Haga na Ishimaele
1 Sarayi nkadzi wa Abhuramu wakabe asingan'wanile bana. Koga wakabe ana nlandakadzi wakabe edang'wa Haga we Egipiti, 2 ngono Sarayi kadwa Abhuramu kati, “Yahwe bakandinyima bana, nginani mu ng'umba ye nlandakadzi wangu, pamwe ndowowana bana ndiye.” Ngono Abhuramu kadumana ne tjakalebgwa ndi Sarayi. 3 Ndizo Abhuramu kati agala makole ali gumi mu shango ye Kanana, nkadzi uwe Sarayi katola Haga we N'egipiti nlandakadzi uwe kampa nlume uwe Abhuramu kube nkadzi uwe. 4 Abhuramu kangina mu ng'umba na Haga ndizo Haga kazwisenga. Kukati Haga ebona kuti wazwisenga kadeelela tetshikadzi uwe Sarayi.
5 Ndizo Sarayi kati kuna Abhuramu, “Nlandu nge wenyu muna tjandinothamiwa tjisakanaka. Ndakamupa nlandakadzi wangu mu maboko enyu, koga wati ebona kuti wazwisenga kandideelela. Yahwe ngabasumikilise pakati kwenyu nami.”
6 Ngono Abhuramu kadwa Sarayi kati, “Nlandakadzi u pasi kuko, shinga tjaunoda ndiye.” Ndizo Sarayi kadziyidza Haga, ngono Haga katizha kadwa pana Sarayi.
7 Ntumwa wa Yahwe kawana Haga pa nsenya we vula mu tjilambanyika, nsenya upa hwunde ye zila inoyenda ku Shuri. 8 Ngono Ntumwa wa Yahwe kati kunli, “Haga nlandakadzi wa Sarayi, wadwa ngayi uyenda ngayi?”
Haga kashandula eti, “Ndotizha tetshikadzi wangu Sarayi.”
9 Ipapo ntumwa wa Yahwe kati kunli, “Bgwilila kuna tetshikadzi uwo uzwiyise pasi kukwe.” 10 Ntumwa wa Yahwe kapapha kati, “Ndowowatsha zwizekugwana zwizo kwazwisingake zwikabalika nge bunji.” 11 Ntumwa wa Yahwe kandwa kati, “Bona, wakazwisenga ngono unowowana mwana we tjilisana, unowontumila zina uti Ishimaele ngobe Yahwe bahwa tjililo tjitjo. 12 Unowobe donki ye shango, tjiazha tjitje tjowobe tjibhayana ne mmwe ne mmwe ne tjiazha tje mmwe ne mmwe tjowobe tjibhayana naye. Unowogala emukilana ne be ludzi gugwe.”
13 Ndizo Haga kapa Yahwe ibo bakalebeleka naye zina eti, “Mu Ndzimu unobona,” ngoti wakati, “Apa ndabona Ndzimu kene, iwo unondibona kene?” 14 Ndizo tshime ilelo lakatumigwa kuyi Bheerilahairoyi kodwiwa kuti tshime le wabona katjila. Lipakati kwe Kadeshi ne Bheredi.
15 Haga kawanila Abhuramu mwana we tjilisana, ngono Abhuramu katumila mwana uwe waakawanigwa ndi Haga zina eti, Ishimaele. 16 Abhuramu wakabe ana makole ali makumi ali zhanakadzi ana makole ali matathatu (86) paakazwaligwa Ishimaele ndi Haga.
© Kalanga Bible © Bible Society of Botswana, 2008, 2018.