Mbatsha ngekwe midzimu
1 Dama la Yahwe lakazha kuna Jeremiya ngekwe Bajuta bose bakabe begala mu shango ye Egipiti ku Migidolo ne ku Tahefanesi ne ku Memifisi ne mu shango ye Patirosi liti, 2 “Yahwe Masimbawose Ndzimu we Iziraela bakati, ‘Makabona mbatsha dzose dzandakazhisa mu Jerusalema ne mu mizi mikulu yose ye Juda. Bonani mu zhuba la nasi yabe matongo akuna unogala muili, 3 ngekwe bubi gwabakathama, bendigwadzisa moyo nge kupisila ne kushingila midzimu ipoga yabasingazibe ibo kene bobatategulu babo. 4 Koga ndakadwilila ndimutumila balanda bangu bose balebesambeli nditi, “Sithamani tjithu itjetji tjinoshimisa tjandinobenga!” 5 Nenguba kwakajalo abazoteedza kene kubhulutana, abazofupatila bubi gwabo ne kusapisila motsha midzimu ipoga. 6 Ndizo bushongola gwangu gwakatebugwa ne gwadzamoyo kwangu kukathuta mu mizi mikulu ye Juda ne mu dzizila dze Jerusalema dzikathukudzika kakale dzikabe matongo na nasi.’
7 “Ngono ngwenu Yahwe Masimbawose, Ndzimu we Iziraela bakati, ‘Ini muzwizhisila mbatsha dzingapa kene muzwibulaila balume ne bakadzi ne bana ne ngawana muzwisiya musina ndodwa ne limbelimbe kene? 8 Ini mundigwadzisa moyo nge mishingo ye maboko enyu, mupisila motsha midzimu ipoga mu Egipiti iko kwamakazha muwogala kene, mowozwibulaya muzwithama bhiso ne madado pakati kwe zwitjaba zose mu shango kene? 9 Apa makakangang'wa bubi gwa bobatategulu benyu ne bubi gwa bomambo be Juda ne bubi gwe bakadzi babo ne bubi gwenyu ne bubi gwe bakadzi benyu gwabakathama mu shango ye Juda ne mu dzizila dze Jerusalema kene? 10 Abazozwiyisa pasi kuswika mu zhuba ileli kene kuli kutja, kene kutobela milayo yangu yandakabiga mbeli kwenyu na mbeli kwa bobatategulu benyu.’
11 “Ndizo ngwenu Yahwe Masimbawose Ndzimu we Iziraela banolebeleka sahwoku, ‘Bonani, ndazwimisila kuzhisa mbatsha ku muli ne kukolomola Juda. 12 Ndowotola limbelimbe le Juda labelakazwimisila kuyenda ku Egipiti kunogala ko. Lowopelela lose mu Egipiti, lowobulawa nge thumo kene lowofa nge bhamba. Kudwa muna ntukunu kunoti unkulu, banowofa nge thumo kene bhamba. Lowobe bhiso ne tjithu tjinotjisa tjakalingisanyiwa ne lengudziwa. 13 Ndowoloba shamu ibabo banogala mu shango ye Egipiti, sekwa ndakaloba shamu Jerusalema nge thumo ne bhamba nenge bugwele, 14 kuti ndizo kushete limbelimbe le Juda lakazha kuwogala mu shango ye Egipiti linowosiya kene likatjila kene likabgwilila ku shango ye Juda, iko kwabanoyemula kubgwilila kunogala ko ngoti abatowobgwilila ko kuzhe kwe batizhi basiba tjimwe koga.’ ”
15 Ipapo balume bose bakabe beziba kuti bakadzi babo bakapisila midzimu ipoga motsha ne bakadzi bose bakabe balipo ne bathu bose bakabe begala mu Patirosi mu shango ye Egipiti bakadabila Jeremiya beti, 16 “Ngekwe dama lawatidwa ulileba mu zina la Yahwe, atingakuteedze. 17 Koga towothama tjimwe ne tjimwe tjatakatuna kuti towotjithama, towopisila mambokadzi we kudzimu motsha ne kundusila tjipo tje tjing'o, sekwa tagala tithama iswi na bobatategulu bedu na bomambo bedu ne makulukota edu mu mizi mikulu ye Juda ne mu dzizila dze Jerusalema. Nge tjibaka itjetjije takabe tina zojiwa zwinjinji kakale takabhudilila kusingaboneke mbatsha. 18 Koga tjinga kwatamisa kupisila mambokadzi we kudzimu motsha ne kun'dusila tjipo tje tjing'o takasheta kose tikabulawa nge thumo ne bhamba.” 19 Ipapo bakadzi bakabe beti, “Takati tipisila mambokadzi we kudzimu motsha kakale tin'dusila tjipo tje tjing'o apa balume bedu bakabe basingazibe kuti takabe tithama makhekhe amu tjifano tjitje kakale takabe tin'dusila tjipo tje tjing'o kene?”
