Nshingo wa Paulo ku Batesalonika
1 Koga imwi zwikamu, moziba kuti kumu kumba kwedu akuzobe kuli madatha. 2 Koga nenguba muziba kuti takabe tadziyila kale, tikabhakhwa kunobhatisa shoni ku Filipi, koga nge bhatsho ye Ndzimu wedu takasimisamoyo kumubudza ndebo mbuya yawo patjena, nenguba kwakabe kuna kunyanyayidziwa kukulu. 3 Tjatinomukumbila atjitodwa mu kulashika kene mu mikumbulo isi mibuyanana, kakale atitogwisa kumulasha. 4 Koga tolebeleka tili bakaamutjigwa nge Ndzimu, kuti ndebo mbuya ingabigwa mu maboko edu. Atitogwisa kushathisa bathu, koga togwisa kushathisa Ndzimu, iwo unolika mimoyo yedu. 5 Moziba kuti atizotongo zha kumuli tizipisa ndebo, kakale atizotongo leba ndebo inosumbika bugovu. Ndzimu ntendeki wedu. 6 Takabe tisingashake kukudziwa nge bathu, imwi kene mmwe koga. 7 Se batumwa ba Kirisiti tobetakabe ntolo kumuli, koga takabe banyolo pakati kwenyu, tinga mayi belela bana babo batukununu. 8 Takabe timuda kwatakashathila kushanganyila namwi kusi ndebo mbuya yoga ye Ndzimu ne matjilo edubo, ngobe makabe mudika kwazo. 9 Ngobe moalakana, kushinga nenge kudziyidzika kwazo kwedu zwikamu, takashinga siku ne sikati, kuti tisibe ntolo mu muli ha tisumikila ndebo mbuya ye Ndzimu kumuli.
10 Mu batendeki, kose ne Ndzimu ntendeki, kuti takabe tili bakayengemala tjini, tili balulwami kakale tisina nlandu, tili pakati kwenyu imwi banogalamoyo. 11 Moziba kuti takabhata mmwe ne mmwe wenyu koga sa tate bebhata bana babo, 12 timusimisa, timunyaladza, timukulumbidza, kuti mutjile butjilo gwakafanila Ndzimu, iwo unomudanila mu gudzo le bushe gwawo.
13 Kakale togala tiboka Ndzimu, ngobe makati muamutjila dama le Ndzimu, ilo lamakahwa ndiswi, makaliamutjila kusi se dama le nthu, koga se dama le Ndzimu sekwa lili ilo, ilo linoshinga mu muli imwi banogalamoyo. 14 Imwi zwikamu, makabe bayedzi be makubungano e Ndzimu mu Judiya iwo amuna Kirisiti Jesu, ngobe makadziyidziwa nge bakanyi kwenyu, koga saibo bakadziyidziwa nge Bajuta, 15 ibo bakabulaya She Jesu ne balebesambeli, kakale bakatidziyidza. Abatoshathisa Ndzimu, kakale banonyanyayidza bathu bose 16 ne kutidzibisa kulebeleka ne Bezwitjaba, kuti ndizo Bezwitjaba batjidziwe. Nge zila iyeyi, bezhadza tjilizanyo tje zwibi zwabo misi yose. Koga bushongola gwe Ndzimu gwadzina gukabazhila kubupelo.
Njemulo dza Paulo kukumba Batesalonika
17 Koga zwikamu, kwakati takathubukana namwi tjibaka tjifupi, takabe tili tose mu mikumbulo. Mu kumushuba kwedu kukulu, takagwisa kwazo kuti tizhe timubone nge mesho. 18 Ngobe takabe tishaka zha kumuli, imi Paulo, ndakagwisa kanjinji koga Satani katima mbeli. 19 Dumbu kugalabgwe kwedu ne kushatha kwedu kene tjiala tje kukunda kungabeni, ha tima mbeli kwa She wedu Jesu Kirisiti ha ezha? Kungabeni ha isi imwi kene? 20 Ndimwi kuzwikudza ne kushatha kwedu.
© Kalanga Bible © Bible Society of Botswana, 2008, 2018.