1 Mu mazhuba a Jehoyakimu, Nebukadineza mambo we Bhabhiloni kanginilila shango, Jehoyakimu kabe nlanda uwe kwe makole matatu. Koga kashandukila Mambo Nebukadineza kampandukila. 2 Yahwe bakatumila zwilalume zwe Khaladiya nezwe Siriya nezwe Moabu nezwe Amoni kuti banginilile Juda bayilobese. Kuyendidzana nge dama la Yahwe labakaleba nge balanda babo balebesambeli. 3 Ngelebeswa zwithu izwezwi zwaka shingikalila Juda kuyenda nge ndaulo ya Yahwe, kuti babaduse mu mesho abo ngekwe zwibi zwa Manase na zose zwaakathama, 4 nenge lopa lisina nlandu laakatebula, ngoti wakazhadza Jerusalema nge lopa lisina nlandu ngono Yahwe bakasibazwiibhatigwe. 5 Mimwe mishingo ya Jehoyakimu na zose zwaakathama zwakakwagwa mu lukwalo gwe zwiyitikalo gwa bomambo be Juda. 6 Jehoyakimu kalala na botate babe, Jehoyakini nkololo uwe kan'gala thaka. 7 Mambo we Egipiti kasitjabhude mu shango iye, ngoti mambo we Bhabhiloni wakabe atola zose zwakabe zwili zwa mambo we Egipiti kudwa ku nkuku we Egipiti kunoti ku gwizi gwe Yufuratesi.
Mambo Jehoyakini we Juda
(2 Zwiyitikalo 36:9-10)8 Jehoyakini wakabe mambo ana makole ali gumi lina ali zhanakadzi (18), ngono kabusa mimwedzi mitatu mu Jerusalema. Zina la mmeyabe liyi Nehushita nkololokadzi wa Elinatani we Jerusalema. 9 Kathama mbipo mu mesho a Yahwe, sekwatate babe bakathama. 10 Mu tjibaka itjetjo makombgwa a Nebukadineza mambo we Bhabhiloni bakazha ku Jerusalema ngono bakayikomba nge ngwa. 11 Nebukadineza mambo we Bhabhiloni kazha ku nzi nkulu makobgwa awe atjakaukomba, 12 Jehoyakini mambo we Juda kazwipila muna mambo we Bhabhiloni na mmeyabe ne makombgwa awe ne bashingi be ng'umba iye, mambo we Bhabhiloni kalonga Jehoyakini mu busungwa mu gole le bu zhanakadzi le mbuso wayo, 13 ngono kasenga fumwa yose ye ng'umba ya Yahwe ne fumwa ye ng'umba ya mambo, katola kose ne zwija zose zwe golide zwakabe zwathamiwa na Solomoni mambo we Iziraela zwili zwe ng'umba ya Yahwe koga sekwa Yahwe bakabe baleba. 14 Kalonga bathu bose be Jerusalema ne makombgwa wose ne babhayani ne nyambi ne bathuli mu busungwa, bose bali zwiwulu zwili gumi (10 000). Kwakasala bathu banodziyila koga mu shango. 15 Ngono kasengela Jehoyakini ku Bhabhiloni na mme ba mambo ne bakadzi ba mambo ne makombgwa awe ne batungamili be shango, kabadusa mu Jerusalema, kabatapila ku Bhabhiloni. 16 Mambo we Bhabhiloni kazhisa batapiwa ku Bhabhiloni kuli balume be ngwa bali zwiwulu zwili tendeka (7 000) ne nyambi ne bathuli bali tjiwulu (1 000) bose bakasima bakalizanila ngwa. 17 Ngono mambo we Bhabhiloni kabiga Mataniya batatenini ba Jehoyakini kube mambo mu bumo gugwe ngono kashandula zina lile kan'dana Zedekiya.
Mambo Zedekiya we Juda
(2 Zwiyitikalo 36:11-12Jeremiya 52:1-3a)18 Zedekiya wakabe ana makole ali makumi mabili ana gole (21) tjibaka tjaakabe mambo, wakabusa makole ali gumi lina gole (11) mu Jerusalema. Zina la mmeyabe liyi Hamutali nkololokadzi wa Jeremiya we Libina. 19 Wakathama mbipo mu mesho a Yahwe koga sekwakathama Jehoyakimu. 20 Kwakabe kuli nge bushongola gwa Yahwe kuti Jerusalema ne Juda dzibedzakashingikaligwa na itjetji, ngono kubupelo bakabadusa mu mesho abo. Zedekiya ka pandukila mambo we Bhabhiloni.
© Kalanga Bible © Bible Society of Botswana, 2008, 2018.