1 Ndoti ndipodza Iziraela,
matjinyo a Ifureimi akazumbunuka
ne mishingo mibi ye Samariya.
Ngoti banotjebela,
mbava dzothukila mu ng'umba,
makoko e batoleli anotolela mu zila.
2 Koga abatoalakana
kuti ndokumbula mija yabo yose mibiibi.
Zwibi zwabo zwakabakomba,
misi yose zwimu mesho angu.
3 Bakashathisa mambo nge mija yabo mibi,
nge manyepkhwa abo bakashathisa babusi.
4 Bose koga i phombgwe
banopisika se tjibeso tjinopisigwa zwibhayilo tjina moto,
tjinoti mbhiki kasishete kuti atjifulushe
kudwa pakuvanga bgwisa kunoti tjiwunga tjibila.
5 Mu zhuba le nzano wa mambo wabo,
makulukota banoti bakagwala begwalisiwa nge nkumbi we zhambi,
mambo ebhatshanya maboko ne badadili.
6 Mimoyo yabo inopisa se tjibeso tjinopisigwa zwibhayilo
be sedzela panli nge kubilibindana.
Kuzhalilana mu kugwadza moyo kwabo kokula busiku gose,
mu mangwanana kube kuthuta se nthuto.
7 Bose koga banopisa se tjibeso tjinopisigwa zwibhayilo,
ngono banoja batungamili babo.
Bomambo babo bose bawa
ngono akuna unondidana.
8 Ifureimi unozwishangashanganya ne njudzi
Ifureimi tjiwunga tjabhikwa tjikasishandugwe.
9 Bataya banoswipa masimba awe,
koga aatobona.
Mavudzi awe abe ne vi apaje na apaje,
koga aatoziba.
10 Kuzwida kwa Iziraela kotendeka nge kukwe,
ngono nekwakajalo
aatobgwilila kuna Yahwe Ndzimu uwe
kene kuushaka ngekwa ikoko kose.
11 Ifureimi unonga njiba
isina njele isina nkumbulo,
Banodana Egipiti kubhatsha,
bakatizhila ku Asiriya.
12 Banowoti beyenda, abaangila nge gwanga gwangu,
ndowobakwebela pasi se nyuni dzinowuluka.
Ndowobaloba kuyendidzana
nge mbiko yakazibisiwa gubungano labo.
13 Yee mme wee bapalala,
ngoti bakalashika nge kudwa pandili!
Golomodzo nge labo,
ngoti bakandipandukila!
14 Abatondililila nge moyo yabo,
banolila bali pezhugwi kwe malawo abo.
Banokubunganila mathunde ne nkumbi we zhambi,
koga bendipandukila.
15 Ndimi ndakabadiya abasimisa maboko abo,
koga banondilukila gwanga.
16 Abatoshandukila kuna Upezhugwi,
banonga dati latjishakala.
Makulukota abo anowoligwa nge thumo
ngekwe ndebeleko dzabo.
Ikoku kowobe madado kubali mu shango ye Egipiti.
© Kalanga Bible © Bible Society of Botswana, 2008, 2018.