2 Bomambo 18 - Kalanga Bible (KBTP)

Mambo Hezekiya we Juda

1 Mu gole le butatu le mbuso wa Hosheya nkololo wa Ela mambo we Iziraela, Hezekiya nkololo wa Ahazi mambo we Juda katangisa kubusa. 2 Wakatangisa kubusa ana makole ali makumi mabili ana mashanu (25), kabusa makole ali makumi mabili ana ali zhanalume (29) mu Jerusalema. Zina la mmeyabe liyi Abi nkololokadzi wa Zakhariya. 3 Wakathama tjakalulwama mu mesho a Yahwe, sekwakathama tate babe Dafite. 4 Wakadusa magalo akatuthumala, kakwiya mabgwe e thiwa, katema ifano tja Ashera, kapkhwanya nyoka ye phangula yakabe yathamiwa ndi Mushe ngoti kuswika mu tjibaka itjetjo bathu be Iziraela bakabe beipisila motsha, yakabe idang'wa Nehushitani. 5 Hezekiya wakagalabgwe muna Yahwe Ndzimu we Iziraela, kwakabe kusina wakanga iye muna bomambo bose be Juda shule kukwe kene muna ibabo bakabe bali mbeli kukwe. 6 Wakabhatilila muna Yahwe, kasipambuke mu kubatobela, kabhata milayo ya Yahwe yabakalayila Mushe. 7 Yahwe bakabe banaye, kabhudilila mutjimwe ne tjimwe tjaakabe ethama. Kapandukila mambo we Asiriya, kasinshingile. 8 Kakunda Bafilisitiya kunoti tjose ku Gaza ne mituthu yayo kudwa ku ngadzi kunoti ku nzi we matizhilo. 9 Mu gole le bunna le mbuso wa Hezekiya kuli gole le butendeka le mbuso wa Hosheya nkololo wa Ela mambo we Iziraela, Shalimanesa kanginilila Samariya kaikomba nge ngwa. 10 Kwakati kubupelo gwe makole matatu Baasiriya bakaitola. Mu gole le butathatu le mbuso wa Hezekiya kuli gole le buzhanalume le mbuso wa Hosheya mambo we Iziraela, Samariya ikatapiwa. 11 Mambo we Asiriya kasengela Baiziraela ku Asiriya kababiga mu Hala ne ku Haba gwizi gwe Gozani ne mu mizi mikulu ye Mediya, 12 ngoti abazoteedza hwi la Yahwe Ndzimu wabo, ngono bakatjinya tjidumano na zose zwakalebgwa ndi Mushe nlanda wa Yahwe, abazozwiteedza kene kuli kuzwishingikadza. 13 Mu gole le bugumi lina ali manna (14) le mbuso wa Hezekiya, Senakheribu mambo we Asiriya kazha kuwonginilila mizi mikulu yose ye matizhilo ye Juda ngono kayitapa. 14 Hezekiya mambo we Juda katumila ndayidzo kuna mambo we Asiriya ku Lakhishi eti, “Ndatjinya, shanduka undilekedze, ndowokulipa tjaunoshaka.” Ngono mambo we Asiriya kalipisa Hezekiya mambo we Juda talenta dze siliva dzili mazana matatu (300) ne talenta dze golide dzili makumi matatu (30). 15 Hezekiya kampa siliva yose yakabe ili mu ng'umba ya Yahwe nemu matula e ng'umba ya mambo. 16 Mu tjibaka itjetjo Hezekiya ka kokonola golide mu matendele e ng'umba ya Yahwe nemu makwasayile, yakabe ya namatidziwa na Hezekiya mambo we Juda kayipa mambo we Asiriya.

Senakheribu uno tshusidzila Jerusalema

(2 Zwiyitikalo 32:1-19Isaya 36:1-22)

