Kusumikilisiwa kwe bupelo kwa Iziraela
1 Ifureimi wakabe eti ha elebeleka, balume banotetema,
wakabe akakudziwa mu Iziraela.
Koga wakabe ne nlandu we kunamata Bhaale ngono kafa.
2 Ngono ngwenu banotjinya bepaphulula,
bezwithamigwa midzimu ye zwifano nge siliva,
beithama nge bunyambi gwabo,
kose kuli mishingo ye babezhi.
Banoti, “Muzwi bhayile zwibhayilo.”
Bathu bebe beputa midzimu ye ifano tje phulu.
3 Ndizo wali banowofanana ne fulele ye mangwanana,
befanana ne khawa inoshashamuka mangwanana,
benga bunye gunowuluka gudwa panoshokolegwa,
se busi gunobhuda nge fesitere.
4 Ndagala ndili Yahwe Ndzimu wenyu
koga kudwa ku Egipiti.
Akuna mmwe Ndzimu wamunga ziba usi imi,
akuna mmwe Ntjidzi andisi imi.
5 Ndakamuziba amutjengeta mu tjilambanyika
mu shango yakawomelela.
6 Ndakati ndibapa zojiwa bakagutshika,
bakati beguta bakazwida
ipapo bakandikangang'wa.
7 Ndizo wali ndowobanginilila se shumba,
ndowoyedza ngwe ndibalalila pa zila.
8 Ndowobatjulukila se bhira yatolegwa bana bayo,
ngono ndowomwandawula bhetelo le moyo wabo.
Ndowobaja se shumba,
se tjibandana tjingabamwawulanya.
9 Iwe Iziraela ndowokukolomodza,
ndiani ungakubhatsha kene?
10 Ungayi mambo uwo, kuti akutjidze?
Bangayi batungamili babo mu mizi iyo yose
bawakati nge kwabo,
“Mundipeni mambo ne batungamili?”
11 Ndaka kupa mambo mu kugwadza moyo kwangu,
ngono mu bushongola gwangu an'dusa.
12 Jinyo la Ifureimi lakasungiligwa,
tjibi tjitje tjakabiganyiwa.
13 Zwibhayo zwinonga zwe kutshibama zonzhila,
koga iye nkololo usakatjenjela.
Ha tjibaka tjiswika
aatosedzela pa nkoba we tjibumbilo.
14 Ndowobadzutunula mu masimba e ikumbu,
ndowobadzutunula mu lufu.
Iwe lufu zwibhayo zwizo zwingayi?
Iwe ikumbu kukolomodza kuko kungayi?
Imi anditjawobe ne ngoni.
15 Kene angabhudilila pakati kwe bana ba tate babe,
phepo yeku bhezhuba inowozha idwa kuna Yahwe
itutudza idwa mu tjilambanyika.
Misenya iye ye vula inowopela
ne tshime lile lowopkhwa.
Fumwa imu dula lile inowotapiwa,
kose kwakanaka kumulili.
16 Samariya inowosengana ne jinyo layo,
ngoti yakapandukila Ndzimu wayo.
Inowoligwa nge thumo,
ngawana dzayo dzowopkhwanyigwa pasi,
bakazwisenga muili banowopalugwa mitumbu.
© Kalanga Bible © Bible Society of Botswana, 2008, 2018.