Kuthigamila midzimu ye zwifano ateiko
1 Balulwami banoloba,
ngono akuna mmwe unokuyela njele,
banogalamoyo banodusiwa,
koga kusina unohwisisa,
Balulwami banodusiwa,
kutizhisiwa bubi gu mbeli.
2 Ibabo banotjila butjilo gwakatambunuka
banowana kunyalala,
banonyaluluka mu malalo abo
ibabo bakatambunuka.
3 Koga imwi izhani ngeno,
imwi bakololo be nloyikadzi,
bana be phombgwe ne fukula.
4 Ndiani wamunoseka kene?
Apa ndiani wa munodadila kene?
Wamunowhong'ola ndiani?
Apa ate muli lutshinga gwe bapanduki
kene bana be banyepi kene?
5 Mopisika nge yemula mbi pakati kwe mioko
na kusi kwe miti mimwe ne mimwe yakapasha ina mazhani matshwa,
modusa bana benyu zwibhayilo mu mikuku
ne mu phaswa dze shongwe.
6 Motola mabgwe akakuyungika mu nkuku se gobe lenyu,
i hakata dzenyu.
Moatebulila tjipo tje tjing'o kuanamata,
mukaadusila tjipo tje mathunde.
Apa ndakafanila ndishathile izwezwi zwithu kene?
7 Pezhugwi kwe dombo lefulefu
makawala thobo dzenyu,
ndiko kwamunotathila ikweno kunodusa zwibhayilo zwenyu.
8 Makabiga zwifano zwenyu shule kwe matendele nekwe makwasayile e mikoba.
Makati mundisiya mukapengula thobo dzenyu,
mukati malala padzili mufumula kwazo,
mukadumana naibabo bamunoda thobo dzabo,
ngono mukalinga mbujo dzabo.
9 Makayenda ku ndzimu Moleki ne mafuta
mukapaphidza mafuta enyu anonuhwa zwinozipa,
makatuma thumwa kulekule,
mukadelukila mu ikumbu.
10 Makanyadziwa ngothama zwithu zwenyu izwezwi,
koga amuzotongoti, “Azwina nshingo.”
Makamusidzila matatabuko enyu
mukasitimbame.
11 Ndiani wakamupalusa moyo mukatja,
mube musingabe ne malebeswa kundili,
naiko mukasitongo ndikumbula
kene kuli kundialakana mu mimoyo yenyu?
Apa ate kuli kuti ndatola tjibaka ndilinyelele
ndizo wali musinganditje kene?
12 Ndowomubonyolola ndulamo yenyu ne mishingo yenyu ikaboneka,
ngono akuna tjainga bhatsha natjo.
13 Mowoti mulila, muletje mbunga we midzimu yenyu umubhatshe.
Phepo inoyisengela kutjena,
phetshwana koga inowoiwulusila kutjena.
Koga unotizhila mundili unowothuwa shango,
ngono kathuwa ne dombo langu lakayengemala.
14 Kowolebelekwa kuyi,
“Bakani, bakani mululwamise zila.
Dusani zwidzibilidzi zose mu zila ye bathu bangu.”
15 Ngoti woku ndiko kunoleba upezhugwizhugwi,
iye unotjila kusingapele, we zina lakayengemala,
“Ndogala mu bugalo gupezhugwi gwakayengemala,
ndogala ne bathu bamu buyendasi banozwiisa pasi mu meya,
kuti ndimuse meya ye unozwiisa pasi,
ndinyaladze moyo we umu buyendasi.
16 Ngoti anditowopila nthu nlandu tjose,
naiko anditowogwadza moyo misi yose,
ngoti meya ye nthu ingatimbama mbeli kwangu,
meya ye butjilo yandakabumba.
17 Ndakabe ndagwadzisiwa moyo nge tjibi tjabo nenge yemula dzabo mbi,
ndakabaloba, asumbika tjiso tjangu mu kugwadza moyo,
koga banodwilila bepanduka mu zila dze mimoyo yabo.
18 Ndakabona zila dzabo koga ndowobapodza,
ndowobatungamila abuza kunyaladza mubali.
Balili babo ndowothama kuti banyaladzike bapululudze.
19 Kunyalala ngakubepo, kunyalala kubepo kuna bakule ne bapejo,
ngono ndowobapodza. Koleba Yahwe.”
20 Koga babiibi banonga gungwa linodzongeka
lisikatongodzikama,
vula yalo inokabhunganya matope ne misetje.
21 “Akuna kunyalala mu babiibi.” Kojalo Ndzimu wangu.
© Kalanga Bible © Bible Society of Botswana, 2008, 2018.