Be nsha wa Ahabu banobulawa
1 Ahabu wakabe ana bakololo bali makumi ali kutendeka (70) mu Samariya. Ndizo Jehu kakwala hwalo ngono kadzitumila ku Samariya, ku batungamili be nzi nkulu neku bakulu neku batjengeti be bakololo ba Ahabu eti, 2 “Ngono ngwenu ha lukwalo igogu guswika kumuli se muna bakololo ba tetshi wenyu, ngono muna koloyi dze ngwa ne mbizi ne mizi ye matizhilo ne zwibhayano, 3 mushalule mmwe we bakololo ba tetshi wenyu wakalizanila akafanila ngono mun'gadze mutjigalo tje bushe tja tate babe.” 4 Ngono bakatja kwazo bakati, “Bonani, wakakona bomambo babili, iswi tingatubula tjini kene?” 5 Ndizo batungamili be ng'umba ya mambo ne balauli be nzi nkulu ne bakulu ne batjengeti bakatumila ndaidzo kuna Jehu beti, “Ti balanda babo ngono towothama tjimwe ne tjimwe tjaunoleba. Akuna watinowobiga mambo, thama tjaunobona tjakafanila mu mesho awo.” 6 Ndizo Jehu kabakwalila lukwalo gwe bubili kati, “Ha muli mile nami, muteedza hwi langu, tolani misholo ye bakololo ba tetshi wenyu ngono muzhe kundili mu Jezirele mangwana mu tjibaka itjetji.” Ngono bakololo ba mambo, balume bali makumi ali kutendeka (70) bakabe bana bakulu be nzi nkulu banobalela. 7 Ngono lukwalo gwakati guswika kubali, bakatola bakololo ba mambo bakababulaya bose bali makumi ali kutendeka (70). Bakalonga misholo yabo mu seme ngono bakaitumila kuna Jehu ku Jezirele. 8 Kwakati ntumwa eswika, kadwa Jehu kati, “Bazhisa misholo ye bakololo ba mambo.” Jehu kandwa kati, “Muyibutitike kube migwi mibili ku nkoba we nzi nkulu kuswikila mangwanana.” 9 Ngono kwakati mangwanana Jehu kabhuda, kama mbeli kwe bathu bose kati, “Imwi makalulwama, imi ndimi ndakalukila gwanga tetshi wangu ngono ndikambulaya, koga ndiyani wabulaya bose ibaba? 10 Ndizo ngwenu zibani kuti akuna dama lakalebgwa ndi Yahwe ngekwe nsha wa Ahabu linowowila pasi, Yahwe bashingikadza tjabakaleba nge nlanda wabo Elija.” 11 Jehu kabulaya bose bakabe basala be nsha wa Ahabu mu Jezirele na bose batungamili babe ne bazwalani babe banozibgwa ne bapirisiti babe, kuswikila kusina limbelimbe laanon'siyila. 12 Jehu kamilika kayenda ku Samariya. Kwakati atji muzila pa Betikedi we balisi, 13 kashangana nge matshinga a Ahaziya mambo we Juda ngono kabhuzwa eti, “Muboyani?” Ngono bakashandula beti, “Ti matshinga a Ahaziya ngono tazha kuwodumilisa be nsha wa mambo nebe nsha wa mambokadzi.” 14 Ngono kabe eti, “Mubabhate betjila.” Ngono bakabatola betjila, ngono bakano babulayila ku gomba le Betikedi kuli bathu bali makumi manna ana babili (42). Akuna waakatjidza. 15 Kwakati emilika ikweno, kashangana na Jehonadabi nkololo wa Rekabi ezha kuwonshanganidza ngono Jehu kandumilisa kandwa kati, “Aa moyo uwo una wangu, se wangu una uwo kene?” Ngono Jehonadabi kadabila eti, “Kwakajalo.” Jehu kati, “Ha kwakajalo, undipe luboko gugo.” Ngono kampa luboko, Jehu kanthathisa mu koloyi iye ye ngwa. 16 Ngono kati, “Buya tiyende tose unobona sekwa ndinoshingayilila Yahwe.” Ndizo katatha naye mu koloyi iye. 17 Kwakati Jehu eswika ku Samariya, kabulaya bose bakabe basala ikweno be nsha wa Ahabu, wakabalobesa kuyendidzana nge dama la Yahwe labakabe baleba kuna Elija.
