Kula kwe dziyidziwa
1 Mu tjibaka itjetjo Mambo Herode katangisa kudziyidza bamwe be gubungano. 2 Ngono kabulaya Jakubo nkulu wa Johani nge bukanu. 3 Kati ebona kuti ikoku kwashathisa Bajuta, kadwilila kabhata Pita. Ikoku kwakashingikala mu tjibaka tje Nzano we Tjiwunga tjisina mbidzo. 4 Herode kati asunga Pita kanlonga mu ng'umba ye busungwa, kwaakayisiwa kulindiwa nge makoko manna enlinda nge kulabadzana, limwe ne limwe layo lina balume banna. Wakabe akazwimisila kuti unowonsumikilisa mbeli kwe bathu shule kwe Nzano we Kupinda pezhugwi. 5 Ndizo Pita kagadziwa mu ng'umba ye busungwa, koga gubungano likantembezelela nge masimba ku Ndzimu.
Pita unosunungugwa mu ng'umba ye busungwa
6 Mu busiku gwakabe Herode ewomuka enzhisa mbeli kwe bathu, Pita wakabe ali lele pakati kwe balindi babili akasungwa nge ketani mbili, ngono kwakabe kuna balindi pa nkoba we ng'umba ye busungwa. 7 Tjinyolotjo ntumwa wa She kaboneka, tjedza tjikapenya mu ng'umba ye busungwa ina Pita ngono ntumwa iwoyo kazunguza Pita mu lubadu kati, “Muka ulibilidza.” Ipapo ketani dzikawa mu maboko a Pita. 8 Ntumwa we kudzimu kati, “Ambala zwiambalo uambale khwebana dzidzo.” Pita kathama sa ikoko, ngono ntumwa we kudzimu kati, “Ambala hazu dzidzo unditobele.” 9 Pita kantobela kabhuda mu ng'umba ye busungwa, koga asingazibe kuti kene tjakabe tjishingwa nge ntumwa we kudzimu tjakabe tjili tjakwako; wakabe ekumbula kuti unobona mbono. 10 Bakapinda balindi be kutanga ne be bubili bakaswika ku nkoba we zhalilo lakathamwa nge tshipi unobhudila ku nzi. Nkoba ukazwizhula, ngono bakabhuda. Bakatobela zila bakanowila mu imwe zila kakale, ngono tjinyolotjo ntumwa kasiya Pita.
11 Ipapo Pita kadzimunuka ngono kati, “Ngwenu ndoziba nge malebeswa kuti She batuma ntumwa wabo kundiangulila mu maboko a Herode ne mu tjimwe ne tjimwe tjabe tjiyi tjowoshingikala nge Bajuta.”
12 Kati abona ikoku, kayenda ku nzi wa Mariya, mme ba Johani wakabe limwe zina lile lili Mako, kwakabe kwakakubungana bathu banjinji betembezela. 13 Pita kakokodza pa nkoba utjakuzhe, ngono nlandakadzi unoyi Roda kazha kudabila. 14 Kaziba hwi la Pita, ngono kashatha kwazo kwaakalabukila shule mukati asingazhule nkoba, ngono kaleba kuti Pita umile kuzhe. 15 Bakati kunli, “Unopenga!” Koga katshambilidza kuti malebeswa. Ndizo bakadabila beti, “Ntumwa uwe.”
16 Pita iye kadwilila nge kukokodza. Gwe bupelo bakazhula nkoba, ngono bakati bembona bakatjenama. 17 Kabanyaladza nge luboko, ngono katjenesa sekwa adusiwa mu ng'umba ye busungwa ndi She. Kabe eti ku bali, “Ikoku mukubudze Jakubo ne zwikamu zose.” Ipapo kamilika kayenda ku gumwe bugalo.
18 Kukati kuyedza kukabepo kushangana misholo kukulu pakati kwe balindi ngekwe kuti Pita uponi. 19 Herode kalaya kuti ashakwe, ngono bakasimbone. Ndizo kabhuzwisisa balindi, ngono kalaya kuti babulawe.
Shule kwa ikoku, Herode kabhuda mu Judiya kayenda ku Sizariya kapitsha mazhubako.
Lufu gwa Herode
20 Herode kagwadzilamoyo bathu be Tire ne Sidoni kwazo, ndizo bakayenda kunli bali mbunga. Tje kutanga bakazwihwananya na Bhulasito, nlume wakabe ali iye nlingi we nzi wa Mambo kuti ababhatshe. Ipapo bakayenda kuna Herode bakankumbila mbakiso, ngobe shango yabo yakabe iwana zojiwa zwayo mu shango ya Mambo.
21 Mu zhuba lakabigwa Herode kaambala hazu dzidze dze bushe, kagala pa tjigalo tjitje tje bushe kalebeleka ne bathu. 22 Bathu bakamimila beti, “Ate hwi le nthu koga ngele ndzimu!” 23 Tjinyolotjo ntumwa wa She kaloba Herode, ngobe asingalumbidze Ndzimu. Kajiwa nge wonyana kafa.
24 Koga dama le Ndzimu likadwilila ngokula ne andama.
25 Bhanabhasi na Saulo bakapedza nshingo wabo, ngono bakashanduka mu Jerusalema, bakatola Johani wakabe kakale edang'wa kuyi Mako.
© Kalanga Bible © Bible Society of Botswana, 2008, 2018.