Baiziraela banodang'wa kuti bashanduke
1 Buyani, ngatishandukileni kuna Yahwe,
ngoti ndibo bakatimwawulanya, ngono banowotipodza,
bakatikubadza, ngono banowozwimba mabanga edu.
2 Shule kwe mazhuba mabili banowotimusidzila
mu zhuba le butatu banowotimusa,
kuti titjilile pabali.
3 Ngatizibeni Yahwe,
ngatimuseni meya kuziba Yahwe.
Kuzha kwabo ku malebeswa se kubhuda kwe zhuba,
banowozha kutili se vula,
se vula ye tjibodza mashanga mu shango.
Yahwe banoshandula
4 Ndingashingani nawe kene Ifureimi?
Ndingashingani nawe kene Juda?
Ludo gugo gofanana ne fulele inotjimbidza pela,
gonga khawa ye mangwanana inoshashamuka.
5 Ndizo wali ndowomuthubulila nge balebesambeli
ndikamubulaya nge matama e nlomo wangu,
kusumikilisa kwangu kozha ku muli se lupenyo.
6 Ngoti tjandinoshaka ludo gusingazunguzike, kusi tjibhayilo
kuziba Ndzimu pana kupinda zwipo zwinopisiwa.
7 Koga bakatjinya tjidumano sa Adamu,
bakandishetela kugalabgwe ikweno.
8 Giliyadi nzi nkulu we bathu babiibi
unashambgwa ye matshambo azhele malopa.
9 Se batoleli bebgwatilila nthu,
makoko e bapirisiti anothamabo saikoko.
Banobulaya mu zila ye Shekemu
bethama milandu inobhatisa shoni.
10 Ndakabona tjakabipa
mu bathu be Iziraela.
Ikweno Ifureimi wakazwipa mu bufukula
ngono Iziraela yatemapala.
11 Nawebo, iwe Juda,
nsi we kuvuna wakawubigigwa.
Ndowobe ndibgwiliza makombolelo e bathu bangu.
© Kalanga Bible © Bible Society of Botswana, 2008, 2018.