20 Ipapo Jeremiya kadwa bathu bose balume ne bakadzi bakabe ben'dabila kati, 21 “Apa Yahwe abazokumbula kakale bakaalakana ngekwe motsha wakapisiwa mu mizi ye Juda ne mu dzizila dze Jerusalema, upisiwa ndimwi na bobatategulu benyu na bomambo benyu ne makulukota enyu ne bathu be shango kene? 22 Kwakati Yahwe basingake bakatjimililana ne mishingo yenyu mibiibi ne zwithu zwenyu zwinoshimisa zwamakathama, shango yenyu ikabe bhiso ikathukudzika isina bagali sekwa ili iko nasi. 23 Ngoti makapisa motsha kakale makatjinyila Yahwe kakale amuzobatobela kene kuli kutobela nlayo wabo kene ndayo dzabo mbatsha idzedzi dzamuwila sekwa kuli iko na nasi.”
24 Ipapo Jeremiya kadwa bathu bose kose ne bakadzi kati, “Ihwani dama la Yahwe imwi bathu bose be Juda mu Egipiti. 25 Etji nditjo tjinolebgwa ndi Yahwe Masimbawose Ndzimu we Iziraela bakati: Imwi ne bakadzi benyu malakidza nge zwiyito zwenyu tjamakagadzabgwe muti, ‘Nge malebeswa towoshingikadza kutuna kwatakathama kuti towopisila mambokadzi we kudzimu motsha ne kun'dusila tjipo tje tjing'o.’ Dwililani muthame tjamakagadzabgwe! Shingikadzani kutuna kwenyu! 26 Koga ihwani dama la Yahwe imwi Bajuta bose banogala mu Egipiti, ‘Ndotuna nge zina langu, kojalo Yahwe, akutjowofa kwabe ne N'juta mu shango yose ye Egipiti unonowodana zina langu nge nlomo uwe eti, “Ha She Yahwe batjatjila!” 27 Bonani ndakabatjengetela mbatsha kusi bubuya, Bajuta bamu Egipiti banowonopeleledziwa nge thumo ne bhamba kuswikila bose balobesiwa. 28 Ibabo banowosiya thumo bakabgwilila ku shango ye Juda kudwa mu Egipiti banowobe bashomanana. Ipapo limbelimbe lose le Juda linozha kuwogala mu Egipiti lowoziba kuti dama laani linowosala, langu kene labo.
29 “ ‘Etji nditjo tjinowobe tjilakidzo kumuli kuti ndowomuloba shamu pathu ipapa,’ kojalo Yahwe, ‘kuti ndizo muzibe kuti kumutjenjedza kwangu ngekwe mbatsha dzakamulingisana nge malebeswa kowoshingikala.’ 30 Ndizo Yahwe bakati, ‘Bonani ndowolonga Faro Hafura mambo we Egipiti mu maboko e zwita zwizwe ne mu maboko a ibabo banoshaka kumbulaya sekwa ndakalonga Zedekiya mambo we Juda mu luboko gwa Nebukadineza mambo we Bhabhiloni iye wakabe ali tjita tjitje kakale wakabe eshaka kumbulaya.’ ”
© Kalanga Bible © Bible Society of Botswana, 2008, 2018.