Matama a Jobe e bupelo
1 Jobe kadwilila kakale nge ndebeleko iye eti,
2 “Ungati ndingabe ndinga tjandakabe ndili itjo mimwedzi yakapinda,
kunga mu mazhuba iyawaje Ndzimu ugala wakandilisa,
3 pawakabe uthama kuti luvone gwawo gupenye pezhugwi kwe nsholo wangu,
nge tjedza tjawo ndipalame zhalima,
4 se mazhuba andakabe nditjakasima,
kwakabe buzwalani gwangu ne Ndzimu gwakakombolela nzi wangu.
5 Masimbawose bakabe banami,
bana bangu bakandipoteleka.
6 Matshambo angu ndakabe ndiyazhodza lubomba,
mabgwe enditebukila mafuta e mitoba.
7 Ndakabe nditi andiyenda ku nkoba we nzi nkulu,
nditi nditola tjigalo tjangu pa tjibata,
8 bazhuzha bakabe betsheduka abendibona,
sholotjena dzikama nge makumbo,
9 makombgwa akabe emisa kulebeleka,
bebiga maboko pa milomo yabo,
10 mahwi e banokudziwa akabe eti hwu,
ndimi dzabo dzakabe dzinamatilana ne mbgwasha dzabo.
11 “Zebe yakabe endihwa ikandikombolela,
zhisho lakabe lindibona likapa butendeki nge kwangu.
12 Ngoti ndakabhatsha nshayi wakabe ekumbila bhatsho,
ne siyangwa yakabe isina unoibhatsha.
13 Ndakakombolegwa ndi iwoyu wakabe abepejo ngokufa,
athama kuti tjilikadzi ipembele nge kushatha.
14 Ndakafuka ndulamo se tjiambalo tjangu,
kutambunuka kwangu kukanga hazu ne tjiala
ikandiambadza se hazu ne tjiala.
15 Ndakabe mesho ku bhofu,
ndikabe makumbo ku tjilema tje makumbo.
16 Ndakabe tate ku nshayi,
amilila wandisingazibe mu lubazhe.
17 Ndakavuna meno e mbiimbi,
adzamula wakabe awila mu meno awe.
18 Ndakakumbula nditi, ‘Ndowofila mu shaka langu,
ndowowatsha mazhuba angu akanga nsetje.
19 Midzi yangu inowala ikanoti ku vula,
ne thabi dzangu dzowigwa ne khawa.
20 Gudzo langu lidzwa nsi ne nsi mundili,
ne dati langu logala lilidzwa koga mu luboko gwangu.’
21 “Bathu bakabe benditeedza nge kugalabgwe,
bakabe benyalala beti hwu, behwa gumbuludzo langu.
22 Shule kwe ndalebeleka bakabe basingatjalebe tjimwe,
matama angu akabe edothekela mu zebe dzabo zubuyanana.
23 Bakabe bendilindila se bakalinda vula,
beashama se nthu una nyota mu nsi we nyawuko.
24 Ndakabe ndibamwemwetelela apa basina kugalabgwe,
penya kwe tjiso tjangu kwakabe kubasimisa.
25 Ndakashalula zila yabo ngono agala sa she wabo,
ndakagala sa mambo pakati kwe babhayani babe,
sa iye unonyaladza banolila.
© Kalanga Bible © Bible Society of Botswana, 2008, 2018.