Baiziraela betjuluka Gungwa Shaba
1 Ipapo Yahwe bakadwa Mushe bakati, 2 “Idwa bathu be Iziraela bashanduke banothibelela pakalingisana ne Pihahiroti, pakati kwe Migidolo ne gungwa, pakalingisana ne Balizefoni. Mukotokele ipapo pa gungwa. 3 Faro unokumbula kuti Baiziraela, banopungayila mu shango bazhaliligwa nge tjilambanyika. 4 Ngono ndowokukutadza moyo wa Faro, ngono unowobatobela, koga imi ndowokudziwa nge kukunda kwangu ndikunda Faro ne bunji gwaanago. Baegipiti banowoziba kuti ndimi Yahwe.” Ndizo Baiziraela bakathama saikoko.
5 Kwati Mambo we Egipiti ebudziwa kuti Baiziraela bayenda, nkumbulo wa Faro ne makombgwa awe ukashandukila bathu be Iziraela, ngono bakazwidwa bakati, “Ini ikoku kwatathama dumbu tiletja Baiziraela beyenda besiya kutishingila?” 6 Ndizo kalulwamisa koloyi dzidze, kayenda ne babhayani babe. 7 Ngono katola koloyi dze ngwa dzakashalugwa dzili mazana ali matathatu (600) ne dzimwe koloyi dzose dze Egipiti dzina batjengeti dzose. 8 Yahwe bakakukutadza moyo wa Faro Mambo we Egipiti ngono katobela bathu be Iziraela bakabe beyenda betshamba se bakundi. 9 Baegipiti bakabatobela, babhayani bose ba Faro, mbizi ne koloyi dze ngwa ne batathi badzo. Bakababhata pa gungwa batji mu mishasha yabo pa Pihahiroti pa kalingisana ne Balizefoni. 10 Faro wakati abe pejo bathu be Iziraela bakamilidza mesho ngono bakabona Baegipiti bakabasala shule, ngono bakazhigwa ngotja kukulu. Baiziraela bakalilila kuna Yahwe. 11 Ngono bakadwa Mushe bakati, “Apa koikhwa nge kuti atina zwikumbu mu Egipiti, ndizo wali watidusa kuwofila mu tjilambanyika kene? Watithamilani nge kutidusa mu Egipiti kene? 12 Apa ate itjo itjetji tjatakakubudza titji mu Egipiti titi, ‘Utiletje, utisiye tishingile Baegipiti kene? Kwabe kungayita kuti tishingile Baegipiti pana kuti tifile mu tjilambanyika.’ 13 Ngono Mushe kadabila bathu kati, ‘Musitje, simani, ngono mowobona jidzo la Yahwe labanowomuthamila nasi, ngoti Baegipiti ibaba bamunobona nasi amutjowobabona kakale. 14 Yahwe banowomugwila, imwi dzikamani koga.’ ”
15 Yahwe bakati kuna Mushe, “Ini mulilila kundili kene? Idwa Baiziraela bayendile mbeli. 16 Milidza ludozo gugo, utambunudzile luboko gugo pezhugwi kwe gungwa ugupalalanye kuti Baiziraela batjuluke gungwa betshamba pasi pakawoma. 17 Koga ndowosimisa mimoyo ye Baegipiti kuti ndizo bangine mu gungwa bebatobela, koga ndowokudziwa nge kukunda Faro ne bunji gwaanago gwe koloyi dze ngwa ne be mbizi dze ngwa. 18 Mukukudziwa kwangu ngo kunda Faro ne koloyi dzidze dze ngwa Baegipiti banowoziba kuti ndimi Yahwe.” 19 Ipapo ntumwa we Ndzimu wakabe akatungamila Baiziraela kabuyila shule kwabo, ndizo gole likadwa mbeli kwabo likanoma shule kwabo, 20 likama pakati kwe Baegipiti ne Baiziraela. Ndizo gole likabe zhalima ku Baegipiti ku Baiziraela likabe tjedza busiku gose bakasitongo shangana.
21 Mushe katambunudzila luboko gugwe pezhugwi kwe gungwa, ngono Yahwe bakasundila vula ye gungwa shule nge phepo yakasima ye ku bhezhuba busiku gose bakathama gungwa kuti gube pasi pakawoma bapalalanya vula. 22 Baiziraela bakangina mu gungwa beyenda pasi pakawoma, vula yakathama makuma mbizho dzabo dzose, ku luji ne ku lumeshwe. 23 Baegipiti bakabatobela, bakangina pakati kwe gungwa, kose ne mbizi dzose dza Faro dze ngwa ne batathi badzo ne koloyi dze ngwa. 24 Ngono kukati nge mazhokuyedza, Yahwe bali mu bibi le moto ne mu shongwe ye gole, bakalinga ngwa ye Baegipiti pasi bakabahwumanya. 25 Yahwe bakasimisa makumbgwana e koloyi akayenda ngolema, ngono Baegipiti bakalebesana beti, “Ngatitizheni Baiziraela ngoti Yahwe banobagwila.” 26 Ipapo Yahwe bakadwa Mushe bakati, “Tambunudzila luboko gugo pezhugwi kwe gungwa kuti vula dzikwitidze Baegipiti ne koloyi dzabo dze ngwa ne batjengeti be mbizi.” 27 Ndizo Mushe katambunudzila luboko gugwe pezhugwi kwe gungwa, ngono gungwa gukabgwilila mu tjimo tjago koyedza. Baegipiti bakatizha mu guli koga Yahwe bakabakubila mu gungwa. 28 Vula ikashanduka ikakwitidza koloyi dze ngwa ne batjengeti be mbizi ne babhayani bose ba Faro bakabe babatobela mu gungwa, kukasibe ne nng'ompela wasala. 29 Koga Baiziraela bakayenda betshamba pasi pakawoma betjuluka gungwa, vula ili makuma ku luboko luji ne ku lumeshwe. 30 Ndiko Yahwe sekwa bakaangula Baiziraela mu Baegipiti mu zhuba ilelo, ngono Baiziraela bakabona zwitumbu zwe Baegipiti mu phili dze gungwa. 31 Baiziraela bakabona nshingo nkulu washingwa ndi Yahwe mu Baegipiti, ngono bakatja Yahwe bakagalamoyo muna Yahwe ne mu nlanda wabo Mushe.
© Kalanga Bible © Bible Society of Botswana, 2008, 2018.