1 “Koga ngwenu Jobe ihwa ndebeleko yangu,
uhwilile matama angu wose.
2 Bona, ndozhula nlomo wangu
ndakazwilulwamisila leba tjipa moyo wangu.
3 Matama angu anodwa mu moyo wangu wakatambunuka,
nlomo wangu unowoleba itjo tjandinoziba koga.
4 Meya ye Ndzimu yakandibumba
mafemo a Masimbawose anondipa butjilo.
5 Undishandule, hautubula,
lulwamisa ndebeleko iyo, tilingisane.
6 Bona, mbeli kwe Ndzimu ndofanana koga nawe,
namibo ndakabumbiwa nge vu koga sa we.
7 Bona, akuna kutjiwa kwangu kwakafanila kukulobese hana,
kubeyapo kwangu kokukulila.
8 “Koga walebeleka ndakateedza nge dzangu zebe,
ndakuhwa ulebeleka matama anoti,
9 ‘Ndimbuyanana, andina nlandu wandathama,
ndakatjenapala, akuna jinyo mu ndili.
10 Bona, Ndzimu unobona itoyi mundili,
ukandibona ndili tjita tjawo.
11 Unosungila makumbo mu bhangwana,
kayela njele zila dzangu dzose.’
12 “Ngono, ima ndikudabile, autolebesa,
Ndzimu nkulu kupinda nthu.
13 Ini ukakabadzana nawo,
uti, ‘Autodabila kene?’
14 Ndzimu unolebeleka nge zila imwe,
ukalebeleka kakale nge ipoga,
nenguba bathu basina njele nako.
15 Unolebeleka nge mawoloto ne nge mbono busiku,
ha bathu bakaizela, bakaizela mu malawo abo,
16 ipapo unozhula zebe dze bathu,
ngono ukabatjenjedza ngekubatjisa,
17 kuti ndizo bafupatile kutjinya kwabo
ne kubadziba mukuzwikudza kwabo.
18 Autobaletjedza bakawila mu gomba,
unotjengeta bupenyu gwabo mu kulobesiwa nge thumo.
19 “Nthu unosolobgwa shamu kabe mu thobo dzinopisa
kabe mu zogwadza zwe mafupa anopanda kusingapele,
20 meya dzidze dzikati zwi ha dzibona zojiwa,
ne zojiwa zwinozipa kawana zwimbipila.
21 Nyama dzidze dzikashashamuka,
mafupa awe akasala ali patjena.
22 Bupenyu gugwe kwasendela gomba,
ne butjilo gugwe kuna ibabo banozhisa lufu.
23 Ha kuna ntumwa we Ndzimu ungama naye,
ali n'gadzanyi muna bali tjiwulu (1 000),
kowokumbuludza nthu kuti tjakanlulwamila nditjipi,
24 unangoni kunnli ngoni unoti,
‘Undzutunule mukungina mu gomba,
ndawana tjinga ndzutunula,
25 mbili uwe unowobgwilila ku tjimo tje butjetjana,’
unobgwilila ku mazhuba e simba le butjetjana gugwe,
26 aetembezela Ndzimu ukan'amutjila,
unozha mbeli kwawo nge kushatha,
unom'bgwilizila mu tjimo tjekutanga,
27 Ngono unozwilebulula mbeli kwe bathu eti,
‘Ndakatjinya apambusa tjakabe tjakalulwama,
koga andizolobgwa shamu yakandifanila.
28 Wakadzutunula bupenyu mukungina mu gomba,
ngono butjilo gwangu gowobona tjedza.’
29 “Bona Ndzimu unothama zwithu izwezwi,
unozwithama kabili ne katatu uthamila nthu,
30 kubuza bupenyu gugwe kudwa mu gomba,
kuti ndizo abone tjedza tje butjilo.
31 Undibhulutane kaa Jobe, nditeedze,
nyalala ngono ndowolebeleka,
32 ha una tjimwe tjaunoshaka leba, utjilebe,
lebeleka, ndoyemula kutendeka kuti wakatambunuka.
33 Ha usina tjaungaleba, unditeedze,
nyalala, ndowokudiya butjenjedu.”
© Kalanga Bible © Bible Society of Botswana, 2008, 2018.