Abhuramu na Loti banothubukana
1 Ndizo Abhuramu kabhuda mu Egipiti kayenda ku Negebu ne nkadzi uwe ne tjimwe ne tjimwe tjaakabe anatjo, na Loti kayenda naye. 2 Ngono Abhuramu wakabe akafuma kwazo. Wakabe ana zwithuwo ne siliva ne golide. 3 Kudwa mu Negebu wakayenda edwa mu magalo mamwe eyenda ku mamwe kuswikila eswika ku Bhetele, kanoti pakati kwe Bhetele ne Ai paakatongo gala kutanga, 4 ipo paakatanga kubaka tjibeso tjinopisigwa zwibhayilo. Ngono ipapo kanamata Yahwe.
5 Loti iye wakabe eyenda na Abhuramu na iyebo wakabe ana pkhwizi ne mbudzi ne ng'ombe ne nsha uwe ne balanda. 6 Ndizo shango ikasibalizane kuti bagale bose, ngoti thundu dzabo dzakabe dzili njisa kwabakabe basingake bakagala bose. 7 Ndizo kukabe ne kuleyana pakati kwe balisi ba Abhuramu ne ba Loti. Bakanana ne Baperizi bakabe begala mu shango iyeyobo mu tjibaka itjetjo.
8 Ndizo Abhuramu kabe eti kuna Loti, “Ngakusibe ne kuleyana pakati kuko nami kene pakati kwe balisi babo ne bangu ngoti ti bana be nthu. 9 Apa shango aizozhuka mbeli kuko kene? Ngatithubukane. Ha uyenda ku lumeshwe, ndowoyenda ku luji, kene ha uyenda ku luji ndowoyenda ku lumeshwe.”
10 Loti kamilidza mesho kalinga shango ngono kabona nkuku wose we Jorodani kuti una vula pamwe ne pamwe, unofanana ne nnda wa Yahwe ne nge shango ye Egipiti, kuyendila ku Zowa. Kwakabe kuli mu tjibaka itjetjija Yahwe basathu bakalobesa Sodoma ne Gomora. 11 Ndizo Loti kashalula nkuku wose we Jorodani, ngono kamilika kayendila ku bhezhuba, ndiko bakathubukana. 12 Abhuramu kagala mu shango ye Kanana, Loti iye kagala pakati kwe mizi ye nkuku, kabaka pejo ne Sodoma. 13 Bathu be Sodoma bakabe bali babiibi, bali batjinyi bakulu mbeli kwa Yahwe.
Abhuramu unofulukila ku Heburoni
14 Kukati Loti asinothubukana na Abhuramu Yahwe bakadwa Abhuramu bakati, “Milidza mesho awo uli pauyapo ulinge ku bunandzwa ne ku burwa ne ku bhezhuba ne ku golombedzo, 15 shango yose iyeyi yaunobona ndowoipa iwe ne zwizekugwana zwizo nge kusingapele. 16 Ndowothama lutshinga gugo kuti gunge hwuluba ye shango nge bunji, kuti ha ili kuti kuna ungabala hwuluba ne zwizekugwana zwizo zwingabalikabo. 17 Milika uyende shango nge bulefu gwayo nenge bupabi gwayo ngoti ndowokupa iyo.” 18 Ndizo Abhuramu kafulusa nshasha uwe kanogala pejo ne miti mikulu ye pakayengemala ya Mamure ku Heburoni kwaakabakila Yahwe tjibeso tjinopisigwa zwibhayilo ko.
© Kalanga Bible © Bible Society of Botswana, 2008, 2018.