Pkhwanyika kwe hali
1 Yahwe bakandidwa bakati, “Yenda, katenge jegwa mu mbumbi we hali, uyende ne sholotjena dzimwe dze bathu ne bamwe bapirisiti bakulu, 2 ngono muyende ku Nkuku we nkololo wa Hinomu uku Nkoba we zwiyenga ngono uswike ulebe ikoko matama andinowokubudza. 3 Uswike ulebe uti, ‘Ihwani dama la Yahwe imwi bomambo be Juda ne bagali be Jerusalema. Yahwe Masimbawose Ndzimu we Iziraela bakati, “Bonani ndozhisa bubi mu bugalo gunowoti zebe dzinohwa nge kwago dzikababa. 4 Ngoti bathu bakandifupatila bakazhadza bugalo igogu shambgwa ngopisila motsha muguli bepisila midzimu ipoga isakatongozibgwa ndibo kene ndi bobatategulu babo kene bomambo be Juda, ngono ngekuti bakazhadza pathu ipapa ne malopa e basina nlandu, 5 bakabaka magalo a pezhugwi a Bhaale kupisa bakololo babo mu moto bali zwibhayilo zwinopisiwa zwipisigwa Bhaale, izo zwandisakabadwa kene kwakati kukabepo mu nkumbulo wangu, 6 ndizo, bonani mazhuba aswika, kojalo Yahwe kunowoti pathu ipapa kukasitjadang'we kuyi Tofeti kene Nkuku we nkololo wa Hinomu ngono kukadang'wa Nkuku wekubhayila. 7 Ngono pathu ipapa ndowoshanga shanganya ndongoloso ye Juda ne Jerusalema ngono ndowothama kuti bathu babo babulawe nge thumo mbeli kwe zwita zwabo be bulawa ndi ibabo banoshaka matjilo abo. Ndowopa zwitumbu zwabo nyuni dze zhuzhugwi ne phuka dze shango. 8 Ndowothama nzi nkulu iwoyu tjithu tjinotjisa, tjithu tjinokaabaligwa, mmwe ne mmwe unoti epinda pauli unowopaluka moyo ngono unokaabala ngekwe mbatsha dzose dzawo. 9 Ndowothama kuti baje nyama ye bakololo babo ne bakololokadzi babo, mmwe ne mmwe unowoja nyama ye mbakidzani uwe mu tjibaka tje kukombiwa ne buyendasi, zwinowobe zwalongwa nge zwita zwabo na ibabo banoshaka matjilo abo.” ’
10 “Ipapo unowopkhwanya jegwa mbeli kwe balume baunowobe wayenda nabo, 11 ngono ubadwe uti, ‘Yahwe Masimbawose bakati, “Ndiko sekwa kwandinowopkhwanya bathu ne nzi nkulu iwoyu ndowobapkhwanya se nthu epkhwanya hali ye mbumbi we hali, kuti ndizo isitongo tjalulwamisiwa. Banowobiganya bafi ku Tofeti kudzina kusitjina magalo. 12 Nditjo tjandinowoshinga pathu ipapa kojalo Yahwe ku bagali bapo bose ndithama nzi nkulu iwoyu kuti unge Tofeti. 13 Ng'umba dze Jerusalema ne ng'umba dza bomambo be Juda idzo ng'umba dzose dzakatongopisigwa motsha mu matenga adzo kupisigwa mibunga ye zhuzhugwi ne dzakatongotebuligwa tjipo tje tjing'o kutebuligwa midzimu ipoga, dzowotemapala se bugalo gwe Tofeti.” ’ ”
14 Ipapo Jeremiya kazha ku Tofeti iko kwaakabe atumigwa ndi Yahwe kuti anolebesambeli ko, kama mu nsha we Ng'umba ya Yahwe ngono kati ku bathu bose, 15 “Yahwe Masimbawose Ndzimu we Iziraela bakati, ‘Bonani, ndozhisa mu nzi nkulu iwoyu ne mizana yawo yose bubi gwandakaleba ndilingisanya nayo, ngoti bakawomeledza mitshibha yabo, bakalamba kuhwa matama angu.’ ”
© Kalanga Bible © Bible Society of Botswana, 2008, 2018.