1 Ipapo Jobe kashandula eti,
2 “Nanasi kose nditjang'ong'ola kwazo
luboko gwawo gondilemela nenguba ndatjipelegwa.
3 Ha ndingabe ndiziba kwandingaubona,
pamwe azha pa bugalo gwawo!
4 Ndabe ndowozhisa ndebo yangu mbeli kwawo,
ngono azwilebelekela.
5 Ndabe ndowoziba matama aunondishandula ndiwo,
ne kuhwisisa zwaunondidwa.
6 Apa unowonyanyaidzana nami nge bukulu gwawo kene?
Ndodwa, nge malebeswa unowonditeedza.
7 Ikoko nlulwami unowozwilebelekela nawo
asunungugwa tjatjose mu nsumikilisi wangu.
8 “Bonani, ha ndibhudila kunobhuda zhuba aupo ko,
ha ndibhudila kunomila zhuba anditouwana ko.
9 Ngono apa uli mu nshingo ku bunadzwa, anditoubona
apa ushandukila ku burwa naiko anditoubona.
10 Koga unoziba zila imwe ne imwe yandinotola
ausina kundilika, ndowobhuda ndinga golide.
11 Ndakatshamba mu thambo dzawo,
ndakalondolodza zila dzawo ndisingapambukile ntome.
12 Andizotongo letja sala shule ndaulo dzawo dzawakaleba,
Ndakabiganya matama awo awakaleba.
13 Koga iwo autoshandukila nkumbulo wawo,
ndiani ungaunyanyaidza? Tjaunoyemula unotjithama.
14 Unowopeleledza tjawakalongolosa nge kwangu,
ngono ndongoloso dzakajali dzinji mu nkumbulo wawo.
15 Ndizo wali ndina kutja kukulu mbeli kwawo
andikumbula kose ikoko, ndoutja dumbu.
16 Ndzimu wathama kuti nditjekeke bula,
Masimbawose unonditjisa.
17 Koga ate lili zhalima linonditjisa,
nenguba zwako zhalima lakandizwimba mesho.
© Kalanga Bible © Bible Society of Botswana, 2008, 2018.