Lumbo gwa Debora na Baraki
1 Mu zhuba ilelo Debora na Baraki bakamba lumbo gwe mboko beti,
2 “Ngoti batungamili bakatungamila Iziraela,
ngoti bakazwipa nge moyontjena,
kudzani Yahwe.
3 Ihwani imwi bomambo,
teedzani imwi babusi.
Ndowombila Yahwe,
ndowothamila Yahwe Ndzimu we Iziraela njimbo.
4 “Imwi Yahwe makati mubhuda mu Seyiri,
mutshamba mutshambuka mubhuda mu shango ye Edomu,
shango yakatengenyeka,
zhuzhugwi likadotha,
makole akatebula vula.
5 Matombo akatetema mbeli kwa Yahwe,
ilo Dombo le Sinai
mbeli kwa Yahwe Ndzimu we Iziraela.
6 “Mu mazhuba a Shamaga nkololo wa Anati,
mu mazhuba a Jayeli zila dzakafupatigwa
bapindi bakayendila ntome kwe zila.
7 Kwakabe kusheteka babusi mu Iziraela
bakabebapela kudzina ndimuka imi Debora,
ndimuka ndili mme be Iziraela.
8 Kwakati kushalugwa midzimu mitshwa,
kukabe nge ngwa ku mikoba ye nzi nkulu,
apa tjivikisi ne thumo zwakatongoboneka
pakati kwe zwiwulu zwili makumi manna (40 000) mu Iziraela?
9 Moyowangu unoyenda ne balauli be Iziraela
bakazwipila nge moyontjena mu bathu.
Kudzani Yahwe.
10 Lebani nge kwako imwi bakatatha madonki matjena,
bagele mu thobo dzakalukwa
imwi banoyenda mu zila,
11 Teedzani mahwi e bambi baku madziba anodilidzila
kwabanokudzila mishingo ya Yahwe yakalulwama
mishingo yakalulwama ye babhayani babe mu Iziraela.
“Ipapo bathu ba Yahwe bakadelukila ku mikoba ye nzi.
12 Muka, muka, Debora
Muka, muka, dusa lumbo.
Milika, Baraki,
utape batapiwa babo,
iwe nkololo wa Abinoyamu.
13 Ngono malimbelimbe e banokudziwa akadeluka,
ngono bathu ba Yahwe bakazha kundili bana babhayani.
14 Bamwe bakadwa kuna Ifureimi bakabe bakabaka mu Amaleki,
Bhenjamini wakabe una bathu bakakutobela.
Kudwa ku Makiri, balauli bakadeluka
kudwa ku Zebuluni kuli banobhata ludozo gwe ntungamili.
15 Balauli ba Isakari bakabe bana Debora,
ngono Isakari wakabe ana Baraki,
bakabe bakansalashule ku nkuku.
Mu njudzi dza Rubheni
kwakabe kuna kushakisisa kukulu kwe moyo.
16 Wakabe uligelileni ku matanga e pkhwizi,
wakabe ushaka hwa milidzo ye ngubi?
Mu njudzi dza Rubheni
kwakabe kuna kushakisisa kukulu kwe moyo.
17 Giliyadi wakagala seli ye Jorodani,
ini Dani iye akagala pa migoro ye vula?
Asheri kasala pa tjekelo dze gungwa
kagala panowunga vula.
18 Bazebuluni bathu bakalonga matjilo abo mu mbatsha
ne Banafutali bakajalobo mu shango dzakatathila.
19 “Kwakazha bomambo bakagwa,
bomambo be Kanana bakagwa
ku Taanaki pa vula dze Megido
bakasitape thundu ye siliva.
20 Kudwa kudzimu nyenyedzi dzakagwa
mu zila dzakagwa na Sisera.
21 Gwizi gwe Kishoni gukabakubila kutjena,
gwizi gwa ntolo, gwizi gwe Kishoni.
Meya yangu, tshamba ne simba.
22 Kukabe nsindo we thozo dze mbizi
ne matha matha kwe mbizi dzidze.
23 “Longani bhiso mu nzi we Merozi,
koleba ntumwa wa Yahwe
longani bhiso bagali bawo,
ngobe abazozha kubhatsha Yahwe,
kubhatsha Yahwe muna banasimba.
24 “Ngakukombolegwe Jayeli kwazo muna betjikadzi
nkadzi wa Hebha we N'keni,
wakakombolegwa mu bakadzi banogala mu mishasha.
25 Sisera wakakumbila vula,
ngono Jayeli kampa nkaka,
kanzhisila mashwe nge ndilo ya botetshi.
26 Kayisa luboko ku lubambo gwe nshasha,
luboko gwe luji kaguyisa ku hamuli ye bashingi
kaloba Sisera, kankwiya nsholo,
kambhaya kusi kwe zebe.
27 Kawila pasi, katimbama,
kakandalala pa makumbo awe.
Katimbama kawila pasi pa makumbo awe,
paakakandalalila, kafilapo.
28 “Mme ba Sisera bakashozhela nge fesitere,
bakalila bali shule kwe tjisitilo.
‘Ini koloyi iye ye ngwa inonoka kuzha?
Ini misindo ye mbizi isingaswike?’
29 Mmwe we bakatjenjela we bakololokadzi babe kandabila,
ngono naiye kazwidwa eti,
30 ‘Apa abazowana thundu ngono batjaikobana?
Kuti mmwe ne mmwe nlume atole mwanadi kene babili,
thundu ye zwiambalo zwakanakisiwa zwa Sisera,
zwiambalo zwakanakisiwa zwakakwagwa,
zwakakwagwa zwe ntengo upezhugwi,
thundu ye ntshiba wangu kene?’
31 “Atshene zwita zwenyu zose zwingalobesiwa, imwi Yahwe.
Koga atshene banomuda
bakanga zhuba libhuda nge simba lalo.”
Ngono shango ikabe nge kunyalala kwe makole ali makumi manna (40).
© Kalanga Bible © Bible Society of Botswana, 2008, 2018.