Yahwe ndibo Ndzimu boga
1 “Koga ngwenu tjihwilila,
iwe Jakubo nlanda wangu, iwe Iziraela wandakashalula.
2 Yahwe ibo bakakuthama,
ibo bakakubumba mu tjibumbilo
kakale ibo banowokubhatsha bakati,
Usitje, iwe Jakubo nlanda wangu,
iwe Jeshuruni iwe wandakashalula.
3 Ngobe Ndowotebulila vula mu shango ina nyota,
ne wobana dzowowunga pasi pakawoma,
ndowodila meya yangu mu ludzi gugo,
ne makombolelo angu mu bana babo.
4 Banowokombola se bushwa pana vula,
ne miti inoyi phophula mu phili dze hwobana.
5 Mmwe unowoti, ‘Imi ndiwa Yahwe,’
mmwe unowodang'wa nge zina la Jakubo,
koga mmwe unowokwala mu tjiazha eti,
‘Ndiwa Yahwe’ ebe etola zina la Iziraela.”
Yahwe koga kusi midzimu
6 Yahwe, mambo we Iziraela, Ndzutunuli wayo,
Yahwe Masimbawose bakati,
Ndimi we kutanga newe bupelo,
kuzhe kwangu akuna ndzimu.
7 Ndiwupi ngono unonga imi?
Ngaalebe, alebe atjenese mbeli kwangu.
Ndiani wakaleba kale zwithu zwa ntolo zwakabe zowoshingikala.
Ngaatibudze tjitjawoshingikala.
8 Musitje, musipaluke moyo.
Apa andizomubudza kene kudwa ntolo?
Mu batendeki bangu. Apa uyapo mmwe Ndzimu kuzhe kwangu?
Ayipo imwe shongwe, ayipo yandinoziba.
Madatha kunamata zwifano
9 Bose banothama zwifano abateli be tjimwe,
ne zwithu zwabanoshathila azwitobuzila,
batendekeli babo abatobona kene kuli kuziba.
Ndizo saikoko banowobhakhwa nge shoni.
10 Ndiupi kene ungathama ndzimu
iwoyu usina nshingo?
11 Bose banonamata ifano itjetjo banowobhakhwa nge shoni.
Babezhi batjo ate bali tjimwe, bathu koga.
Ngabakubungane, bamile tjimo tjabo,
banolobgwa nge hana, bose banowobhatisiwa nge shoni.
12 Nthuli unotjipisa mu moto ebe etjithula,
etjikatsha nge hamuli kutjithama sekwa tjakafanile tjilingike,
eshingisa luboko gugwe gwakasima.
Unoti kabhakhwa nge zhala ngono kapela masimba,
kasing'we vula ngono katimbama.
13 Mbezhi unolizanya nge ntambo,
elizanyidza nge tjilizanyo etala paanobezha nge mbezhwana.
Etjibezha mu mbumbiko ye nthu,
etjithama nge kunaka kose kwe nthu kuti tjigale mu ng'umba.
14 Unotema eliga misida kene eshalula misipuri
kene mioko ebe eiletja ikula isima kupinda miti ye ishaka.
Unodzwala misida,
vula ebe iikudza.
15 Kudwapo inowobe hwuni dzinobesiwa.
Dzimwe unobesa moto ebe ezwidziyisa, ebe ebhika tjiwunga.
Gumwe lukuni ebe eguthama ndzimu ebe eguthigamila,
ethama ifano ebe etjithigamila.
16 Dzimwe dze hwuni idzedzi,
unobesa moto ebe egotja nyama eja eguta.
Ntome unodziya moto ebe eti,
“Ah, ndadziya dumbu, ndouhwa moto iwoyu.”
17 Dzasala unobezha ndzimu, ndzimu uwe we ifano,
ebe etjithigamila etjinamata,
ebe etjitembezela eti,
“Munditjidze ngoti mu ndzimu wangu.”
18 Bathu bakajali abana zibo, akuna tjabanohwisisa
mesho abo akazhalilika, kuti basibone,
ne mikumbulo yabo yakazhalilika kuti basihwisise.
19 Akuna wabo unokumbula
kene kuli kuziba kuti,
“Kana hwuni dzimwe ndakadzilonga mu moto, abuya abhika zojiwa,
agotja nyama aja. Apa ngono ngwenu ndingati dzasala adzithama tjinoshimika kene?
Apa ndakafanila thigamila dandana kene?”
20 Iwoyu nthu unoja nlota. Wakadzimidziwa nge nkumbulo wakalashika,
ngono aangazwitjidze, kene aangati,
Apa kuthu ikoku ku mu luboko gwangu gwe luji ate manyepkhwa kene?
Mbumbi aazokangang'wa Iziraela
21 Kumbula zwithu izwezwi, Jakubo,
iwe Iziraela, ngoti u nlanda wangu.
Ndakakubumba, u nlanda wangu,
iwe Iziraela, andingakukangang'we.
22 Ndakatshumula milandu iyo se gole,
zwibi zwizo azwitshumula se fulele.
Buya kundili,
ngoti ndakakudzutunula.
23 Kudzimu ngakumbe nge kushatha, ngoti Yahwe bakakuthama ikoku,
shango naiyo ngaimimile,
namwi matombo milidzani mahwi mumbe
ne ishaka ngatjimbe ne miti imu tjili,
ngoti Yahwe badzutunula Jakubo
ngono banowokudziwa mu Iziraela.
Jerusalema inowogagwa kakale
24 “Yahwe ndzutunuli uwo, ibo bakakubumba mu tjibumbilo bakati,
Ndimi Yahwe bakathama zwithu zose,
ndimi ndoga ndakatambunudza kudzimu,
ndimi ndoga ndakawala shango.
25 Ndothama kuti zwilakidzo zwe balebesambeli be manyepkhwa zwidwe patjena kuti manyepkhwa,
athama kuti ng'anga dzibe zwilengwe,
idzo dzinoshandusa batjenjedu dzikathama zibo yabo bulengwe.
26 Koga ndosimisa dama le nlanda wangu,
ndoshingikadza bulebesambeli gwe batumwa bangu banoleba ngekwe Jerusalema beti,
‘Jerusalema inowogagwa,’ ngekwe mizi mikulu ye Juda beti,
‘Inowomusiwa, ndowomusa matongo.’
27 Ndiye unoti ku gungwa, ‘Ipkhwa,
ndowopkhwisa njizi dzidzo.’
28 Ndimi ndinoti ngekwa Sirasi, ‘Nlisi wangu,
ndizo unowoshingikadza mazwimisilo angu wose
ngekwe Jerusalema ndoti,
“Inowomusiwa,” ngekwe Ng'umba ye Ndzimu ndoti,
“Thiwa yayo inowoteyiwa.” ’
© Kalanga Bible © Bible Society of Botswana, 2008, 2018.