1 “Apa unoziba tjibaka tjinozwala n'gululu kene,
kene unosolingilila ha zilawa izwala kene?
2 Apa unoziba kuti inobe methu mimwedzi mingana kene,
kene unoziba tjibaka tjadzinozwala kene?
3 Apa unoziba tjibaka tjadzinolala pasi kene,
dzizwala bana badzo kene?
4 Bana badzo banokula bakasima,
bakayenda ne shango bakayendila tjose.
5 “Apa ndiani wakaletjedza madonki e shango kayenda,
kene ndiani wakaasunungula kuti ayende kene?
6 Ndakaapa tjilambanyika kube nzi wazo,
ne ikwakwa kuti agaleko.
7 Anogala kule kule ne zhoba ye mizi mikulu,
aatohwa nsindo we bayendisi be dzikoloyi.
8 Anofulila ku matombo kule kule,
eshaka tjimwe ne tjimwe tjitala.
9 “Apa nyati ingada kukushingila kene?
Apa ingagala paunojisila zojiwa kene?
10 Apa ungasunga nyati nge ntjili kuti ilime kene,
kuti ikwebe bhadza mu nnda uwo kene?
11 Apa ungaigalabgwe nge masimba ayo makulu,
kuti ikushingile nshingo uwo unolema kene?
12 Apa unogalabgwe kuti inowobuya,
ikawosengela mathunde awo ku lutombo kene?
13 “Phowu inolobanya mapapilo nge shatho seni,
koga aingahwuluke se hanganlobe.
14 Ngobe inosiya mabumbulu ayo,
ikaaletja akadziyisiwa nge nsetje,
15 isingakumbule kuti gumbo lingaatshamba kapkhwanyika,
nekuti phuka dzimwe dze shango dzingaapkhwanyabo.
16 Inobhata bana bayo nge bukukutu, ungati ate bayo,
ingati aina hanya ngekuti yakashingila suli.
17 Hwuti Ndzimu auzoipa butjenjedu,
ukasitongo ipa gobe mu kuhwisisa.
18 Koga ha imilidza mapapilo ayo itizha,
inoseka mbizi ne ntaswi wayo.
19 “Apa ndiwe wakathama mbizi kuti dzisime kene,
nekuti dzibe ne nzezema kene?
20 Apa ndiwe unodzithama kuti dzitjuluke se phashu kene,
kuti dzitjise bathu nge bundula kene?
21 Dzipala se nkono pa gwizi dzakashatha,
dzikabhuda dzakasima dzinoshanganidza mbhatsha.
22 Adzitoziba lutjo kuti kodwiwani, adzitotja tjimwe.
Adzitotja lingisana ne mathumo.
23 Mathumo anolila akasengwa ne batathi badzo,
Mu ali kopenya nsebe ne thumo.
24 Nge kusima moyo ne bushongola inomidza shango,
ne lunyanga gulila adzitoma.
25 Tjibaka ne tjibaka ha lunyanga gulila dzoti, ‘Ahaa!’
Ngono dzotunila ngwa dzitjikule kule,
dzikahwa balauli be ngwa bemimila.
26 “Apa luphangu ha guwuluka, guangamadza mapapilo ago,
guwulukila ku burwa gobe gwadiyiwa ndiwe kene?
27 Apa dzu lowulukila pezhugwi kunobaka shaka,
pezhugwi nge ndaulo iyo kene?
28 Lobaka magalo alo mu matombo libe lilalako busiku,
logala mu phaswa dze matombo ne mu theswi dzawo.
29 Ikoko loshaka tjalingaja,
mesho alo anobona zwikule kule.
30 Majindana alo anong'wa malopa,
ngono pana itumbu madzu aipapobo!”
© Kalanga Bible © Bible Society of Botswana, 2008, 2018.