Esita 2 - Kalanga Bible (KBTP)

Esita unobe Nfumakadzi

1 Kwakati shule kwe zwithu izwezwi, Mambo Ahasurusi asinowiligwa kakumbula ngekwa Nfumakadzi Vashiti ne zwaakayita nenge ndaulo yaakadusa nge kukwe. 2 Ngono bakumbuludzi ba mambo bakan'dwa bakati “Imani mushakigwe baanadi bakanaka basathu bakaziba balume. 3 Dusani makulukota mu mituthu yose yenyu kuti bakubunganye baanadi ibaba bose bakanaka ku Harimo ku ng'umba ya mambo mu Susa. Mutole Hagayi we ngomwa iye wakalingilila bakadzi kuti ibe iye nlingilili wabo ngono baanadi ibaba bapiwe zose zwinobanakisa. 4 Ngono ha kuna mwanadi pakati kwabo unomushathisa mutole iye mu bumo gwe Nfumakadzi Vashiti.” Nkumbulo iwoyu ukashathisa mambo kwazo ngono kathama saikoku.

5 Ngono kwakabe kuna Njuta we nsha wa Bhenjamini egala mu ng'umba ya mambo ye Susa edang'wa Modekayi ali nkololo wa Jairi, Jairi ali nkololo wa Shimeyi, Shimeyi ali nkololo wa Kishi. 6 Kishi wakabe ali mmwe we bathu bakabe batapiwa mu Jerusalema ne mambo we Bajuta Jekoniya, bakabe batapiwa ndi Mambo Nebukadineza mambo we Bhabhiloni. 7 Modekayi ndiye wakalela mwana wa batatenini babe Hadasa iye unodang'wa Esita, asinobe afigwa ndi mmeyabe na tate babe. Modekayi wakabe ali gamu la Hadasa le bhuda ndibhude, ndizo akantola kanthama mwana uwe. Hadasa ihwoyo wakabe akanaka kwazo. 8 Ngono kukati ndaulo ya mambo isinozibisiwa bathu ne baanadi bakubunganyigwa ku ng'umba ya mambo mu Susa kakale batjibe pasi kwa Hagayi we nlingilili we bakadzi, Esita wakabe mmwe we baanadi bakatolegwa ku ng'umba ya mambo naiyebo kabe pasi kwa Hagayi. 9 Ngono Hagayi kati elinga mwanadi Esita kanshathisa kwazo, katangisa kampa zwinozhogwa zwinothama kuti anake kwazo ne zojiwa ali ega zwakatini ne balandakadzi banonshinga bali kutendeka bakashagwa mu bamwe banoshinga mu ng'umba ya mambo. Esita kanogala ku magalo akanaka ku ng'umba ye bakadzi. 10 Modekayi wakabe adwa Esita kuti asitongoleba ludzi gugwe kene makamu awe ndizo Esita kathama tjaakadwiwa, kasilebe. 11 Zhuba ne zhuba Modekayi wakabe eyenda yenda mbeli kwe ng'umba ye bakadzi kuti azibe kuti Esita utjani. 12 Baanadi bakabe begala mimwedzi ili gumi lina mibili bezwinakisa basathu bakayenda kuna mambo sekwakabe ili fanilo. Bakabe begala mimwedzi ili tathatu bezhola mafuta akathamwa nge nti unoyi mira, mimwedzi mimwe mitathatu bezhola zwinonuhwa zwinozipa ne zwithu zwe bakadzi zwinobanakisa. Bakabe beti ha baligila mimwedzi iyeyi ndiko kwabanga yenda benobona mambo. 13 Ngono kwabe kuti ha mwanadi eyenda kuna mambo wakabe epiwa tjimwe ne tjimwe koga tjaakumbila tjinonnakisa kuti ungayenda natjo ku ng'umba ya mambo. 14 Mwanadi wakabe eyenda kuna mambo mu madekwana ngono ekobuya mu mangwanana e tjimuka eyenda ku ng'umba ye bubili ye bakadzi, yakabe yakalingisana na Shashegazi we ngomwa wakabe ali iye wakalingisana ne bakadzi ba mambo. Wakabe asingake kabgwilila kuna mambo kuzhe kwe adang'wa ndi mambo. 15 Ngono kwakati tjibaka tjatjizha kuti Esita nkololokadzi wa Abihaile batatenini ba Modekayi, iye wakantola kanlela kayenda kuna mambo kakumbila tjaakabe adwiwa ndi Hagayi ngomwa ya mambo kakale ali nlingilili we bakadzi. Ngono Esita wakashathisa mmwe ne mmwe wakabe embona. 16 Kwakabe kuli mu mwedzi we bugumi we Tebeti, mu gole le kutendeka le mbuso wa Mambo Ahasurusi, ha Esita eyisiwa kuna mambo. 17 Ngono mambo kada Esita kupinda bakadzi bose, mu baanadi bose kawana ada Esita kupinda ngono kambadza tjiala tje bushe mu bumo gwa Nfumakadzi Vashiti. 18 Mambo bakathamila makulukota awe ne balanda babe mabhikwa makulu kuli kushathila Esita. Kakale mambo wakati kube ne zhuba le kunyaluluka mu mituthu yose, kakale kadusa zwipo sekwakabe kwakawolobeleka.

Modekayi unotjidza mambo

19 Mu tjibaka itjetji Modekayi wakabe abigwa mmwe we makulukota a mambo. 20 Esita iye wakabe asathu akazwizibisa bathu kuti Njuta koga sekwa akabe adwiwa kuti asilebe ndi Modekayi atji ntukununu. 21 Mu tjibaka itjetjo tja Modekayi ali mmwe we makulukota a mambo, makobgwa a Mambo Bhigithani na Tereshi ibo bakabe bakalingisana nge magalo a mambo, bakamukilana na mambo ngono bakazhigwa nge nkumbulo we kubulaya Mambo Ahasurusi. 22 Ngono Modekayi kaziba ngekwe nkumbulo ihwoyo ndizo kazibisa Nfumakadzi Esita, Esita kadwapo kazibisa mambo tjaabudziwa ndi Modekayi. 23 Ngono kwakati kusinoshakisisiwa kukawanika kuli malebeswa, balume ibaba bakabulawa ngo sungiligwa mu thungamakole. Ngono ikoku kwakakwagwa ngekwako mbeli kwa mambo mu lukwalo gwe Zwiyitikalo.