Phashu
1 Ipapo Yahwe bakati kuna Mushe, “Yenda kuna Faro. Ndakukutadza moyo uwe ne mimoyo ye makombgwa awe, kuti ndilakidze zwilakidzo zwangu izwezwi mu bali. 2 Ndoshaka kuti namwibo mubudze bakololo benyu ne bakololo be bakololo benyu zwandakashinga Baegipiti ne zwilakidzo zwandakathama pakati kwabo kuti muzibe kuti ndimi Yahwe.”
3 Ndizo Mushe na Aroni bakayenda kuna Faro ngono bakandwa bakati, “Yahwe Ndzimu we Bahebheru bakati, ‘Unowotola tjibaka tjingapani ulamba kuzwiyisa pasi mbeli kwangu? Letja bathu bangu bayende kuti banondinamata. 4 Koga ha ulamba kuletja bathu bangu kuti bayende, bona, mangwana ndowozhisa phashu mu shango iyo. 5 Ngono dzowozwimba pasi pakasala pasingaboneke dzikabuya dzikaja tjamakasiyigwa nge tjivulamabgwe, kakale dzikaja nti mmwe ne mmwe unomela mu shango. 6 Dzowozhala mu ng'umba dzidzo ne mu ng'umba dze makombgwa awo wose ne dze Baegipiti bose, kuthu kusakatongo bong'wa ndi botate benyu kene ndi bobatategulu benyu kudwila mu zhuba labakabeyapo mu shango kuswikila zhuba lino.’ ” Ipapo Mushe kabhuda kadwa pana Faro.
7 Makombgwa a Faro akambhuzwa akati, “Kowobe tjibaka tjingapani iwoyu nlume etidziyidza kene? Letjani bathu ibaba bayende banoshingila Yahwe Ndzimu wabo, apa amuthu mukapedzisisa kuti shango ye Egipiti yathukudzika kene?”
8 Ndizo Mushe na Aroni bakashandusigwa kuna Faro, ngono iye kabadwa kati, “Yendani munonamata Yahwe Ndzimu wenyu. Koga ndiboani mu muli bakafanilo yenda?”
9 Mushe kashandula eti, “Towoyenda tose bakulu ne batjetjana, toyenda ne bakololo ne bakololokadzi bedu ne zwithuwo zose zwedu, ngoti takafanila thamila Yahwe Ndzimu wedu nzano.”
10 Ngono Faro kabadwa kati, “Tjinga tjekwa tjikalashwa ha ndingamuletja mukayenda ne bana benyu! Bonani, kupatjena kuti makazwimisila kuthama tjakabipa. 11 Andidi! Yendani imwi balume koga, munonamata Yahwe ngoti ndiko kwamunoyemula.” Ipapo Mushe na Aroni bakabe betatiwa pana Faro.
12 Ipapo Yahwe bakadwa Mushe bakati, “Milidzila luboko gugo pezhugwi kwe shango ye Egipiti kuti phashu dzizhe muili dzije zwinomela zose zwakasiyiwa ne tjivulamabgwe.” 13 Ndizo Mushe kamilidzila ludozo gugwe pezhugwi kwe shango ye Egipiti ngono Yahwe bakazhisa phepo ye ku bhezhuba mu shango zhuba lose ilelo ne busiku gose. Kwakati kuyedza phepo ikabe yazhisa phashu. 14 Ngono phashu dzikaandama nge shango yose ye Egipiti dzikaidzinga yose dzikabe nlunda nkulu usakatongobepo, kakale usingatjawobepo mu Egipiti. 15 Dzakabe dzakamomotela shango yose dzithama kuti shango ibe zhalima, ngono dzikaja zose zwinomela mu shango iyeyo ne mitjelo yose ye miti yakabe yasiyiwa nge tjivulamabgwe. Kwakasala kusina tjimwe tjinyolo tjadzakasiya, kose nti kene tjimwe ne tjimwe tjinomela mu shango mu Egipiti yose.
16 Ipapo Faro kadana Mushe na Aroni ngolibilidza ngono kabe eti, “Ndatjinyila Yahwe Ndzimu wenyu kose namwi. 17 Ndizo mundizwiibhatigwe jinyo langu ngwenu koga, ngono mundikumbilile kuna Yahwe Ndzimu wenyu kuti baduse lufu igogu mundili.” 18 Ndizo Mushe kayenda kadwa pana Faro ngono katembezela Yahwe. 19 Ngono Yahwe bakashandusa phepo kukazha inodwa ku golombedzo yakasima ikasenga phashu ikadzilashila mu Gungwa Shaba, ndizo kukasheta ne ing'ompela yakasala mu shango ye Egipiti. 20 Koga Yahwe bakakukutadza moyo wa Faro iye kasiletje bana be Iziraela kuti bayende.
Zhalima
21 Yahwe bakadwa Mushe bakati, “Milidzila luboko gugo pezhugwi kuti kube ne zhalima mu shango ye Egipiti, zhalima lakati zwititi.” 22 Ndizo Mushe katambunudzila luboko gugwe pezhugwi ngono kukabe ne zhalima linotjisa mu shango yose ye Egipiti mazhuba ali matatu. 23 Kwakabe kusina unobona mmwe, naiko kusina unobhuda pa magalo awe mu mazhuba ali matatu, koga Baiziraela bakabe bana tjedza kwabakabe begala.
24 Ipapo Faro kadana Mushe kandwa kati, “Yendani munonamata Yahwe, bana benyu bayendebo namwi; koga zwithuwo zwenyu zwisale.”
25 Koga Mushe kan'dabila eti, “Makafanila kutiletja kuti tiyende ne zwithuwo zwedu kuti tinodusa zwibhayilo ne zwibhayilo zwinopisiwa, kuti tibhayile Yahwe Ndzimu wedu. 26 Ng'ombe dzedu na idzobo dzakafanila yenda naswi; akuna tjadzo tjakafanila sala shule, ngoti takafanila yenda nadzo kunonamata Yahwe Ndzimu wedu. Atitoziba kuti tounamata ngeni kuswikila tiswika ikweno.”
27 Koga Yahwe bakakukutadza moyo wa Faro ngono kasibaletje kuti bayende. 28 Ipapo Faro kandwa kati, “Idwa pandili uzwiyele njele, usitongobona buso gwangu kakale, ngoti mu zhuba launogubona unowofa.”
29 Mushe kashandula kati, “Sekwa munoleba malebeswa! Anditowobona buso gwenyu kakale.”
© Kalanga Bible © Bible Society of Botswana, 2008, 2018.