Mambo Jothamu we Juda
(2 Bomambo 15:32-38)1 Jothamu wakatangisa busa ali makole ali makumi mabili ana makole ali mashanu (25) ngono wakabusa makole ali gumi lina makole ali tathatu (16) mu Jerusalema. Zina la mmeyabe lakabe lili Jerusha nkololokadzi wa Zadoki. 2 Wakathama ndulamo mbeli kwa Yahwe, koga sekwakathama tate babe Uziya, koga iye kasingine mu Ng'umba ya Yahwe. Bathu ibo bakadwilila nge zila dzabo dze kutjinya. 3 Jothamu wakabaka Nkoba upezhugwi we Ng'umba ya Yahwe ngono kashinga nshingo usinshoma emusa makuma ku Ofele. 4 Mu matombo e Juda kabaka mizi mikulu ngono ku zwishaka kabaka matizhilo ne thungamakole. 5 Jothamu kagwa na mambo we Baamoni ngono kabakunda. Ngono mu gole ilelo Baamoni bakanlipa talenta dze siliva dzili zana ne dzitani dzili tjiwulu (1 000) tje masaka e mathunde ne dzitani dzili tjiwulu (1 000) tje mathunde e bhali. Baamoni bakalipa ngo fanana kwe gole linotobela nenge le butatu. 6 Jothamu kasima kwazo ngobe wakabe egalabgwe Yahwe Ndzimu uwe. 7 Mimwe mishingo ye mbuso wa Jothamu ne ngwa dzaakagwa ne zwimwe zwaakathama zwakakwagwa mu Thawu dza Bomambo be Iziraela ne Juda. 8 Jothamu wakabe ali makole ali makumi mabili ana mashanu (25) paakabe etangisa bumambo ngono kabusa mu Jerusalema makole ali gumi lina makole ali tathatu (16). 9 Jothamu kafa ngono kabinganyiwa ku nzi nkulu wa Dafite. Ngono Ahazi nkololo uwe kagala thaka kube mambo.
© Kalanga Bible © Bible Society of Botswana, 2008, 2018.