Tjidumano tje Ndzimu na Abhuramu
1 Shule kwe zwithu izwezwi, dama la Yahwe likazha kuna Abhuramu mu mbono liti, “Usitje Abhuramu, imi ndi tjivikili tjitjo, mbhayilo uwo unowobe nkulu kwazo.”
2 Koga Abhuramu kashandula eti, “Tetshi wangu, She Yahwe, mowondipani? Andina mwana ngono iye unowondigala thaka ndi Eliezeri we Damasiko.” 3 Ngono Abhuramu kabe eti, “Amuzondipa bana, ndizo nlanda wazwaligwa mu ng'umba yangu unowobe n'galithaka wangu.”
4 Ipapo dama la Yahwe likaswika kunli liti, “Nthu iwoyu aatowobe n'galithaka uwo, koga nkololo uwo pa nyama unowokugala thaka.” 5 Yahwe bakan'dusila kuzhe bakati, “Linga pezhugwi ubale nyenyedzi, ha ungatubula kudzibala.” Ipapo bakabe beti kunli, “Zwizekugwana zwizo zowobe zwingapo.”
6 Abhuramu kagalamoyo muna Yahwe, ngono ibo bakakutola kuli ndulamo.
7 Ngono bakandwa bakati, “Ndimi Yahwe bakakudusa ku Uri we Bakhaladiya kukupa shango iyeyi kuithuwa kube iyo.”
8 Koga iye kati, “She Yahwe, tetshi wangu ndowoziba tjini kuti ndowoithuwa?”
9 Yahwe bakati, “Zhisa pholombe ye ng'ombe ne mbudzi hadzi ne nyundo, tjimwe ne tjimwe tjazo tjibe tjina makole matatu, uzhise ne njiba ne ngurukukwana.” 10 Abhuramu kabazhisila zwithu izwezwi zose, kazwiphatula na pakati ebe ebiga mbabi edzibapisa koga nyuni kasidzithubulanye. 11 Ngono nyuni dzinoja nyama dzikagala pa mitumbu yadzo, koga Abhuramu kadzitata.
12 Kukati zhuba lingina, Abhuramu kabhakhwa nge hwope hwulu ngono zhalima linotjisa likankwididza. 13 Ipapo Yahwe bakati kuna Abhuramu, “Ziba kuti zwizekugwana zwizo zowobe bataya mu shango isiyazo, zowobashingila, ngono banowozwidziyidza makole ali mazana ali manna (400). 14 Koga ndowoloba itjaba tjazwinoshingila, shule kwa ipapo zowobhuda ne thundu isishoma. 15 Koga iwe unowofa lufu lubuya wakula ukayenda kuna botate babo. 16 Zowobuya ngeno mu tjibaka tje tjizekugwana tje bunna, ngoti mbipo ye Baamori aithu ikapelela.”
17 Kukati zhuba langina kwati zwititi, kukaboneka mbawula ina nthuto ne luvone ngono zwikapinda pakati kwe mbabi idzedzo. 18 Mu zhuba ilelo Yahwe bakathama tjidumano na Abhuramu beti, “Zwizekugwana zwizo ndozwipa shango iyeyi, kudwa pa gwizi gwe Egipiti kunoti ku gwizi bukulu Yufuratesi, 19 ne shango ye Bakeni ne ye Bakenize ne ye Kadimoni, 20 ne ye Bahiti ne ye Baperizi ne ye Barafa 21 ne ye Baamori ne ye Bakanana ne ye Bagirigashi ne ye Bajebusi.”
© Kalanga Bible © Bible Society of Botswana, 2008, 2018.