Nlebesambeli unotjemela Jehoshafati
1 Jehoshafati mambo we Juda kabgwilila ku nzi uwe ku Jerusalema nge mbakiso. 2 Koga nlebesambeli Jehu nkololo wa Hanani kayenda kunonshanganidza ngono kadwa Mambo Jehoshafati kati, “Apa kwakafanila kubhatsha banothama mbipo ne kuda ibabo banobenga Yahwe kene? Ngekwa ikoku bushongola gwa Yahwe gowodelukila mukuli. 3 Nenguba kwakajalo kuna bubuya gunowang'wa mu kuli ngoti wakakolomodza Ashera mu shango ngono ukazwimisila kushingila Yahwe.”
Jehoshafati unoshanduka
4 Nenguba Jehoshafati akabe egala mu Jerusalema wakabe eyenda ku bathu kudwa mu Bheerisheba kunoti ku shango ye matombo ye Ifureimi ebashandusila kuna Yahwe Ndzimu wa bobatategulu babo. 5 Wakabiga basumikilisi mu mizi mikulu ye matizhilo yose imu Juda, 6 ngono kalaya basumikilisi eti, “Mube ne njele kwazo muna tjamunothama, muzibe kuti amutosumikilisila nthu koga mosumikilisila Yahwe, Yahwe ba namwi mukusumikilisa kwenyu. 7 Ndizo ngwenu kutja Yahwe ngakube mu muli, ibeni nge njele muna tjamunothama ngobe akuna kulelekesa ndulamo muna Yahwe Ndzimu wedu kene kulelekela ntome kene kutola zwizwimba nlomo.”
8 Pezhugwi kwa ipapo Jehoshafati wakabiga Balevi ne bapirisiti bamwe ne misholo ye misha ye Iziraela mu Jerusalema kuti bape busumikilisi bumo gwa Yahwe neku pedzisa ndebo. Bakabe begala ku Jerusalema. 9 Ngono wakabalaya eti, “Mushinge ikoko ngotja Yahwe ne kugalikabgwe nenge mimoyo yenyu yose. 10 Ndebo imwe ne imwe inozhisiwa kumuli idwa ku bathu bakanyi kwenyu bakabaka ku mizi yabo ipoga, ingabe ili ye kubulaya kene ye salondolodza nlayo makafanila kuti mu batjenjedze kuti basidwe bezwilonga mu nlandu mbeli kwa Yahwe kungathama kuti bushongola gwa Yahwe gudelukile mu muli ne mu bathu bakanyi kwenyu. Muthame saikoko ndizo amungatilikwe nlandu. 11 Ngono bonani, Amariya mpirisiti nkulu unamwi muna zose zwa Yahwe na Zebadiya nkololo wa Ishimaele nlauli we Juda banamwi muna zose zwa mambo, Balevi banowobepo kubona kuti zose zwe lubazhe zwadumigwana zoshingikadziwa. Shingani makasima, atshene Yahwe bangabe ne banoshinga ndulamo!”
© Kalanga Bible © Bible Society of Botswana, 2008, 2018.