Paulo unozwimila mbeli kwa Agiripa
1 Agiripa kati kuna Paulo, “Una ndetjedzelo kuzwilebelekegwa.” Paulo katambunudza luboko gugwe kazwimila sahwoku:
2 “Mambo Agiripa! Ndozwikumbula ndina phazha kuti nasi ndizwimile mbeli kuko mu zwithu zose Bajuta zwabanonditjeta ndizo, 3 ngobe uziba zubuyanana milenje ne ndebo dze Bajuta dzabanonyanyayidzana mudzili. Ndizo ndomukumbila kuti mundihwilile nge moyonlefu.
4 “Bose Bajuta banoziba sekwa ndakatjila kudwila ndili ntukununu. Banoziba sekwa ndakapitsha butjilo gwangu gose, kutanga mu shango ya kanyi kwedu nenge ku Jerusalema. 5 Kwabe ntolo beziba, ha beda kutendeka kuti kudwa mu kutangisa ndakatjila ndili ndungululo ye bhiko le milayo yakasima kwazo ye kunamata kwedu, le Bafarasi. 6 Ngono ngwenu ndimile pano ndisumikilisiwa ngekwe kugalabgwe kwandinako mu kugadziwabgwe kwa bobatategulu nge Ndzimu, 7 itjo tjithu njudzi dza kanyi kwedu dzili gumi lina mbili tjadzinogalabgwe kuamutjila, dzinamata Ndzimu siku ne sikati dzakalongamoyo. Ngono ngekwa ikoku kugalabgwe, Mambo, Bajuta banonditilika nlandu! 8 Ini muwana kwakasima kuduma kuti Ndzimu unomusa bafi?
9 “Imi nge kwangu ndakawana kwakafanila kuti ndithame zwithu zwinjinji kunyanyayidza zina la Jesu we Nazareta. 10 Itjetjo nditjo tjandakashinga mu Jerusalema. Ndakaamutjila simba mu bapirisiti bakulu, ngono alonga bunjinji gwe bagalimoyo mu ng'umba ye busungwa; bakati besumikilisigwa lufu, namibo adumana nako. 11 Ndakabadziyidza kanjinji mu ng'umba dzose dze mitembezelo, ngono agwisa kubathama kuti batuke Ndzimu wabo. Nge kubagwadzilamoyo kukulu, ndakabadziyidza ne ku mizi ye zwitjaba zwipoga.
Paulo unoleba ngoshanduka kukwe
(Mishingo 9:1-19Mishingo 22:6-16)12 “Nditjo tjandakabendayendila ku Damasiko nge simba nenge ndayo dzinodwa mu bapirisiti bakulu. 13 Mambo, kwakabe kuli pakati kwe masikati, ndili mu zila ha ndibona tjedza tjinopenya kupinda zhuba, tjidwa pezhugwi ngono tjikapenya kundipoteleka na ibabo bakabe bayenda nami. 14 Takati tawila pasi tose, ahwa hwi liti kundili mu Tjihebheru, ‘Saulo, Saulo! Apa unondidziyidzilani kene? Unozwikubadza nge kuthula theswi dze mbambo.’ 15 Abhuzwa ati, ‘Ndimwi ani She?’ Ngono She bakadabila beti, ‘Ndimi Jesu, waunodziyidza. 16 Koga milika ume nge makumbo. Ndakuzwilakidza ngekwa ikoku, kukushalula kuti ushinge kakale ube ntendeki mu zwithu zwawandibona muzwili ne muna izwezo zwandinowokuzwilakidza. 17 Ndowokuangulila mu bathu be Iziraela ne muna Bezwitjaba ibo bandinokutuma ku bali, 18 kuzhula mesho abo, kuti ndizo bashandukile zhalima babe tjedza. Bashandukila simba la Satani bazhe ku simba le Ndzimu, kuti ndizo nge kugalamoyo kwabo mundili baamutjile kuzwiibhatigwa zwibi zwabo, ngono bawane bugalo pakati kwe bayengemali.’
Paulo unoleba ngekwe nshingo uwe
19 “Ngono ndizo, Mambo Agiripa, andizonyanyayidza mbono yandakabona kudwa kudzimu. 20 Ndakatanga ku Damasiko, kudwapo ati ku Jerusalema ne Judiya ne kuna Bezwetjaba, ndisumikila kuti bashandukile matjinyo abo bazhe ku Ndzimu kakale bashinge mishingo inolakidza aba shanduka. 21 Ngekwa ikoku Bajuta bakandibhata ndili mu Ng'umba ye Ndzimu ngono bakagwisa kundibulaya. 22 Koga kuswikila zhuba lino ndabe ndibhatshiwa nge Ndzimu, ndizo ndimile pano kupa butendeki gwangu kuna bose, ku batukununu ne bakulukulu nge kunofanana. Tjandinoleba nditjozwatjo balebesambeli na Mushe tjabakati tjowoshingikala, 23 kuti Mesiya wakadziyila, ngono nge kube we kutanga kumuka mu bafi, kuleba tjedza tje jidzo ku Bajuta ne kuna Bezwitjaba.”
24 Kukati Paulo ezwimila nge zila iyeyi, Fesito kamilidza hwi kati “Iwe unopenga Paulo! Kuzwidiya kuko kukulu kokupengesa!”
25 Paulo kadabila eti, “Anditopenga Mbilimangenje Fesito! Ndoleba matama ana malebeswa asina bupengo. 26 Mambo banoziba ngekwe zwithu izwezwi, ndizo ku bali ndolebeleka ndakasununguka, ngoti ndogalamoyo kuti zwithu izwezwi azwizobalashikila ngoti azwizoshingikalila mu ikotjo. 27 Mambo Agiripa, apa mogalamoyo balebesambeli kene? Ndoziba kuti mobagalamoyo!”
28 Agiripa kati kuna Paulo, “Apa unokumbula kuti mu tjibaka itjetji tjifutshwanana unowondithama Nkirisiti kene?”
29 Paulo kadabila eti, “Kene tjibaka tjifutshwana kene tjilefu, ntembezelo wangu ku Ndzimu hwuti kusibe imwi koga nanga na bose makandihwilila nasi, mube tjandili itjo, kuzhe kwe ketani idzedzi!”
30 Ipapo mambo ne mbusi na Bherinisi ne bakabe bali gele nabo bakamilika, 31 ngono bakati badwa ipapo, bakalebesana beti, “Nlume iwoyu aazothama tjimwe tjaangafila kene kuli kulongwa mu ng'umba ye busungwa.” 32 Ngono Agiripa kati kuna Fesito, “Nlume iwoyu unobe asunungugwa ha asakabe asapitshila ndebo kuna Kaisara.”
© Kalanga Bible © Bible Society of Botswana, 2008, 2018.