Matama anogadzamoyo
1 Nyaladzani, nyaladzani bathu bangu,
koleba Ndzimu.
2 Lebelekani ne Jerusalema nge matama anotebamisa,
milidzani hwi mu babudze
kuti tjibaka tje bulanda gwabo tjapinda,
shamu ye zwibi zwabo yadusiwa,
shamu yabakabe balobgwa ndi Yahwe bepaphulula
ngekwe zwibi zwabo.
3 Mima yahwika iti,
“Lulwamisani zila ya Yahwe mu tjilambanyika,
temelani Ndzimu wedu zila yakatambunuka mu tjilambanyika.
4 Nkuku mmwe ne mmwe uvukidziwe,
dombo limwe ne limwe ne duthu limwe ne limwe lidusiwe,
pasi pasakalizalizana panowolizalizana,
pana makombakomba kowolulwamisiwa.
5 Ipapo gudzo la Yahwe lowozumbunugwa,
ngono bathu bose banowolibona bose
ngoti Yahwe balebeleka.”
6 Hwi lohwika liti, “Mimila.”
Ngono ashandula nditi, “Ndowomimila ndilebani?”
Bathu bose banonga bushwa,
gudzo labo longa le maluba e shango.
7 Bushwa gowoma, maluba anotimbama,
ha meya ya Yahwe iya fula,
bathu malebeswa banonga bushwa.
8 Bushwa gowoma, maluba anotimbama,
koga dama la Yahwe liyapo nge kusingapele.
9 Tathila pezhugwi kwe dombo lefu,
iwe Ziyoni nzibisi we ndebo mbuya,
milidza hwi lilo wakasima, iwe Jerusalema,
nzibisi we ndebo mbuya, ulimilidze, usitje,
leba etji ku mizi mikulu ye Juda,
“Bonani, Ndzimu wenyu woyoyu.”
10 Bonani, She Yahwe banozha nge simba,
banowobusa nge masimba abo,
bonani mbhayilo wabo banawo
ne mbuzilo yabo bakayisenga.
11 Banowofudza ngubi yabo se nlisi,
banowokubunganyila pkhwizana pabali,
bakadzisenga nge maboko abo,
bomayi bakabatungamila be dzinanayidza.
12 Ndiani wakayela vula nge mukati kwe tjiazha tjitje
ngono kalizanya kudzimu nge bupabi gwe tjiazha tjitje
Ndiani wakalizanya hwuluba ye shango
kabuya kakala matombo mu tjilizanyo
ne matuthu kaalizanya kene?
13 Ndiani wakahwisisa meya ya Yahwe,
kene kabadiya se nlayi wabo?
14 Ndiani wabakakumbila kubapa tjedza
ne kubadiya tambunuko kene?
Ndiani wakabapa zibo,
kabuya kabapa hwisiso kene?
15 Bonani, zwitjaba kuna Yahwe zonga dokhwe le vula mu ali,
zotogwa se hwuluba ipezhugwi kwe tjilizanyo,
bonani, banotola zwigwizi se hwuluba yakanathika.
16 Lebanoni ayingabe ne hwuni dzakalizana,
kene phuka dzayo adzingathame tjibhayilo tjinopisiwa tjakalizana.
17 Zwitjaba zose zonga kusina tjimwe mbeli kwabo,
ku bali zotogwa se kusina tjimwe.
18 Ndiani kene wamungafananya ne Ndzimu?
Nditjipi ifano tjinga fanana nawo?
19 Ifano tjakabezhiwa, mbezhi wakatjibezha,
nthuli we golide katjidzulula nge golide,
katjithamila milipo ye siliva.
20 Usingatubule siliva kene golide,
unoshalula nti wakasima usingabole,
ebe eshaka nyambi mu kubezha,
ebe ethama ifano ebe etjigadzika kwatjisingake tjikatenyenguka tjikawa.
21 Apa amutoziba kene?
Kene amuzohwa?
Apa amuzotongohwisisa kene
kudwila mu kubambiwa kwe shango?
22 Iye ugele pezhugwi kwe denga le shango,
bagali mu shango kunli banolingika se zwipombobushwa,
unotambunudza kudzimu se jila,
unokutambunudza se nshasha ungagagwa muuli.
23 Unothama makombgwa kasibe tjimwe,
babusi be shango bakasinge tjimwe.
24 Konga mbewu inoti itjalimigwa koga,
itjadzwagwa koga mu mavu, itjati inokula,
bebe beifula ibe iwoma,
tjampupudze tjibe tjiiwulusila kutjena se bunye.
25 Ndiani ngono wamungandifanidzanya naye?
Kene ndiani unolizana nami? Koleba Wakayengemala.
26 Milidza mesho awo ulinge pezhugwi ngono ubone,
Ndiani wakabumba kose ikoku?
Ndiye unozhisa nyenyedzi dzose edzidana, imwe ne imwe nge zina.
Ngoti una masimba makulu ne matatabuko akuna ne ing'ompela isipo.
27 Ini ulebeleka saikoku iwe Jakubo?
Ini ulebeleka iwe Iziraela uti,
“Zila yangu yakasumbikika,
Yahwe abatoibona ne fanilo dzangu
Ndzimu abana hanya nadzo?”
28 Apa amuzobona?
Kene amuzohwa?
Yahwe Ndzimu kusingapele,
Mbumbi we phelelo dze shango.
Abatotimbama kene kuli kunyala,
kuhwisisa kwabo akungashakisiswe kukahwisisika.
29 Banopa simba banotimbama,
bakasimisa basina matatabuko.
30 Bazhuzha naibo banowotimbama bakanyala,
batjetjana banowotshatsharika bakawa.
31 Koga ibabo banobhatilila muna Yahwe
banowomusidzila matatabuko abo.
Banowowuluka nge mapapilo se madzu.
Banowolabuka ngono bakasinyale,
banowoyenda ngono bakasitimbame.
© Kalanga Bible © Bible Society of Botswana, 2008, 2018.