1 Dama ngekwe nkuku we mbono.
Modwani ha muti matathila pezhugwi, imwi mose,
ku zwilungwane zwe ng'umba,
2 imwi muzhele zhoba, nzi nkulu we phipiti,
una kushatha kwakapindilila.
Bafi benyu abazobulawa nge thumo,
naiko abazofa mu ngwa.
3 Batungamili benyu bose bakatizha tjibaka tjing'ompela,
bakatapiwa kusingashingisiwe nsebe.
Bose benyu bakawang'wa bakatapiwa,
nenguba bakabe batizhila kule.
4 Ndizo ndakati,
“Lingani ntome kusikundili,
muletje ndilile tjililo tjinogwadza,
musigwise kundinyaladza
mu kupaladziwa kwe nkololokadzi we bathu bangu.”
5 Ngoti She Yahwe Masimbawose bana zhuba
le phipiti ne kutshambatshambana ne kuhwumana
mu nkuku we mbono,
nele kuligwa kwe makuma
ne tjililo tjohwika ku matombo.
6 Elamu yakasenga gobhodo le misebe,
ina koloyi dze ngwa ne babhayani bakatatha mbizi,
Kiri yakabhata tjiviko.
7 Mikuku iyo yakanaka izhele koloyi dze ngwa,
be mbizi bakama nge mamo abo ku mikoba.
8 Mbakililo dze Juda dzakadusigwa kutjena.
Mu zhuba ilelo wakalinga
ku zwibhayano zwiku Ng'umba ye Ishaka,
9 ngono ukabona kuti mabuli manjinji guma palakakwamuka mu nzi nkulu wa Dafite
ngono ukatjelela vula mu dziba litjapasi.
10 Wakabala ng'umba dze Jerusalema,
ngono ukapkhwanya ng'umba kusimisa guma.
11 Wakabaka tshime pakati kwe makuma
kuti vula ye dziba gulukugwi iwungile mulili.
Koga awuzotongobe ne tjimwe ngekwe wakalithama,
kene kube ne njele ngekwe wakathama ndongoloso ntolo.
12 She Yahwe Masimbawose mu zhuba ilelo
bakakudana kuti ulile ube mu buyendasi,
kuti utesele nsholo uambale tjiambalo tje saka.
13 Ngono akuzobe saikoko, koga kwakabe ne kushatha ne mizano,
kubhayiwa ng'ombe ne pkhwizi,
kujiwa nyama kung'wiwa nkumbi we zhambi.
Kuyi, “Ngatijeni ting'weni
ngoti mangwana tofa.”
14 Yahwe Masimbawose bakalebeleka mu zebe dzangu beti,
“Nge malebeswa jinyo ileli
alitowozwiibhatigwa kudzina ufa.”
Kojalo Yahwe Masimbawose.
Gumbuludzo kuna Shebina
15 She Yahwe Masimbawose bakati,
“Yenda ku ntjengeti iwoyu,
kuna Shebina ntjengeti we mbako dze bushe, ngono un'dwe uti,
16 Unothamani ipapa kakale ndiani wakupa ndetjedzelo
dze kutsha ikumbu tjitjo ipapa
uzwitshila ikumbu pezhugwi,
ubezha magalo awo e kunyaluluka mu shongwe?
17 “Yahwe banowokuposela kutjena nge masimba, iwe nlume wakasima.
Banowokubhata nge masimba.
18 Banowokudzunguludza kwazo se bola
bakakuposela mu shango phabi.
Unowofila ikoko,
koloyi dzidzo dze ngwa dzaunozwikudza ndidzo dzowogala ikoko.
Unobhatisa shoni ng'umba ya tetshi uwo.
19 Ndowokutata mu nshingo uwo,
unowodusiwa mu mamo awo.
20 “Mu zhuba ilelo ndowodana nlanda wangu Eliyakimu nkololo wa Hilikiya, 21 ndowombadza zwiambalo zwizo ansunga thunji nge mwandabula uwo. Ndowompa simba lilo, ngono unowobe tate ku bagali be Jerusalema ne ku ng'umba ya Juda. 22 Ndompa kiyi ye ng'umba ya Dafite, unoti azhula, kukasibe ne ungazhalila, ha azhalila, kukasheta ungazhula. 23 Ndowon'simisa kanga lubambo gwakothomegwa pagwakafanila. Unowobe tjigalo tje bushe tje gudzo mu ng'umba ya tate babe. 24 Ludzi gwa tate babe gose gowobe mu mathudzi awe, bazekulu ne zwizekugwana, ne zwija zose zwitukununu, kudwa ku kopi kunoti ku hali.”
25 Mu zhuba ilelo,
Koleba Yahwe Masimbawose.
“Lubambo gwakakothomegwa gukasima pakalingisana gowoshomoka, gowothubugwa gukawa, ngono ntolo wagwakabe gwakasenga unowowila pasi. Yahwe balebeleka.”
© Kalanga Bible © Bible Society of Botswana, 2008, 2018.