1 Matama a Jeremiya nkololo wa Hilikiya, wakabe ali mmwe we bapirisiti bakabe bali mu Anatoti mu shango ye Bhenjamini. 2 Dama la Yahwe lakazha kunli mu gole le bugumi lina matatu (13) ekubusa kwa Josiya nkololo wa Amoni wakabe ali mambo we Juda. 3 Lakazha kakale mu misi ya Jehoyakimu nkololo wa Josiya wakabe ali mambo we Juda, kuyenda kunoti ku bupelo gwe gole le bugumi lina ling'ompela la Zedekiya nkololo wa Josiya wakabe ali mambo we Juda, kudzina kunoti mu kutapiwa kwe Jerusalema mu mwedzi we bushanu.
Kudang'wa kwa Jeremiya
4 Dama la Yahwe lakazha kundili liti,
5 “Ndakati ndisathu akubumba mu tjibumbilo ndakakuziba,
wakati usathu ukazwagwa ndakakushalula,
ndakakubiga nlebesambeli ku zwitjaba.”
6 Ipapo ndikabe nditi, “Awu, She Yahwe! Bonani, anditoziba lebeleka ngoti nditji ntjetjana.” 7 Koga Yahwe bakati kundili, “Usiti, ‘Nditji ntjetjana,’ wakafanila kuyenda kuna bose bandinokutuma kubali, tjimwe ne tjimwe tjandinokulaya wakafanila kutjileba. 8 Usibatje ngoti ndinawe kukusunungula,” kojalo Yahwe.
9 Ipapo Yahwe bakatambunudza luboko gwabo bakabhata nlomo wangu ngono Yahwe bakati kundili,
“Bona ndalonga matama angu mu nlomo uwo.
10 Bona, mu zhuba ileli ndakubiga kuti ube ne simba mu zwitjaba ne pezhugwi kwe mibuso kuti
utshindunule kakale uvunile pasi,
ukolomole kakale upitule,
ubake kakale udzwale.”
11 Kakale dama la Yahwe lakazha kundili liti, “Jeremiya unobonani?” Adabila nditi, “Ndobona lukombo gwe nti we alimondi.” 12 Ipapo Yahwe bakati kundili, “Wabona zubuyanana, ngoti ndakalingilila kubona dama langu lishingikadziwa.”
13 Dama la Yahwe lakazha kundili gwe bubili liti, “Unobonani?” Adabila nditi, “Ndobona hali inobila yakaleleka kudwa ku bunandzwa.” 14 Ipapo Yahwe bakati kundili, “Kudwa ku bunandzwa bubi gowowila bagali bose be shango. 15 Ngoti bona, ndodana njudzi dzose dze mibuso ye bunandzwa,” kojalo Yahwe. “Ipapo dzowozha ngono mmwe ne mmwe unowobiga tjigalo tjitje tje bushe ku manginilo e nkoba we Jerusalema, banowobhayana ne makuma wose ayo akapoteleka ne mizi yose ye Juda. 16 Ndowodusa sumikiliso dzangu nge kwabo ngekwe bubi gwabo gose gwe kundifupatila, bakapisila motsha midzimu ipoga bakanamata mishingo ye maboko abo. 17 Koga iwe, uzwilulwamise! Milika ubabudze tjimwe ne tjimwe tjandinokudwa. Basikupaluse moyo, kuti ndizo ndisikupaluse moyo mbeli kwabo. 18 Ngono imi, bona, ndokuthama mu zhuba la nasi nzi we dizhilo, phanda ye butale, guma le phangula kubhayana ne shango yose ne kubhayana na bomambo be Juda ne makulukota ayo ne bapirisiti bayo nenge bathu be shango. 19 Banowogwa nawe koga abangakukunde ngoti ndinawe kakale ndowokugwila,” koleba Yahwe.
© Kalanga Bible © Bible Society of Botswana, 2008, 2018.