Baegipiti banonginilila Juda
(1 Bomambo 14:25-28)1 Kwakati mbuso wa Rehoboamu watjisima, Rehoboamu ne Baiziraela bakabe bakantobela bakafupatila nlayo wa Yahwe. 2 Ngono kukati mu gole le bushanu le mbuso uwe Mambo Rehoboamu ngekwe kusahwa Yahwe kukwe, Shishaki mambo we Egipiti kanginilila Jerusalema 3 nge koloyi dze ngwa dzili tjiwulu tjina mazana ali mabili (1 200) ne batathi be mbizi bali zwiwulu zwili makumi ali tathatu (60 000) ne babhayani basina mbalo baakazha nabo bedwa ku shango ye Libhiya ne Sukimu ne Itopiya. 4 Ngono katapa matizhilo e mizi mikulu ye Juda ngono kaswika ku Jerusalema.
5 Ngono Shemaiya nlebesambeli kayenda kuna Rehoboamu ne batungamili be Juda bakabe bakakubungana mu Jerusalema ngekwa Shishaki. Wakabadwa kati, “Yahwe bakati kumuli, ‘Makandifupatila ngono ndizo ndamulashila mu simba la Shishaki’ ” 6 Batungamili na mambo we Iziraela bakazwiyisa pasi ngono bakabe beti, “Yahwe bakalulwama.”
7 Ngono Yahwe bakati bebona Baiziraela bazwiyisa pasi, bakalebeleka na Shemaiya beti, “Ngoti bazwiyisa pasi, anditjowobakolomodza koga ndowobapa kusununguka ne bushongola gwangu agutjowodelukila Jerusalema nge tjiazha tja Shishaki, 8 koga banowobe balanda babe bakaziba kuthubukana kwe kundishingila ne kushingila bushe gwe shango dzipoga.”
9 Ndizo Shishaki mambo we Egipiti kamukila Jerusalema katola tjimwe ne tjimwe, thundu yose ye Ng'umba ya Yahwe ne thundu yose ye ng'umba ya mambo, katola zwivikisi zwakathamwa nge golide zwakabe zwathamwa ndi Solomoni. 10 Ngono Rehoboamu wakathama zwivikisi zwe phangula kazwilonga mu maboko e balindi bakabe belinda nkoba we ng'umba ya mambo. 11 Kwakabe kuti tjibaka ne tjibaka mambo eyenda ku Ng'umba ya Yahwe balisi be mikoba bakabe besenga zwivikisi ngono kati apedza bakazwigwiliza ku ng'umba ye balisi. 12 Nge kuti wakazwiyisa pasi, bushongola gwa Yahwe aguzonlobesa koga zwithu zwakayenda zubuyanana mu Juda.
Mbuso wa Rehoboamu
13 Rehoboamu wakabusa mu Jerusalema ngono kawatsha masimba awe e bumambo. Rehoboamu wakabe ali makole ali makumi manna ana ling'ompela (41) paakabe mambo ngono kabusa makole ali gumi lina kutendeka (17) mu Jerusalema, nzi nkulu Yahwe wabakashalula mu njudzi dzose dze Iziraela kubiga zina labo muuli. Mme ba Rehoboamu bakabe bali Naama bedwa ku shango ye Amoni. 14 Ngono Rehoboamu wakathama kose kwakabipa ngobe wakabe asakazwimisila kushinga kuda kwa Yahwe.
15 Mishingo ya Rehoboamu kudwa mu kutangisa kunoti ku bupelo aizokwagwa mu Thawu dza Shemaiya Nlebesambeli ne mu Thawu dza Ido we mboni kene? Kwakabe kugala kuna kukwebakwebana kusingapele pakati kwa Rehoboamu na Jeroboamu. 16 Rehoboamu kafa kanobiganyiwa na bobatategulu babe, wakabiganyiwa mu nzi nkulu wa Dafite, nkololo uwe Abija kabe iye mambo.
© Kalanga Bible © Bible Society of Botswana, 2008, 2018.