Ndebo Mbuya ye sununguko
1 Meya ya She Yahwe imundili,
ngoti Yahwe bakandizhodza kuti ndisumikilile bashayi ndebo mbuya.
Bakandituma kusimisa bakanyala moyo,
ne kuzibisa basungwa kuti bakasununguka,
ne bakatapiwa basunungugwa.
2 Bakandituma kuzibisa gole le ngoni dza Yahwe,
ne zhuba le kubgwilizila kwe Ndzimu wedu,
ne kunyaladza bose banolila,
3 kubhatsha banolila mu Ziyoni,
kubapa tjiala tje kushatha mu bumo gwe buyendasi,
mafuta e kushatha mu bumo gwe kulila,
ne tjiambalo tje kukudza mubumo gwe kunyala nkumbulo.
Banowodang'wa miti ye mioko ye ndulamo
yakadzwagwa ndi Yahwe kulakidza gudzo labo.
4 Banowomusa matongo antolo,
bakabaka kakale magalo etjinga akathukudziwa ntolo,
banowolulwamisa mizi mikulu
yabe ne makole yakathukudzika.
5 Bataya banowofudza ngubi dzenyu,
Bazhi banowoshinga mu minda yenyu ne minda ye mizhambi.
6 Ngono imwi mowodang'wa bapirisiti ba Yahwe,
mowodang'wa bashingi be Ndzimu wedu.
Mowoja fumwa ye zwitjaba, nge fumwa yabo mowozwikudza.
7 Pana kuti mubhakhwe nge shoni,
mowoamutjila gobe lenyu kabili,
pana kuti mulengudzike, mowoshatha mu thaka yabo,
ndizo wali mowothuwa gobe le fumwa yabo lili kabili mu shango yabo.
Ngono mowowana kushatha kusingapele.
8 Kana imi Yahwe ndoda kutambunuka,
ndobenga kutolelana ne kushinga zwibi.
Ndowobapa mbuyilo yabo ngoti ndogalikabgwe,
ngono ndowothama tjidumano nabo tjisingapele.
9 Zwizekugwana zwabo zowozibgwa mu njudzi,
bana babo banowozibgwa mu bathu.
Bose bathu banowobabona banowoamutjila
kuti bathu ibaba bakakombolegwa ndi Yahwe.
10 Ndoshatha kwazo muna Yahwe,
meya yangu inoshatha mu Ndzimu wangu.
Bandiambadza jidzo se ungati zwiambalo,
bakandinakisa ndulamo se ungati i hazu,
ndasala ndinga nloboli azwinakisa nge tjiala tje bubuya se tje mpirisiti,
kufanana ne nlongo azwinakisa nge maseka.
11 Se pasi pethama kuti midzi ithinile,
ne nnda uthama kuti mbewu imele,
saikoko She Yahwe banowothama kuti ndulamo
ne kukudza zwihwike mbeli kwe zwitjaba zose.
© Kalanga Bible © Bible Society of Botswana, 2008, 2018.