Kaini na Abele
1 Adamu kashangana ne nkadzi uwe Efa, ngono nkadzi kazwisenga kawana Kaini. Efa kabe eti, “Ndawana nkololo nge bhatsho ya Yahwe.” 2 Shule kwe tjibaka kan'wanila nnung'una Abele. Abele kabe nthuwi we pkhwizi, Kaini iye kabe nlimi. 3 Tjibaka tjakati tjiyenda, Kaini kazhisa zwimwe zwe zwidzwalo tjili tjibhayilo kuna Yahwe. 4 Koga Abele kazhisa pkhwizi ne mbudzi dzidze dzakazwagwa kutanga dzakakola. Ngono Yahwe bakayitila hanya Abele ne tjibhayilo tjitje, 5 koga bakashayila hanya Kaini ne tjibhayilo tjitje. Kaini kagwadza moyo kwazo ngono kasunamwa. 6 Ipapo Yahwe bakabhuzwa Kaini bakati, “Wakagwadzilani moyo? Ini wakasunamwa? 7 Apa ha ushinga tjakanaka aungaamutjigwe kene? Koga ha usingashinge tjakanaka, tjibi tjikulelile pa nkoba, tjoyemula kukulaula, koga iwe utjikunde.”
8 Kaini kalebesana ne nnung'una uwe Abele kati, “Ngatibhudile kuzhe ku shango.” Ngono bakati babe ku shango, Kaini kamukila nnung'una uwe Abele kambulaya.
9 Ngono Yahwe bakabhuzwa Kaini bakati, “Nnung'una uwo Abele ungayi?”
Kadabila eti, “Anditoziba. Apa ndi nlisi we nnung'una wangu kene?”
10 Ndizo Yahwe bakabe beti, “Wathamani kene? Malopa e nnung'una uwo anolilila kundili kudwa mu mavu. 11 Ngono ngwenu wabe ne bhiso, ngono watatiwa mu shango iyeyi yaashamisa nlomo wayo kuamutjila malopa e nnung'una uwo kudwa mu luboko gugo. 12 Unowoti ulima, pasi apatjawodusa zwizwalo. Iwe unowobe n'yendan'yendi ne ndzungayili mu shango.”
13 Kaini kabe eti kuna Yahwe, “Shamu yandalobgwa inondikulila. 14 Bonani, nasi manditata mu shango, anditjowoboneka pamulipo. Ndowobe n'yendan'yendi ne ndzungayili mu shango. Mmwe ne mmwe wandiwana, unowondibulaya.”
15 Koga Yahwe bakati kunli, “Akuzojalo, ha mmwe nthu angabulaya Kaini, unowobgwilizigwa shamu dzili kutendeka.” Ndizo Yahwe bakatjwaya Kaini kuti kusitongoyita ungan'wana kammbulaya. 16 Ipapo Kaini kadwa pana Yahwe kanogala mu shango ye Nodi, ku bhezhuba kwe Edeni.
Zwizekugwana zwa Kaini
17 Kaini kashangana ne nkadzi uwe ngono nkadzi kazwisenga kawana Enoki. Ipapo Kaini kabaka nzi nkulu, ngono kaudana nge zina le nkololo uwe Enoki. 18 Enoki kazwala Iradi, Iradi kazwala Mehujaeli, Mehujaeli kazwala Methushaele, Methushaele kazwala Lameki. 19 Lameki kalobola bakadzi babili, mmwe edang'wa kuyi Ada, mmwe kuyi Zila. 20 Ada kazwala Jabala, Jabala wakabe tate be ludzi gwakabe gugala mu mishasha guli bathuwi. 21 Nnung'una uwe wakabe eyi Jubala, iye wakabe ali tate be balidzi be tjilidzo tje laya ne nyele. 22 Zila iye kazwala Tubalakaini, oyu wakabe nthuli we zwija zwakathamiwa nge phangula ne tshipi. Hazwadzi ya Tubalakaini yakabe ili Naama.
23 Lameki kati ku bakadzi babe,
“Ada na Zila, mundihwilileni,
imwi bakadzi ba Lameki, ihwani matama angu.
Ndabulaya nlume ngoti andikubadza,
nzhuzha wandihwisa zogwadza.
24 Ha kubulaya Kaini kubgwilizigwa shamu dzili kutendeka,
wabulaya Lameki unowobgwilizigwa
dzili makumi ali kutendeka ana dzili kutendeka (77).”
Seti na Enoshi
25 Adamu kashangana ne nkadzi uwe kakale ngono kawana mwana we tjilisana kantumila eti Seti, edwa kuti, “Ndzimu wandipa mmwe mwana mu bumo gwa Abele wakabulawa ndi Kaini.” 26 Seti iye kawanabo mwana we tjilisana kantumila eti Enoshi. Mu tjibaka itjetjo bathu bakatangisa kudana zina la Yahwe.
© Kalanga Bible © Bible Society of Botswana, 2008, 2018.