1 Ibeni bayedzi bangu, sami ndili n'yedzi wa Kirisiti.
Kuambala mu nsholo mu ntembezelo
2 Ndomukudza, ngobe mondikumbula mu tjimwe ne tjimwe, ngono mukabhata zwidiyo koga sekwa ndakamudiya izo. 3 Koga ndoshaka kuti muhwisise kuti nsholo we nlume mmwe ne mmwe ndi Kirisiti, nsholo we nkadzi nlume ne nsholo wa Kirisiti Ndzimu. 4 Nlume mmwe ne mmwe unotembezela kene unoleba dama le Ndzimu akaambala tjimwe mu nsholo unolengudza nsholo uwe, 5 koga nkadzi unotembezela kene unoleba dama le Ndzimu asakaambala tjimwe mu nsholo uwe, kofanana ne angabe akatesegwa nsholo. 6 Ha nkadzi asingaambale tjimwe mu nsholo uwe ngaatesele mavudzi awe; koga ha kubhatisa shoni kuti nkadzi atesegwe, ngaambale tjimwe mu nsholo uwe. 7 Nlume aazofanila ambala tjimwe mu nsholo uwe, se ali ifano ne gudzo le Ndzimu. Koga nkadzi i gudzo le nlume. 8 Ngobe nlume aazodwa mu nkadzi, koga nkadzi wakadwa mu nlume. 9 Kakale nlume aazobumbigwa nkadzi, koga nkadzi wakabumbigwa nlume. 10 Ndizo nkadzi wakafanila ambala tjimwe mu nsholo uwe tjinolakidza simba ngekwe batungwa be kudzimu, kukudza batumwa be kudzimu. 11 Nenguba kwakajalo muna She, nkadzi ate ali tjimwe kuzhe kwe nlume, ne nlume ate ali tjimwe kuzhe kwe nkadzi, 12 ngobe nenguba nkadzi akathamwa kudwa mu nlume, ngwenu nlume wozwagwa nge nkadzi. Ngono zwithu zose zodwa ku Ndzimu.
13 Muzwibonegwe, apa kwakalingisana kene kuti nkadzi atembezele Ndzimu asakafukidza nsholo? 14 Apa mbumbiko ye zwithu nge kwayo aitomudiya kuti mavudzi malefu mu nlume anobhatisa shoni? 15 Koga ha nkadzi ana mavudzi malefu, bubuya gugwe, ngobe mavudzi awe wakaapiwa kube tjifukidzi. 16 Ha mmwe asingadumane na ikoku, akuna mmwe nlenje watinawo ne makubungano e Ndzimu aana mmwe nlenje.
Tjilayilo tja She
(Matewu 26:26-29Mako 14:22-25Luke 22:14-20)17 Koga mu zwidiyo zwinotobela, anditomukudza, ngobe ha mushangana amutoshanganila bubuya koga moshanganila bubi. 18 Tjekutanga ndohwa kuyi, ha mushangana mu gubungano kuna kusahwanana pakati kwenyu, ngono ndoduma kungadwa kuna lebeswa muna itjetji, 19 ngobe kwakafanila kube ne kuthubukana pakati kwenyu kuti ndizo ibabo bana malebeswa pakati kwenyu baboneke. 20 Ha mushangana, ate tjilayilo tja She tjamunoja, 21 ngobe ha muja, mmwe ne mmwe unodwilila ngoja asingamilile kene ani, ngono kube kuthama kuti bamwe babe ne zhala koga bamwe balaladze. 22 Ini ikoku, apa amuna mizi yamungajila muili mukang'wila muili kene? Kene molingila pasi gubungano le Ndzimu mukabhatisa shoni ibabo basina tjabo? Ndimudwe nditini kene? Apa ndimukudze muna ikoku kene? Aa, andingamukudze.
23 Ngobe imi ndakaamutjila muna She itjetjo tjandakapitshila kumuli. She Jesu bakati mu busiku gwabakawongiwa bakatola tjiwunga, 24 bakati baboka bakatjipemula, ndizo bakati, “Oyu mbili wangu unopigwa imwi. Muthame ikoku tjili ikumbuludzo tjangu.” 25 Nge zila iyeyo zwayo, shule kwe tjilayilo, She bakatola bhepe le nkumbi we zhambi ngono bakati, “Bhepe ileli Tjidumano tjitshwa mu malopa angu. Muthame ikoku misi yose mung'we kundikumbula.”
26 Tjibaka tjimwe ne tjimwe itjetji ha muja tjiwunga mung'wa mu bhepe le nkumbi we zhambi, moleba lufu gwa She kudzina bezha. 27 Ndizo wali ani naani unoja tjiwunga kene eng'wa mu bhepe la She nge zila isingakudze She una nlandu we kulonga mbili ne malopa a She shambgwa. 28 Mmwe ne mmwe ngaazwishakisise kutanga ekotjiti eja tjiwunga ne kung'wa mu bhepe. 29 Ngobe iye unoja ebe eng'wa asingazibe mbili wa She unozwidanila kusumikilisiwa. 30 Ndizo wali bunjinji gwenyu muli zwiworoworo mugwala ne bamwe benyu bakafa. 31 Ha tabe tingazwishakisisa kutanga, tabe tisingawosumikilisiwa. 32 Koga ha tisumikilisiwa ndi She, totjemegwa kuti ndizo tisilashiwe kang'ompela ne shango.
33 Ndizoke zwikamu, ha mukubungana muja, mililanani. 34 Ha mmwe ana zhala, ngaaje ku nzi kuti musikubunganile kubong'wa nlandu. Ngekwe zwimwe zwithu ndowopa milayo ndazha.
© Kalanga Bible © Bible Society of Botswana, 2008, 2018.