Mbimbi
1 Ngekwe kuzha kwa She wedu Jesu Kirisiti ne kukubungana kwedu kuti tishangane naye, tomukumbila zwikamu 2 kuti musitongo shangana misholo kene mukapalukamoyo, muyitiwa nge bulebesambeli kene mbiko kene lukwalo, zwinoyi zwakadwa ku tili guti zhuba la She lakatjizha kale. 3 Kushaye unomutjebela nge imwe zila, ngobe zhuba ilelo alitowozha kudzina kupanduka kuzha, na iye mbiimbi ezumbunugwa, iye wakabigigwa kuloba. 4 Unowonyanyayidza, kazwibiga pezhugwi kwe tjimwe ne tjimwe tjinodang'wa kuyi ndzimu kene tjinothigamigwa, naiko unowozwibiga pezhugwi mu Ng'umba ye Ndzimu, ezwidana eti Ndzimu.
5 Apa amutoalakana kene kuti ndakati ndi namwi ndakabe ndimubudza zwithu izwezwi? 6 Ngono ngwenu moziba kuti wakabhakhwa ngeni. Moziba kuti wakabhatigwa kuti akowozumbunugwa nge tjibaka tjakalingisana. 7 Ngobe simba gulu biibi lakasumbikala loshinga kale, koga lowozumbunugwa ha iwoyo wakalibhata adusiwa mu zila. 8 Ngono mbiimbi unowozumbunugwa, ngono She Jesu unowombulaya nge meya ye nlomo uwe, kanlobesa ngekwe kuzha kukwe. 9 Kuzha kwe mbiimbi kowobe kuli kushinga kwa Satani, iye uno shingisa masimba akasiyana siyana nenge zwilakidzo ne matjenamiso e manyepkhwa, 10 nenge bubi gose gwakasiyana siyana gwe butjakwani gunotjebela ibabo banowoloba, ngobe bakalamba kuda malebeswa kuti ndizo batjidziwe. 11 Ngekwa ikoku Ndzimu unobatumila tjidzimilabgwe tjikulu kuti ndizo bagalemoyo mu manyepkhwa, 12 kuti ndizo basakagalamoyo mu malebeswa koga bakazipigwa nge mbipo, bose babong'we nlandu.
Makashaluligwa kutjidziwa
13 Koga takafanila kuboka Ndzimu misi yose nge kwenyu zwikamu zwinodiwa ndi She, ngobe kudwa tjose mu kutangisa, Ndzimu wakamushalulila kutjidziwa nge nshingo we Meya inoyengemadza nenge kugalamoyo kwenyu mu malebeswa. 14 Wakamudanila ikoku nge ndebo mbuya yedu kuti namwibo mube ne gobe mu gudzo la She wedu Jesu Kirisiti. 15 Ndizo, zwikamu, imani makasima kakale mubhatilile mu zwidiyo zwatakapitshila kumuli ne nlomo kene nge lukwalo.
16 Dzene tshene She wedu Jesu Kirisiti nge kukwe ne Ndzimu Tate bedu, ibo bakatida, kakale bakatipa nyaladzo isingapele ne kugalabgwe kwakalulwama nge ngoni dzabo, 17 dzene bangadwilila bakasimisa mimoyo yenyu, mu nshingo mmwe ne mmwe wakanaka nenge dama lakanaka.
© Kalanga Bible © Bible Society of Botswana, 2008, 2018.