Kuwa kwe Jerusalema
1 Mu gole le buzhanalume la Zedekiya mambo we Juda, mu mwedzi we bugumi, Nebukadineza mambo we Bhabhiloni ne babhayani babe bose bakazha kuwonginilila Jerusalema ngono bakaikomba. 2 Mu gole le bugumi lina ling'ompela la Zedekiya mu mwedzi we bunna mu zhuba le buzhanalume le mwedzi bakanginila tja mukati kwe nzi nkulu. 3 Ipapo balauli bose be babhayani ba mambo we Bhabhiloni bakazha bakagala pa Nkoba Utjapakati bakabe bali bo Nerigalisharezeri we Samigari na Nebosarikimu we ntungamili we balauli be babhayani, na Nerigalisharezeri we ntungamili nkulu we balauli be babhayani ne bamwe balauli be babhayani be mambo we Bhabhiloni.
4 Kwakati Zedekiya mambo we Juda ne babhayani bose bebabona bakatizha, bakatizha mu nzi nkulu busiku bebhuda ne zila ye nnda wa mambo bakanobhuda ne nkoba upakati kwe makuma mabili ngono bakalinga ku Araba. 5 Koga babhayani be Bakhaladiya bakabatatamila bakabhata Zedekiya mu tjibata tje Jerikho ngono bakati basinokuntola bakanzhisa kuna Nebukadineza mambo we Bhabhiloni ku Ribila mu shango ye Hamati, ikoko Nebukadineza kan'tilika nlandu. 6 Ikoko ku Ribila mambo we Bhabhiloni kabulaya bakololo ba Zedekiya mbeli kukwe kabulayilanya ne banokudziwa be Juda. 7 Kadusa mesho a Zedekiya kansunga nge ketani ngono kan'yisa ku Bhabhiloni. 8 Bakhaladiya bakapisa ng'umba ya mambo ne ng'umba dze bathu nge moto ngono bakaliga makuma e Jerusalema. 9 Ipapo Nebuzaradani, ntungamili we balindi kasengela bathu bose bakabe basala mu nzi nkulu, ibo bakabe ban'tobela ne bakabe basala kabatapila ku Bhabhiloni.
10 Koga Nebuzaradani ntungamili we balindi wakasiya bamwe bashayi bakabe basina tjabo mu shango ye Juda ngono kabapa minda ye mizhambi ne minda zhuba ilelo zwalo.
11 Ngono Nebukadineza mambo we Bhabhiloni kapa ndaulo Nebuzaradani ntungamili we balindi ngekwa Jeremiya eti, 12 “Untole ngono un'tjengete kwazo, usitongon'kubadza koga unthamile tjimwe ne tjimwe tjaanokudwa.” 13 Ndizo Nebuzaradani ntungamili we balindi na Nebushazibhani ntungamili we balauli be babhayani na Nerigalisharezeri ntungamili nkulu we balauli be babhayani ne makulukota wose a mambo we Bhabhiloni, 14 bakatola Jeremiya mu nsha we babhayani ngono bakampa Gedaliya nkololo wa Ahikamu nkololo wa Shafani kuti ban'yise ku nzi uwe. Ndizo kagala pakati kwe bathu bakanyi kukwe.
15 Dama la Yahwe lakazha kuna Jeremiya atjakazhaliligwa mu nsha we balindi liti, 16 “Yenda unobudza Ebedimeleki we N'khushi uti, ‘Yahwe Masimbawose Ndzimu we Iziraela bakati, “Bona ndowoshingikadza matama angu ngekwe nzi iwoyu nkulu ndithama tjakabipa kusi bubuya ngono kowoshingikala mu mesho awo mu zhuba ilelo. 17 Koga iwe ndowokusunungula mu zhuba, kojalo Yahwe. Ndizo awotolongwa mu maboko e balume baunotja. 18 Ngoti nge malebeswa ndowokutjidza ndizo autobulawa nge thumo koga unowopudzumuka nge butjilo gugo ngoti unogalabgwe mu ndili, kojalo Yahwe.” ’ ”
© Kalanga Bible © Bible Society of Botswana, 2008, 2018.