Bashingili ba Bhaale banobulawa
18 Jehu kakubunganya bathu bose ngono kabadwa kati, “Ahabu wakashingila Bhaale kushomanana, koga Jehu unowonshingila kwazo. 19 Ndizo ngwenu mundidanile balebesambeli bose ba Bhaale na bose banonthigamila ne bapirisiti babe bose, kusheteke usipo ngobe ndina tjibhayilo tjikulu tjandinopisila Bhaale, iye unowosheteka aatowotjila.” Koga Jehu wakathama kamwaza kuti ndizo alobese banamati ba Bhaale. 20 Jehu kati, “Danani gubungano le kukudza Bhaale.” Ndizo likadang'wa. 21 Ngono Jehu katumila dama mu Iziraela yose, ngono bose banamati ba Bhaale bakabuya, kwakabe kusina nthu wasala asabuya. Bakangina mu ng'umba ya Bhaale ngono ng'umba ya Bhaale ye minamato ikazhala bathu bakamanikana. 22 Ngono kadwa ntjengeti we ng'umba ye zwiambalo kati, “Dusila banamati ba Bhaale bose zwiambalo.” Ndizo kabadusila zwiambalo. 23 Jehu kangina mu ng'umba ya Bhaale na Jehonadabi nkololo wa Rekabi ngono kadwa banamati ba Bhaale kati, “Lingisisani mubone kuti akuna nlanda wa Yahwe pakati kwenyu, koga kube ne banamati ba Bhaale koga.” 24 Ndizo bakangina bakathama zwibhayilo ne zwibhayilo zwinopisiwa. Jehu wakabe a biga balume bali makumi ali zhanakadzi kuzhe, ngono abadwa eti, “Iye unowoletja mmwe we bathu ibaba bandalonga mumaboko enyu etizha, unowobulawa mu bumo gugwe.” 25 Kwakati koga Jehu epedza thama tjibhayilo tjinopisiwa, kadwa balindi ne batungamili eti, “Nginani mukati mubabulaye, kusiyite unotizha.” Ndizo bakababulaya nge thumo. Balindi ne batungamili bakalashila zwitumbu zwabo kuzhe ngono bakangina mu ng'umbana itjamukatikati ye mu ng'umba ya Bhaale ye minamato. 26 Bakadusa zwifano zwe midzimu mu ng'umba ya Bhaale ye minamato bakazwipisa. 27 Bakaliga phanda dza Bhaale, bakaliga ng'umba ye minamato ya Bhaale ngono bakaithama ng'umbana inobgwatiwa kuswikila nasi. 28 Ndiko Jehu sekwa akanyeledza bunamati gwa Bhaale mu Iziraela. 29 Koga Jehu aazolasha zwibi zwa Jeroboamu nkololo wa Nebati zwaakathamisa Iziraela tjibi nge kuthigamila phulu ye golide yakabe ili mu Bheteli nemu Dani. 30 Ngono Yahwe bakadwa Jehu bakati, “Ngobe washingikadza zwakanaka mu mesho angu, ngono ukathamila be nsha wa Ahabu tjakabe tjili mu moyo wangu, bana be bana babo banowogala pa tjigalo tje bushe tje Iziraela kunoti kutjizekugwana tje bunna.” 31 Koga Jehu wakabe asina njele kutobela nlayo wa Yahwe Ndzimu we Iziraela nge moyo uwe wose, aazoshandukila zwibi zwa Jeroboamu zwaakathamisa Iziraela tjibi. 32 Mu misi iyeyo Yahwe bakatangisa tapudza migathu ye Iziraela. Hazaele wakakunda Baiziraela mu ntuthu wabo wose, 33 kudwa ku Jorodani ku bhezhuba ne shango yose ye Giliyadi ne Bagadi ne Barubheni ne Bamanase, ne kudwa ku Aroeri ipa nkuku we Arinoni ye Giliyadi ne Bhashani. 34 Zwimwe zwiyitikalo zwa Jehu na zose zwaakathama ne zwaakatubula zwakakwagwa mu lukwalo gwe Zwiyitikalo gwa bomambo be Iziraela. 35 Jehu kanolala na botate babe ngono bakambiganya mu Samariya. Nkololo uwe Jehoahazi kan'gala thaka. 36 Tjibaka tjakabusa Jehu mu Iziraela ali mu Samariya kwakabe makole ali makumi mabili ana ali zhanakadzi (28).
© Kalanga Bible © Bible Society of Botswana, 2008, 2018.