Ndzimu unolamba kukumbila kwa Zedekiya
1 Dama lakazha kuna Jeremiya lidwa kuna Yahwe, tjibaka tja Mambo Zedekiya tjabakatumila Pashihuri nkololo wa Malikhiya na Zefaniya we mpirisiti nkololo wa Maasiya kunli liti, 2 “Tibhuzwile Yahwe, ngoti Nebukadineza mambo we Bhabhiloni unogwa naswi, pamwe swiyo Yahwe banowotithamila mishingo yabo yose inotjenamisa bakathama kuti atiletjedze.”
3 Ipapo Jeremiya kati kubali, 4 “Idwani Zedekiya muti, ‘Yahwe Ndzimu we Iziraela bakati, “Bonani, ndowoshandusa mathumo e ngwa amu maboko enyu amunoshingisa kugwa na mambo we Bhabhiloni ne kugwa kwe Bakhaladiya bakamukomba kuzhe kwe makuma, ngono ndowobakubunganyila pakati kwe nzi iwoyu nkulu. 5 Imi nge kwangu ndowogwa namwi nge luboko gwakatambunuka gwakasima mu kugwadzamoyo kunothuta ndina bushongola gwakabangalala. 6 Ndowobulaya bagali be nzi iwoyu, bathu kose ne zwithuwo zowobulawa nge bugwele bukulu kwazo. 7 Kudwa ipapo, koleba Yahwe, Zedekiya mambo we Juda ne makulukota awe ne bathu be nzi iwoyu nkulu banowobe basiya bugwele ne thumo ne bhamba, ndowobalonga mu maboko a Nebukadineza mambo we Bhabhiloni, mu maboko a ibabo bagala beshaka butjilo gwabo. Unowobaloba nge mpitsho we thumo, aatowobe ne ngoni mu bali kene kubasiya kene kubahwilazogwadza.” ’
8 “Ngono ku bathu ibaba ubadwe uti, ‘Yahwe bakati, “Bonani, ndobiga zila ye butjilo ne zila ye lufu mbeli kwenyu. 9 Iye unogala mu nzi iwoyu nkulu unowofa nge thumo nenge bhamba ne bugwele koga iye unobhuda kazwipa ku Bakhaladiya bakamukomba unowotjila kawana butjilo gugwe guli igo mbhailo we ngwa. 10 Ngoti ndakalingisana ne kubhayana ne nzi nkulu iwoyu we mbipo usi we bubuya, kojalo Yahwe. Unowolongwa mu maboko a mambo we Bhabhiloni ngono akawupisa nge moto.” ’
11 “Kakale udwe be ng'umba ya mambo we Juda uti, ‘Ihwa dama la Yahwe, 12 Iwe ng'umba ya Dafite! Yahwe bakati,
“ ‘Sumikilisani nge ndulamo mu mangwanana,
munsunungule mu luboko gwe ntshambilidzi,
iye wakatolegwa,
kuyita kuti bushongola gwangu gusithute se moto,
kungadwa kusheta ungagudzima,
ngekwe mishingo yenyu mibiibi.’
13 Bona ndobhayana nawe, iwe n'gali we nkuku,
iwe shongwe yakawala, koleba Yahwe,
iwe unoti, ‘Ndiyani ungazha katinginilila,
kene ungangina mu magalo edu wali?’
14 Ndowokuloba shamu kuyendidzana nge mitjelo ye mishingo iyo, koleba Yahwe.
Ndowobhatidza moto mu ishaka tjitje,
ngono unowoja tjimwe ne tjimwe tjakampoteleka.”
© Kalanga Bible © Bible Society of Botswana, 2008, 2018.