgwilizila nge kwenyu.
Ndowowomeledza gungwa lile,
athama kuti nsenya uwe upkhwe,
37 Bhabhiloni inowobe duluthulu le dongo,
bugalo gwe phungubgwe,
tjithu tjinopalusa moyo ne tje madado,
kusina ndodwa ne n'gali.
38 “Banowobomba bose se shumba tukununu,
banowobunga se shumbana.
39 Koga banowoti kuyemula kwabo kwakula, ndowolulwamisa nzano,
athama kuti balaladze,
kuti ndizo bamimile ne tjiseko,
ipapo baizelele tjatjose basingotjamuka,”
kojalo Yahwe.40 “Ndowobadelusa se pkhwizana dzinonobhayiwa,
se nyundo ne mbudzi ndume.
41 “Bhabhiloni yakundiwa seni,
gudzo le shango yose latogwa!
Bhabhiloni yabe tjithu
tjinopalusa moyo ku zwitjaba!
42 Gungwa gwamilidza gukafukidza Bhabhiloni,
wafukidziwa nge mapundu e vula.
43 Mizi mikulu yayo yathukudzika,
yawomelela yabe shango ye tjilambanyika,
shango isina ndodwa ne unogala muili,
isina ndodwa ne nthu unoyenda muili.
44 Ndowoloba shamu Bheli mu Bhabhiloni,
adusa mu nlomo wayo tjayakamidza.
Zwitjaba azwitjowokubunganila ku ili,
guma le Bhabhiloni lawa.
45 “Bhudani muili imwi bathu bangu!
Mmwe ne mmwe ngaatjidze butjilo gugwe,
tizhani kugwadzamoyo kukulu kwa Yahwe!
46 Mimoyo yenyu ngaisitimbame, musitje,
ngekwe makwayi amunohwa mu shango,
ili makwayi gole ileli,
ne mamwe gole linozha,
nenge kuti kuna mbatsha mu shango,
kene babusi bemukilana.
47 “Ndizo ke bonani, mazhuba aswika,
pandinowoloba shamu zwifano zwe Bhabhiloni,
shango iye yose inowobhakhwa nge shoni,
ne babulawa banowokandalala pakati kwayo.
48 Ipapo zhuzhugwi ne shango ne tjimwe ne tjimwe tjimuzwili
zowomimilila Bhabhiloni nge kushatha,
ngoti kudwa ku bunandzwa,
bakolomoli banowozha bakabhayana nayo,”
kojalo Yahwe.49 “Bhabhiloni yakafanila kuwa ngekwe Baiziraela bayakabulaya,
bakabulawa mu shango yose naibo bakawa ngekwe Bhabhiloni.
50 Imwi mapudzumuka mu thumo,
tizhani sinonokeni!
Kumbulani Yahwe muli ku shango ikulekule,
kumbulani Jerusalema,”
51 “Talengudziwa,
ngoti tatukiwa,
ngono shoni dzakatiambala,
ngoti bataya bangina,
mu bugalo gwakayengemala gwe Ng'umba ya Yahwe.”
52 “Koga mazhuba aswika, kojalo Yahwe,
pandinowoloba shamu zwifano zwayo,
ne mu shango yayo yose,
bakakubala banowogomela.
53 Nenguba Bhabhiloni iswika ku makole,
nenguba ikudza matizhilo ayo,
ndowotumila bakolomoli kubhayana nayo,
koleba Yahwe.54 Nsindo we tjililo unodwa mu Bhabhiloni,
nsindo we golomodzo gulugulu,
unodwa mu shango ye Bakhaladiya!
55 Ngoti Yahwe banokolomola Bhabhiloni,
banowonyaladza zhoba ye guwo layo.
Mapundu e vula dzabo anosuma se vula njinji,
nsindo we mahwi abo wakamilidzikila pezhugwi,
56 ngoti nkolomodzi wazha ku ili,
unobhayana ne Bhabhiloni,
babhayani bayo batogwa,
matati abo avung'wa abe zwitibhutibhu,
ngoti Yahwe ba Ndzimu unobgwilizila,
banowobgwilizila nge buzhalo.
57 Ndowothama makulukota ayo ne balume bayo bakatjenjela kuti balaladze,
balauli ne makombgwa ne babhayani naibobo,
banowoizelela tjatjose bakasitjamuke,
kojalo Mambo ibo zina labo linoyi Yahwe Masimbawose.
58 Yahwe Masimbawose bakati,
‘Guma bhabi le Bhabhiloni,
lowopkhwanyiwa mavu alo akalizalizanyiwa pasi,
mikoba yayo milefulefu,
inowopisiwa nge moto.
Bathu banozwinyadzila suli,
zwitjaba zoshingila masimba ndilashe koga.’ ”
Jeremiya unoyisa ndayidzo ku Bhabhiloni
59 Dama la Jeremiya nlebesambeli laakadwa Seraya nkololo wa Neriya, nkololo wa Mahiseya tjibaka tjaakayenda na Zedekiya mambo we Juda ku Bhabhiloni, mu gole le bunna le mbuso uwe. Seraya wakabe ali ntungamili we bukotokelo. 60 Jeremiya wakakwala mu lukwalo mbatsha dzose dzakafanila kuwila Bhabhiloni, matama wose iyawa akakwagwa ngekwe Bhabhiloni. 61 Ngono Jeremiya wakadwa Seraya kati, “Auswika ku Bhabhiloni, ubone kuti unobala matama iyawa wose, 62 uti, ‘Imwi Yahwe, makati mowolobesa pathu ipapa, kuti ndizo kushaye nthu kene phuka inowogala ipapa, kowobe kwakathukudzika tjatjose.’ 63 Ha wapedza bala lukwalo igogu, usungile bgwe mu guli ube uguposela ku Yufuratesi. 64 Ipapo uti, ‘Saikoku Bhabhiloni inong'wila ikasitjabhude ngoti mbatsha dzoiwila ne bathu bayo banowabo.’ ”
Matama a Jeremiya anopelela ipapa.
© Kalanga Bible © Bible Society of Botswana, 2008, 2018.