1 Ipapo Zofa we N'namathi kashandula eti,
2 “Njalakang'wa dzangu dzothama kuti ndidabile,
ngoti ndidziyidzika mu nkumbulo.
3 Ndohwa kutjemela kusina kuteta,
ngono mu kuhwisisa kwangu kondisendedzela kuti ndidabile.
4 Atenditi unoziba kudwa tjose ntolo,
kudwa tjibaka tje nthu tjaakabigwa mu shango,
5 kuti kudziwa kwe babi ndekwe tjibakana koga,
ne kuti shatho ye ntjinyi ngeye tjibaka tjifupi koga?
6 Nenguba mazwikudzo awe eswika ku zhuzhugwi,
nenguba nsholo uwe ukutha ku makole,
7 unowolobela tjose se ndobe iye,
ibabo bakatongo mbona banowoti, ‘Ungayi?’
8 Se mawoloto unokanganika kasitjabongwe,
unowotatiwa se mbono ye busiku.
9 Zhisho lakambona alitjowombona kakale,
ne paakatongo gala akutjowombona kakale.
10 Bana babe banowolipa bashayi
ngono maboko awe anobgwiliza fumwa iye.
11 Nenguba mafupa awe ali zhele masimba e butjetjana,
anonolala naye mu hwuluba.
12 “Nenguba bubi guzipa mu nlomo uwe,
nenguba egusumbika kusi kwe lulimi gugwe,
13 nenguba asingashake kuguletja,
egubhatilila mu nlomo uwe,
14 koga zojiwa zwizwe zowoshababa mu ntumbu uwe,
zowoshanduka zwikabe bushungu gwe nyoka munli.
15 Fumwa dzaakamidza unowodzithwa
Ndzimu unowodzidusa mu ntumbu uwe.
16 Unowong'wa bushungu gwe nyoka,
bushungu gwe thumbi gowombulaya.
17 Aatobona njizi dzinowunga
kene wobana dzinowunga butji gwe nyutji ne lubomba.
18 Zwaakashingila unozwibgwiliza zwisakajiwa,
aatoshathila mimwiso ye zwaashaba.
19 Ngobe wakatshambilidza bashayi kabafupatila,
katola ng'umba yaasakabaka.
20 “Ngoti asingamise bugovu gugwe,
akuna tje zwithu zwaaanoda zwinowonsalila.
21 Akuna tjakasala shule kwe aja
ndizo kubhudilila kukwe akungabhatilile.
22 Mukubhudilila kukwe kwakawanda, dziyidzika kowon'pinda mu zila,
simba lose le buyendasi lowowila pezhugwi kukwe.
23 Ha asinozhadza ntumbu uwe,
Ndzimu unowodelusila bushongola gwawo guno thuta,
ukagunisa munli kube zojiwa zwizwe.
24 Unowotizha mu thumo le butale,
nsebe we phangula unowonbhaya.
25 Nsebe unopubula mbili uwe,
ukanophutula ndulo iye
unowigwa nge lutjo lukulu.
26 Zhalima lakati zwii lakalulwamisigwa thundu iye,
moto usina unouthutidza unowonlotesa
ne tjasala mu nshasha uwe tjowotshwa.
27 Kudzimu kowozumbunula jinyo lile,
ngono shango inowon'mukila.
28 Thundu iye yose inowotapiwa,
inowotutiwa mu zhuba le bushongola gwe Ndzimu.
29 Iwoyu ndiwo mbayilo we nthu mbiimbi kudwa ku Ndzimu,
lukata gwaakapiwa ne Ndzimu.”
© Kalanga Bible © Bible Society of Botswana, 2008, 2018.