1 Ipapo Jobe kashandula eti,
2 “Nge malebeswa ndimwi bathu dumbu,
butjenjedu gowofa namwi!
3 Koga ndina hwisiso koga samwi,
andite ndili ntukununu mu muli.
Ndiani usinga zibe zwithu izwezwi zwakajali kene?
4 Ndatjibe tjiseko ku bakwinya bangu,
imi ndakabe ndidana Ndzimu ukandidabila,
nlulwami kakale usina nlandu watjibe itjo tjiseko.
5 Iwoyu wakaliga makumbo una kulingila pasi kusheta phazha,
beti kuwigwa nge mang'oni koshingikalila ibabo banodengadenga.
6 Koga mishasha ye batoleli imile nge kunyalala,
na ibabo banotanga Ndzimu bakabakililika,
ibo banosenga ndzimu wabo nge maboko abo.
7 “Koga bhuzwa phuka ngono dzowokudiya,
kene nyuni ngono dzowokubudza,
8 kene lebeleka ne shango ngono inowokudiya,
kene hwobe dze gungwa dzowokubudza.
9 Ndizwipi zwe zwithu izwezwi zwisingazibe
kuti luboko gwa Yahwe gwakathama ikoku kene?
10 Ibo mu luboko gwabo kuna butjilo gwe zwitjili zose,
ne meya ye bathu bose.
11 Apa zebe aitoshakisisa matama kene,
koga se bgwasha guhwa kuzipa kwe zojiwa?
12 Apa butjenjedu ate guli mu sholotjena kene,
ne kuhwisisa akutozha nge mazhuba manji kene?
13 “Ku Ndzimu kuna butjenjedu ne simba
ndiwo una gumbuludzo ne hwisiso.
14 Bona, aukolomola akuna ungamusa,
auzhalilila nthu akuna ungazhula.
15 Bona, ha udzibila vula kuna kobe ne bhamba,
ha uiletjedza kobe ne nkubila ngono zokulila shango.
16 Ku uli kuna simba ne butjenjedu
batjebeli ne banotjebegwa nge bawo.
17 Unotatila kutjena bakumbuludzi basakasungila,
basumikilisi ukabathama zwilengwe.
18 Unosungunula misungo ya bomambo,
ukasunga thunji dza bomambo nge mwandabula we jila.
19 Unotatila kutjena bapirisiti basakasungila,
ukakudubhula bakasima.
20 Unonyaladza milomo ye banogalikabgwe,
katola butjenjedu gwe sholotjena.
21 Unolonga kulingigwa pasi mu bakololo ba bomambo,
ukanyebesa mwandabula we balume bakasima.
22 Unozumbunula masazibgwe mu zhalima,
ukadusila zwimu zhalima gulu mu tjedza.
23 Unothama zwitjaba zwikabe zwikulu ngono ukabuya ukazwikolomodza,
unothama zwitjaba kuti zwiwande ngono ukazwipaladzila kutjena.
24 Unotolela batungamili be shango mikumbulo,
ukabamaamisa bakalashika pasina zila.
25 Banoambaamba mu zhalima kusina tjedza,
ukabathama kuti batshatsharike se bakalaladza.
© Kalanga Bible © Bible Society of Botswana, 2008, 2018.