Ihwani mambo
1 Ndiyani unonga nthu wakatjenjela? Kakale ndiyani unoziba tjeneso ye tjithu? Butjenjedu gwe nthu gopenyesa tjiso tjitje, ne buso gugwe gwakafubala goshatha.
Bhulutanani mambo
2 Londolodza nlayo wa mambo, ngoti wakatuna mbeli kwe Ndzimu. 3 Usitjimbidze wadwa mbeli kwa mambo. Usime ha ndebo yakabipa, ngobe unoyita tjaanoda. 4 Ngobe dama la mambo ndilo le bupelo, iko ndiyani ungati kunli, “Unothamani?” 5 Iye unolondolodza nlayo aangawigwe nge mbhatsha ne nkumbulo we nlume wakatjenjela unowoziba tjibaka ne zila. 6 Ngoti ndebo i mmwe ne i mmwe ina tjibaka tjayo ne zila yayo, nenguba nthu epawugwa nge mang'oni awe. 7 Ngekuti aatoziba tjinowobepo, kakale ndiyani unowombudza kuti kowobepo nge zila yakatini? 8 Akuna nthu una simba pezhugwi pe meya kene una simba le kulaula zhuba le lufu, akuna unosiyiwa ha kuyendiwa ku ngwa, ne bubi agunga sunungule ibabo banoguthama.
Babiibi ne balulwami
9 Kose ikoku ndakakubona ipapo ndilingisisa ne nkumbulo wangu kose kunoshingwa mu shango, ha bona bathu bakabhatisana kunolema behwisana zogwadza. 10 Kudwapo ndakabona bathu babi be biganyiwa, bakatongobe bengina bebhuda mu Bugalo gwakayengemala, bakabe bekudziwa ha beshinga bubi igogo. Ikokubo madatha. 11 Ngekuti kulobgwa shamu kulobegwa nlandu wathamiwa kusinga shingikadziwe tjinyolotjo, mimoyo ye bathu yakazwimisila kuthama mbipo. 12 Nenguba ntjinyi angathama bubi ka zana (100), e tjila lubaka gulefu, koga ndoziba kuti kowolulwamila ibabo banotja Ndzimu, ngobe banoutja, 13 koga akutowolulwamila mbimbi, ntome Ndzimu aungathame butjilo gugwe bulefu kufanana ne ntutshi ngobe aatotja Ndzimu. 14 Kuna madatha anoshingikala mu shango, balulwami kwabanoshingikaligwa nge zwithu zwakafanila shingikalila babiibi, kakale kuna babiibi banoshingikaligwa nge zwithu zwakafanila shingikalila balulwami. Ndakati ikokubo madatha. 15 Kwazo ndokulumbidza lushatho, ngobe nthu aana tjibuya mu shango kuzhe kwe ja ne ng'wa ne kuzwishathisa, ikoku kowogala naye mu kushinga kukwe kwe mazhuba e butjilo gugwe gwaakapiwa ne Ndzimu mu shango. 16 Ndakati ndilonga meya mu nyama kushakisisa kuziba butjenjedu ne kubona tjinoshingikala mu shango tjekuti mesho e nthu atobona hwope siku ne sikati, 17 ndipo pa ndakabona yose mishingo ye Ndzimu, kuti nthu aangazwizibe zose zwinoshingikala mu shango. Kutobe nthu angashakisisa nge kwako kungapani, aangake akakuwana nenguba nthu wakatjenjela ezwidwa eti unoziba, aangake akakubona.
© Kalanga Bible © Bible Society of Botswana, 2008, 2018.