Bumambo guzhele mbakiso
1 Tjitsha tja Jesi tjowothinila,
lutabi gowokula gudwa mu midzi iye gukazwala mitjelo.
2 Meya ya Yahwe inowogala munli,
meya ye butjenjedu neye hwisiso,
meya ye gumbuludzo ne simba,
meya ye luzibo ne kutja Yahwe.
3 Ngono kushatha kukwe kowobe mukutja Yahwe.
Aatowosumikilisa nge bona kwe mesho awe,
kene kuli kuwidza ndebo nge hwa kwe zebe dzidze.
4 Koga unowosumikilisa bashayi nge ndulamo,
unopedzisa ndebo nge lubu mu kusumikilisa bashayi ne shango,
ngono unowoloba shango nge shamu ye nlomo uwe,
nge mafemo e milomo iye unowobulaya babi.
5 Ndulamo inowobe mwandabula we thunji dzidze,
kugalikabgwe kukabe mwandabula we thunji dzidze.
6 Phele inowogala ne pkhwizana,
ngwe iyo inowobutha ne mbudzana,
phulu ne shumbana ne zwithuwo zwakakodziwa zowobutha pathu pang'ompela,
ngono mwana ntukununu unowozwitungamila.
7 Ng'ombe hadzi ne bhira zowoja pathu pang'ompela,
bana badzo banowobutha bose,
shumba inowoja bushwa se ng'ombe.
8 Mwana unomwa unowozanila pa mwina we ipakupaku,
mwana wasiya zhamu unowolonga luboko mu zwimba le thumbi.
9 Azwingakubadze kene kuli kutjinya
mu dombo langu lose lakayengemala,
ngoti shango inowobe ili zhele kuziba Yahwe
se vula yakaanga gungwa.
10 Mu zhuba ilelo n'dzi wa Jesi unowoma uli tjilakidzo mu zwitjaba, zwitjaba ndiye wazwinowoshaka, magalo awe anowolumbidzwa.
11 Mu zhuba ilelo She banowotambunudza luboko gwabo kakale gwe bubili kubuza malimbelimbe e bathu babo kudwa mu Siriya ne mu Egipiti ne mu Patirosi nemu Itopiya nemu Elamu nemu Shinari nemu Hamati ne kudwa mu shango dzimu tjekelo dze gungwa.
12 Banowomilidzila zwitjaba tjilakidzo,
ngono banowokubungaya bakapalala be Iziraela
bakakubunganya be Juda
bakapaladziwa kudwa mu mbizho nna dze shango.
13 Fupa la Ifureimi lowopela,
naibabo banokwebakweba Juda banowothubugwa,
Ifureimi aatowothamila Juda fupa,
Juda iye aatowokwebakwebana na Efureimu.
14 Koga banowodzatila mu mathudzi e Bafilisitiya ku golombedzo,
bubili gwabo banowotapila bathu be ku bhezhuba.
Banowotambunudza luboko gwabo kubhayana na Edomu ne Moabu,
ngono Baamoni banowobahwa.
15 Yahwe banowowomesa
gorokoro le gungwa gwe Egipiti,
ngono banowozunguza luboko gwabo pezhugwi kwe Gwizi gwe Yufuratesi
nge phepo inopisa,
banowoguthubukanya gukabe ngolo dzili kutendeka
kuti bathu batjuluke pakawoma.
16 Ngono kowobe ne zila hwulu kudwa ku Asiriya
inoyenda malimbelimbe akasala e bathu bawo,
sekwakabe kuli iko nge Iziraela
pabakabhuda mu shango ye Egipiti.
© Kalanga Bible © Bible Society of Botswana, 2008, 2018.