Babhenjamini banopiwa bakadzi
1 Balume be Iziraela bakabe batuna ku Mizipha beti, “Akuna wedu unowolobodza nkololokadzi uwe ku Babhenjamini.” 2 Bathu bakayenda ku Bhetele bakagala mbeli kwe Ndzimu kunoti madekwana, bemilidza mahwi, belila kwazo 3 beti, “Imwi Yahwe Ndzimu we Iziraela, ngekutini ikoku kwashingikala mu Iziraela? Ini ludzi gumwe gusipo mu Iziraela nasi.”
4 Kwakati tjimuka bathu bakabaka tjibeso tjinopisigwa zwibhayilo bakadusa zwibhayilo zwinopisiwa ne zwipo zwe mbakisano.
5 Baiziraela bakabhuzwa beti, “Ndiupi mu njudzi dzose dze Iziraela wakakong'wa kuwokubungana mbeli kwa Yahwe?” Ngoti bakabe batuna kuti iye unokong'wa kuwokubungana mbeli kwa Yahwe ku Mizipha, nge malebeswa unowobulawa. 6 Ngono bathu be Iziraela bakabe ne ngoni ne zwikamu zwabo Babhenjamini beti, “Nasi ludzi gung'ompela gwathubugwa mu Iziraela, 7 tithame tjini ngekwe bakadzi muna ibaba bakasala, ngoti takatuna kuti atitowobapa bakololokadzi kuti babalobole kene?”
8 Bakabhuzwa beti, “Ndigupi gwe njudzi dze Iziraela gwakakong'wa kuwokubungana mbeli kwa Yahwe ku Mizipha?” Bakawana kuli kuti akuna we Jabeshi Giliyadi wakabuya ku nshangano we bukotokelo. 9 Ngoti kwakati bathu be bagwa, kukawanika kulikuti akuna we bathu be Jabeshi Giliyadi uyapo.
10 Ndizo gubungano likatumila balume bali zwiwulu zwili gumi lina zwibili (12 000) be babhayani, likabadwa likati, “Yendani munobulaya bagali be Jabeshi Giliyadi nge thumo kose ne bakadzi ne bana. 11 Tjamakafanila thama ndiyetji, nlume mmwe ne mmwe ne nkadzi mmwe ne mmwe wakatongo walilana abulawe.” 12 Mu bagali be Jabeshi Giliyadi bakawana baanadi bali mazana manna (400) basathu bakawalilana, bakabayisa ku bukotokelo ku Shilo mu shango ye Kanana.
13 Ngono gubungano lose likatumila dama ku Babhenjamini bakabe bali ku shongwe ya Rimoni, lileba mbakiso kubali. 14 Babhenjamini bakashanduka mu tjibaka itjetjo, bakapiwa bakadzi be Jabeshi Giliyadi bakabe baletjiwa ku tjila, koga bakasibalizane.
15 Bathu bakahwila ngoni Bhenjamini ngobe Yahwe bakabe badusa buli mu njudzi dze Iziraela.
16 Bakulu be gubungano bakabhuzwa kakale beti, “Basala tibathamile tjini kuti bawane bakadzi, ngoti bakadzi be Bhenjamini bakalobesiwa?” 17 Bakadwilila beti, “Kwakafanila kube ne thaka ye malimbelimbe e Bhenjamini, kuti ndizo ludzi gusidzimidziwe mu Iziraela. 18 Tokonegwa nekubalobodza bakololokadzi bedu, ngoti tili Baiziraela takatuna titi, ‘Wakalongwa bhiso iye unowolobodza nkololokadzi uwe ku N'bhenjamini.’ ” 19 Ndizo bakati, “Bonani, kuna Nzano wa Yahwe we gole ne gole ku Shilo ku burwa gwe Bhetele, kunobhuda zhuba kwe zila yakazhuka inodwa ku Bhetele iyenda ku Shekemu, ku bunandzwa gwe Lebona.” 20 Bakalaya Babhenjamini beti, “Yendani munolalila ku minda dze mizhambi, 21 mulinge, apa bakololokadzi be Shilo bebhudila kuzhe kunozana mizano, mubhude mu minda dze mizhambi ngono mmwe ne mmwe azwitolele nkadzi mu bakololokadzi be Shilo bayende ku shango ya Bhenjamini. 22 Ha botate babo ne hazwadzi dzabo bangang'ong'ola kutili towobadwa titi, ‘Mutithamile buthu nge kubabhatsha, ngoti atizobawanila bakadzi mu ngwa, ngono amutemuli nlandu ngoti ate imwi makabapa bakololokadzi benyu.’ ”
23 Ndizo ndiko sekwa kathama Babhenjamini. Kwakati banana batjazana, nlume mmwe ne mmwe katola ng'ompela kube nkadzi uwe. Bakabgwilila ku shango yabo, bakabaka mizi bakagala muili. 24 Mu tjibaka itjetjo Baiziraela bakayenda, bebgwilila kanyi kwabo ku njudzi dzabo ne misha yabo, mmwe ne mmwe ku thaka iye.
25 Mu mazhuba iyawo kwakabe kusina mambo mu Iziraela, mmwe ne mmwe wakabe ethama tjaanobona tjakalulwama mu mesho awe.
© Kalanga Bible © Bible Society of Botswana, 2008, 2018.