1 “Nthu wakazwagwa nge nkadzi
una mazhuba mashomanana, kakale uzhele mang'oni.
2 Unopasula se luba linoti tjinyolotjo likabuna,
unopinda se ntutshi, aatogalila tjose.
3 Apa nenguba akajalo, mon'sundila mesho kene?
Mukan'zhisa mbeli kwenyu kun'sumikilisa kene?
4 Apa ndiani ungadusa tjibuyanana muna tjisi tjibuyanana kene?
Akuna ne ung'ompela!
5 Mazhuba e nthu e bupenyu akalizanyidziwa
ne mbalo ye mimwedzi iye moyiziba,
makanthamila n'gathu waasingake katjuluka.
6 Musinlinge ndizo anyaluluke,
kuti ashathe se ntapiwa eshathila mazhuba awe.
7 “Kuna kugalabgwe mu nti,
ha wathubugwa unothinila kakale
thabi dzawo dze nsunilila adzitofa.
8 Midzi yawo inokwegula mu mavu
bhato lawo ilo lofila mu mavu,
9 ne kwakajalo ha uhwa doba koga
unothinila se nti ntjetjana.
10 Koga nthu ha efa ndilo bhelelo lile
unofema gwe bupelo kobe kwapela nge kukwe.
11 Se vula ipkhwa mu gakhwa
ne njizi dzopkhwa dzikawomelela,
12 ha zhuzhugwi kutjiyapo,
nthu unoizela ngono kasitjamuke kakale,
aatomusiwa mu hwope.
13 Ungati munga ndisumbika mu bugalo gwe bafi
mundisumbike kudzina bushongola gwapela,
ngekwa itjetjo mowondikumbula!
14 Apa nthu ha efa unosomuka kakale wali?
Mazhuba wose mazhuba anolema e nshingo
ndowolindila kuswikila mang'oni apela.
15 Ha mundidana ndowomudabila,
ndizo mowoshuba nshingo wamakathama nge maboko enyu.
16 Ngelebeswa mowobala thambo dzangu,
ngono mukasitja londolodze jinyo langu.
17 Kutjinya kwangu kwakasungigwa mu saka,
mowovukidzila jinyo langu.
18 “Koga dombo lowa likwamukana,
ne shongwe inotshedugwa mu magalo ayo,
19 se vula dzikwegudza mabgwe,
vula ye midumbi inokukula mavu e shango,
ndiko sekwa munokolomodza kugalabgwe kwe nthu.
20 Mokulila nthu mukantatila kutjena tjatjose,
mukaliga tjiso tjitje kafila kutjena.
21 Bakololo babe banokudziwa koga iye atoziba,
ne belengudziwa aatobona.
22 Iye ngekukwe unoteedzela zwibhayo zwimunli,
ne buyendasi gumu nli!”
© Kalanga Bible © Bible Society of Botswana, 2008, 2018.