Ndzimu banowoloba Bhabhiloni
1 Mbono yakabongwa ndi Isaya nkololo wa Amozi ngekwe Bhabhiloni.
2 Milidza tjilakidzo pezhugwi kwe dombo lakaambuka,
ubamimilile kwazo;
ubawebe nge tjiazha kuti bangine
nge mikoba ye banokudziwa.
3 Imi nge kwangu ndadwa bakayengemala bangu,
ndadana babhayani bangu bakasima kuti bashingikadze kugwadzamoyo kwangu,
banozwikudza nge kwangu.
4 Teedza, zhoba pezhugwi kwe matombo,
inonga zhoba ye mbunga usinshoma!
Teedza phipiti ye mibuso,
inonga ye njudzi dzikubungana!
Yahwe Masimbawose banolulwamisila babhayani ngwa.
5 Banozha bedwa ku shango ikule,
banodwa ku phelelo dze kudzimu,
Yahwe ne zwibhayano zwe kugwadzamoyo kwabo,
kukolomodza shango yose.
6 Bokolelani ngoti zhuba la Yahwe labe pejo,
lozha se golomodzo linodwa kuna Masimbawose.
7 Ndizo wali maboko wose anowoteduka,
nthu mmwe ne mmwe unowotemeka mafupa,
8 ngono banowonyala moyo.
Zogwadza ne shungu zowobawila,
banowomanukigwa se nkadzi umu thumbgwa.
Banowolingana bakakaabala,
njiso dzabo dzitukutila ngotja.
9 Bonani zhuba la Yahwe lozha,
nge bushongola ne kugwadzamoyo kunotjisa,
kuthukudza shango
ne kulobesa batjinyi muili.
10 Ngoti nyenyedzi dze zhuzhugwi ne majinjitshi adzo
adzitowopenyesa tjedza tjadzo,
zhuba lowotizwititi pakubhuda kwalo
ne mwedzi awutowopenyesa tjedza tjawo.
11 Ndowolobela shango bubi gwayo,
ne babiibi zwibi zwabo.
Ndowopedzisa kuzwida kwe banozwikudza,
ndowoyisa pasi kuzwimilidza kwe basina ngoni.
12 Ndowothama kuti bathu basiwanike se golide mbuya,
ludzi gwe nthu gowosheteka kupinda kusheteka kwe golide ye Ofira.
13 Ndizo ndowothama kuti kudzimu kuteteme,
ne shango itsheduke mu magalo ayo
nge bushongola gwa Yahwe Masimbawose
mu zhuba le kugwadzamoyo kwabo kukulu.
14 Kufanana ne phala inovimiwa
kene pkhwizi dzisina ungadzikubunganya,
mmwe ne mmwe unowobgwilila kuna bakanyi kwabo,
ngono mmwe ne mmwe unowotizhila ku shango ya kanyi kwabo.
15 Iye unowowang'wa unowobhayiwa,
iye wabhakhwa unobulawa nge thumo.
16 Bana babo banowopkhwanyigwa
mu mesho abo,
ng'umba dzabo dzowotapigwa
ne bakadzi babo bakadzugwa.
17 Bonani, ndodzonga Mediya kugwa nabo,
bathu basina hanya ne siliva
basingashathile golide.
18 Matati abo anowobulaya bazhuzha,
abatowobe ne ngoni mu ntjelo we tjibumbilo,
abatowohwila zogwadza bana.
19 Ngono Bhabhiloni, gudzo le mibuso,
bubuya ne kuzwikudza kwe Bakhaladiya
kowofanana ne Sodoma ne Gomora
tjibaka Ndzimu tjawakabalobesa.
20 Autowofa wagagwa
kene kuli kubakwa muuli kuyenda nge zwizekugwana zose,
akuna N'arabu unowobaka nshasha uwe ikoko,
akuna nlisi unganyalulusa pkhwizi dzidzeko.
21 Koga phuka dze shango dzowolala ikoko,
ne ng'umba dzawo dzowozhala phungubgwe,
ne mafukumudzi anowogala ikoko,
ne meya mibi ye midzimu ye mbudzi dze shango inowozana ikoko.
22 Phele dzowolila mu matizhilo awo,
phungubgwe dzowolila mu ng'umba dzawo dze bushe.
Tjibaka tjawo tjabe pejo,
mazhuba awo aatjowodwilidziwa.
© Kalanga Bible © Bible Society of Botswana, 2008, 2018.