17 Mambo we Asiriya katuma ntungamili nkulu we ngwa ne ntungamili we bashingi be nzi wa mambo ne nlauli we babhayani kuna Mambo Hezekiya ku Jerusalema ana ngwa hwulu kudwa ku Lakhishi. Bakayenda bakanoswika ku Jerusalema, bakati beswika bakama pa ngolo ye dziba lipezhugwi, limu zila ipa nnda we nsuki. 18 Bakadana mambo, ngono Eliyakimu nkololo wa Hilikiya wakabe ali ntjengeti we ng'umba ye bumambo, na Shebina we nkwalili na Jowa nkololo wa Asafu we nkwali we zwakashingikala bakayenda kubali. 19 Nkulu we balauli be babhayani kabadwa kati, “Kadweni Hezekiya muti, ‘Mambo nkulu, mambo we Asiriya kati, tjawakabiga mutjili ini wakadzikama wakajali kene? 20 Apa unokumbula kuti kuleba matama koga ndiwo maano ne simba lekugwa kene? Wakabiga muna yani haundipandukila kene? 21 Bonani, wakabiga mu Egipiti, igoguja ludozo gwe lushanga gwakavunika, gunowobhaya mmwe ne mmwe unodozola nago. Faro mambo we Egipiti wakajalo kuna ibabo bose bakabiga munli. 22 Koga ha mungandidwa muti, “Takabiga muna Yahwe Ndzimu wedu.” Apa ate uli iwo we magalo akatuthumala ne zwibeso zwinopisigwa zwibhayilo zwakakolomogwa ndi Hezekiya, edwa Juda ne Jerusalema eti, “Mu namate mbeli kwe tjibeso tjinopisigwa zwibhayilo tjimu Jerusalema kene?” 23 Buya ngeno udumane na tetshi wangu mambo we Asiriya. Ndowokupa mbizi dzili zwiwulu zwibili (2 000), ha ungawana bataswi badzo. 24 Aungatubule kumidzana ne nng'ompela we bashomanana tjose be balanda ba tetshi wangu, ha ilikuti wakabiga mu koloyi dze ngwa ne bataswi be mbizi be Egipiti. 25 Pezhugwi kwa ipapo, apa ndazha kuwonginilila ndi kolomodza magalo iyawa kusina dama ladwa kuna Yahwe kene? Yahwe ndibo bandidwa bakati ndinginilile shango iyeyi ndiyikolomodze.’ ” 26 Koga Eliyakimu nkololo wa Hilikiya na Shebina na Jowa bakadwa nkulu we batungamili be babhayani be Asiriya beti, “Tokumbila kuti utilebese nge Tjiaramu ngoti totjiwa, usitilebese nge Tjijuta mu zebe dze bathu ibaba ba pezhugwi kwe guma.” 27 Koga ntungamili kabadabila eti, “Apa moti ndatumwa kuwoleba zwithu izwezwi kuna tetshi wenyu ne ku muli koga kene? Akuzojalo, ndatumwa neku bathu bapezhugwi kwe guma, banowoja mapambuko abo bakang'wa mitundo yabo koga samwi.” 28 Ipapo nkulu we balauli be babhayani be Asiriya kamilidza hwi kalebeleka nge Tjijuta eti, “Ihwani matama a mambo nkulu, mambo we Asiriya, 29 Mambo bakati, ‘Musitjengedziwe ndi Hezekiya ngoti aatowotubula ku musunungula mu luboko gwangu. 30 Musitongo duma Hezekiya eti mugalebgwe muna Yahwe eti, nge malebeswa Yahwe banowotitjidza. Nzi nkulu iwoyu awungatogwe nge Asiriya.’ 31 Musitongo teedza Hezekiya. Mambo we Asiriya kati, ‘Dumanani nami mube ne mbakiso mubhudile ngeno kundili, ipapo mmwe ne mmwe wenyu unowoja zhambi dze nzhambi uwe ne phaya dze mpaya uwe eng'wa vula mu tshime lile, 32 kudzina ndizha ndiwomutola ndimuyisa ku shango inonga yenyu, shango ye mathunde ne nkumbi we zhambi, shango ye tjiwunga ne minda dze mizhambi, shango ye miti ye mitoba ne butji, kuti mutjile musife. Musiteedze Hezekiya apa emutjengela eti Yahwe banowotisunungula. 33 Apa kuna imwe ye midzimu ye zwitjaba yakatongo sunungula shango yawo mu luboko gwa mambo we Asiriya kene? 34 Ingayi midzimu ye Hamati ne Aripadi? Ingayi midzimu ye Sefarivaimu ne Hena ne Iva? Apa yakasunungula Samariya mu luboko gwangu kene? 35 Ndiipi midzimu pakati kwayo yose iyeyi yakatongo sunungula shango dzayo mu maboko angu kene? Apa ngono mungandibudza kuti Yahwe ungasunungula Jerusalema mu maboko angu kene?’ ”

36 Koga bakanyalala zwabo bakasitongo ndabila ngekuti mambo bakabe bati, “Musitongo nshandula.” 37 Ipapo Eliyakimu nkololo wa Hilikiya iye wakabe ali ntjengeti we ng'umba ye bumambo ana Shebina nkwalili na Jowa nkololo wa Asafu ali nkwali we zwakashingikala, bakayenda kuna Hezekiya bapalula zwiambalo zwabakaambala, ngono bakambudza matama wose alebgwa ne nkulu we balauli be babhayani be Asiriya.